भांगरभूंय | प्रतिनिधी
पणजीः उत्तराखंडांतलो शाहिद आफ्रीदी (25) हो तरणाटो कांदोळे दर्यादेगेर बुडलो. शुक्रारा सकाळीं ही घडणूक घडली.
हे विशीं मेळिल्ले चड म्हायती प्रमाण, पणजेच्या एका हॉटेलांत काम करपी कांय कर्मचारी सकाळीं भोंवपाक आनी पावसाच्या दिसांनी दर्याची सोबीतकाय अणभवपाक कांदोळे दर्यादेगेर गेल्ले. ह्या वेळार शाहिद आफ्रीदी उदकाच्या प्रवाहांत सांपडलो आनी बुडलो.
हे घडणुकेची म्हायती मेळतांच बरोबर थळावो बचाव पंगड आनी संबंदीत यंत्रणां घडणुके सुवातेर पावलीं. तांणी तरणाट्याक भायर काडून वैजकी उपचारा खातीर व्हेलो. पूण दोतोरांनी ताका मरण आयिल्ल्याचें सांगलें.
ही घडणूक संबंदीत पुलीस स्टेशनांत नोंद केल्या. पुलीस हे घडणुकेची फुडली चवकशी करतात.
चत्राय!
दर्या सद्या खवदळिल्लो आसतना दर्यांत वतना पर्यटक आनी नागरिकांनी गरजेची जतनाय घेवची असो उलो प्रशासनान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
