प्रणॉय क्वॉर्टरफायनलींत

भांगरभूंय | प्रतिनिधी

भारताचो अणभवी बॅडमिंटन खेळगडो एच एस प्रणॉयाचें जपान ओपन सुपर 750 बॅडमिंटन सर्तींतलें जबरदस्त प्रदर्शन चालू आसा. प्रणॉयान आदलो संवसारीक वस्ताद सिंगापूराच्या लोह कीन यू हाका हारोवन क्वॉर्टर फायनलींत सुवात मेळयली.

भारताचो आनीक एक खेळगडो किदाम्बी श्रीकांताचें आव्हान मात प्री क्वॉर्टरफायनलींत सोंपलें.

संवसारीक क्रमवारींत आठवे सुवातेर आशिल्ल्या प्रणॉयान आठव्या सिडा वयल्या यू हाका 44 मिनटां मेरेन चलिल्ले मॅचींत 22-20 आनी 21-19 अशा सरळ गेमांनी हारयलो. फाटल्या सप्तकांत संवसारीक बॅडमिंटन वस्तादपण सर्तीचे क्वॉर्टरफायनली मेरेन मजल मारपी प्रणॉयाचें सिंगापूराच्या खेळगड्या आड चारांतलें हें तिसरें जैत थारलें.

30 वर्सां पिरायेचो प्रणॉय क्वॉर्टरफायनलींत चीनी तायपेच्या चाउ तिएन चेन आड खेळटलो. चाउन फाटल्या सप्तकांत जाल्ले संवसारीक बॅडमिंटन वस्तादपण सर्तींत कांश्या पदक जिखिल्लें. प्रणॉय हालिंसाराक ताच्या आड दोन मॅची खेळ्ळा आनी दोनूय मॅचींनी जैत जोडलां.

मजगतीं, श्रीकांताक प्री क्वॉर्टरफायनलींत जपानाच्या कांता सुनेयामा आड 21-10 आनी 21-16 अशा फरकांनी हार घेवची पडली. ते पयलीं पयले फेरयेंत श्रीकांतान संवसारीक क्रमवारींत चवथे सुवातेर आशिल्ल्या ली जी जियाक हारोवन सगल्यांत अजापाचो धपको दिल्लो. ह्या जैता उपरांत श्रीकांता कडल्यान वस्तादपणाची आस्त वाडिल्ली. पूण, ताची धांव प्री क्वॉर्टरफायनलींत सोंपली.