भांगरभूंय | प्रतिनिधी
आयज शिक्षण प्रत्येकाच्या दारांतूच न्हय तर घरा कणकणीं पावलां. फक्त शिकपीच जाय. काळान कूस परतिल्या, आदलो काळ आतां उरूंक ना. काळ झपाट्यान बदलत आसा. ह्या बदलत्या प्रवाहा वांगडा आमी मुखार मुखार वचपाक जाय. हीच मानसीकताय घेवन मनीस समाजांत वावुरताना दिश्टी पडटा. आयज जें विकसीत गोंय दिश्टी पडटा तें गोंयचे भाग्यविधाते पयले मुखेलमंत्री भो, दयानंद बांदोडकर (भाऊ) हांणी वाड्यावाड्यार शाळा काडल्यो. कारण एकूच शिक्षणा पसून कोणूच वंचीत उरूंक जायना. त्याच नाड्यार आयज गोंय समृध्द आनी सक्षम जावंक पावलें हें सत कोणूच न्हयकारचो ना. आयज त्योच मराठी शाळा पटसंख्येक लागून पटापट बंद पडटना दिश्टी पडटात. ताचे कारण आयज सगलेच इंग्लीश माध्यमांच्या शाळांनी आपल्या ल्हान ल्हान भुरग्यांक घालपाक लागल्यात. समाजांत एक तरेचो स्टेटस मिरोवंक. ग्रामीण वाठारांतल्या भुरग्यांक लेगीत इंटरनॅशनल स्कुलांनी घालतात. हाचो अर्थ कितें? सरकारी शाळा, हायस्कूल म्हणजे गांवांतलो गांवठी पसरो आनी खाजगी शाळा, हायस्कूल म्हणजे मोल!
एक काळ आसलो की मराठी शाळांची दशा गेल्ली. त्यो पुर्नजीवीत केल्यो, सोयीसुविधा उपलब्ध केल्यो. तरी पूण सरकारी शाळांची, हायस्कुलांची पटसंख्या कमीच. अक्षरशा सरांक, टिचरीक भुरगीं जमोवपाक पालकांच्या दारांनी भोंवचें पडटा हें वास्तव. हें चित्र बदलतलो जाल्यार निसुवार्थी, धडपडी, प्रामाणीक शिक्षक जाय. शिक्षणीक मळार अशा शिक्षकांचो उणाव आसा. सरकारी शाळां, हायस्कुलांनी शिकोवपी शिक्षकूच आपल्या भुरग्यांक खाजगी शाळांनी घालतात. मागीर गांवांतलो पालक खाजगी शाळांनी कित्याक घालचो ना? सरकारी शाळां, हायस्कुलांच्या शिक्षकांचेर आमचो विश्वास ना अशें जालें ना.
इंग्लीश माध्यमांच्या खाजगी शाळांक कोण प्रोत्साहन दिता? नवीं नवीं खाजगी कशीं हायस्कुलां उगडटात, मागीर सरकारी शाळा हायस्कुलांची पटसंख्या कित्याक उणी जावची ना? कांय शिक्षक फाटलीं 15 – 15, 17- 17 वर्सां एकाच जाग्यार आसा. खरें म्हणल्यार कमीत कमी धा- धा वर्सांनी बदल्यो ह्यो जावप गरजेच्यो. एकाच गांवांत एकेच शाळेंत 20 – 25 वर्सां नोकरी करप समा न्हय. तें शिक्षक, टिचरी नव्या हेडमास्तराचें आयकनात वा सहकार्य करिनात. ताचो परिणाम शाळा, हायस्कुलांच्या शिक्षणीक विकासाचेर जाता. सगलेच शिक्षक, टिचरी कामचुकारपणा करिनात. थोडे प्रामाणीकपणान काम करपीय शिक्षक आसात. ना अशें ना. ग्रामीण वाठांरातल्या सरकारी हायस्कुलांनी चडशे खेपे विद्यार्थ्यां कडेन इंग्लीशींतल्यान इंटरेक्शन कमी जाता म्हणून पालक ह्या हास्कुलांनी आपल्या भुरग्यांक धाडिनात. जेन्ना शाळा समुहातले शिक्षकूच खाजगी शाळेंत घाल म्हूण सांगतात वा शाळेंतले शिक्षक आपल्या भुरग्याक खाजगी शाळेंत घालतात तेन्ना ते पालकांक खंयच्या तोंडान सांगतले? की भुरग्यांक सरकारी शाळांनी घालात म्हूण. सरकारी शाळांतल्या भुरग्यांच्या पालकांक आमी गृहीत तर धरिनात मूं? सरकारी शिक्षक काम भरपूर करतात, पूण कांय कामचुकारपणा शिक्षकां खातीर सरकारी शाळा, हायस्कुलांनी शिक्षक सारखे शिकयनात अशे तरेचो गैरसमज पालकांच्या मनांत निर्माण जाल्लो आसा. म्हणून पटसंख्या कमी जाता वा शाळा बंद करपाची पाळी येता. ग्रामीण वाठारांतल्यो शाळां, हायस्कुलां चालू उरपाक जाय. त्यो जर बंद जाल्यो जाल्यो जाल्यार.
शिक्षक दुसऱ्या शाळा, हायस्कुलांनी जांकां शक्य आसा ते आपल्या भुरग्यांक गाडयो लावन शारांनी धाडटले. हातीच्या पोटा वेल्या गरिबांच्या भुरग्यांचे कितें? हाचो कोण विचार करिना. खरे म्हणजे गांवच्या जागृत ग्रामस्थांनी जाग्रूत जावपाची गरज आसा. गांवांतली शाळा, हायस्कूल बंद जावचें ना हाची दखल सरकारा परस SMC, PTA वा माजी विद्यार्थी संघटणा हांणी घेवपाक जाय. गांवातले पालक व्हड विस्वासान आपल्या भुरग्यांक सरकारी शाळा हायस्कुलांनी घालतात, आमी तांच्या विस्वासाक पात्र जावपाक जाय. भुरग्यांच्या फुडारा कडेन खेळ मांडपाक जायना. आमी तांकां घडयताच पूण तितलेंच पालकांचे आनी भुरग्यांचे सहकार्य जाय आसता. जायते खेपे तें मेळना. कांय भुरगीं खुबूच मस्तीं आसतात, तीं कोणाकूच आयकनात. तांकां शिक्षक वा मुख्याध्यापक कांयच करूंक शकनात. कारण सरकारी कायदे. ग्रामीण वाठारांतल्या आनी शारी वाठारांतल्या वा सरकारी हायस्कुलांची पटसंख्या वाडयतलो जाल्यार विंगड विंगड दर्जेदार उपक्रम राबोवंक जाय, जेणे करून भुरग्याक आनी पालकांक दिसपाक जाय की अपूण आपल्या भुरग्यांक सरकारी हायस्कुलांतूच घालतलों.
जंय भुरग्यांची जडण घडण बरी जाता. जंय ताचो सर्वांगीण विकास सादता. अशा उपक्रमाक सामुहीक रित्या सगल्यांनीच सहकार्य करपाक जाय. हेडमास्तराक क्रेडीट मेळटलें ताचे परस आसूंच तें म्हणप हें समा न्हय. थोडे जेश्ठ शिक्षक अशें म्हणून चल्ले की वर्सान वर्स कित्याक येवपाक जाय बोर्डाचो 100 टक्के निकाल. असले मानसीकतेचे शिक्षक आसात. कांय शिक्षकांक ड्युटी लेगीत समजावन सांगल्यार तांकां सतावणूक कशी दिसता. समाजा खातीर काम करतल्याक कामां खूब आसात, काम करपीच जाय. आळशांक निमतां हजार. खंयचेंय काम करपाक उमेद जाय, आवड जाय, तळमळ जाय, आनी जिद्द जाय तरूच तुका यश मेळटा. आनी जैत मेळटकच तुका काम केल्ल्याचें समाधान मेळटा.
मुख्याध्यापक म्हूण 2016 वर्सा म्हजी घांटमाथ्यार सु्र्ला सत्तरी हांगा नेमणूक जाली. स वर्सां प्रामाणीकपणान आनी तळमळीन काम केलें. लोकांच्या घरांनी, पडवेर वर्ग भरपी हायस्कुलाक ग्रामस्थांचे मजतीन कॉंक्रिटाच्यो दोन वर्ग बांदून घेतले. खेळपाक मैदान तयार केलें. उपरांत GSIDC वतीन सुसज्ज अशें सी शेप हायस्कूल हांवें बांदून घेतलें. ह्या कामांत आदले मुखेलमंत्री आदरणीय प्रतापसिंह रा. राणे, हांचें मार्गदर्शन आनी अनमोल अशें सहकार्य मेळ्ळें. फक्त साधनसुविधाच दिली ना तर 100 टक्के निकालाची परंपरा सुरू केली. 2021 मेरेन सुर्ला स्कुलाचो ताबो म्हजे कडेन आशिल्लो. म्हाका कोणेच सांगूंक नाशिल्लें हें काम करपाक जाय म्हूण.
ताचीच पु्र्नरावृती ठाणें सत्तरी हायस्कुलाचो कायापालट पळोवंक मेळटा. ताचें स्रय पर्येंच्यो आमदार भो. देविया विश्वजीत राणे हांकांच दितां. SMC, PTA हांणीय स्कुला खातीर भरभरून सहकार्य दिलां आनी म्हणूनच पिएमश्री चे पयले फेजीत ठाणेंच्या स. हिरोजीराव बाबुराव देसाई शासकी माध्यमीक विद्यालयाची निवड जाली. तीन वर्सांत पिएमश्रीच्या अंतर्गत भरपूर विकास जाल्लो आसा. हें सगलें करून घेवपाक तळमळ जाय पडटा. वेळ दिवचो पडटा, वायटपणांय घेवचीं पडटात. हांवें दिल्ल्या वेळाचें आनी केल्ल्या कामाचें म्हाका समाधान मेळटा. ठाण्यांत म्हजेच कारकिर्दींत पयलेच फावटी धावेचो निकाल 100 टक्के येवपाक लागला, तरी पटसंख्या कमी जाता. सरकारी हायस्कुला कडेन पळोवपाचो दृश्टीकोन बदलपाक जाय.
काशिनाथ नायक
9158345844
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
