एसटी दर्जा विशीं कोंफुसांव पयस करपा खातीर गृह मंत्र्यांची भेट घडोवन हाडची

भांगरभूंय | प्रतिनिधी

धनगर समाजाचे फुडारी चंद्रकांत कवळेंकार हांची मागणी

पणजीः धनगर समाजाक एसटी दर्जो दिवपा खातीर ज्यो त्रुटी रेजिस्टार जनरल ऑफ इंडीयान काडिल्ल्यो त्या सगल्या त्रुटींक जाप दिला. देखून आमच्या एका शिश्टमंडळाची परतून गृह मंत्री अमीत शाह हांची भेट घेवन दिवची, जेणे करून संसदेंत आदिवासी समाजाक एसटी मान्यताय मेळटली अशी विनंती आमी मुख्यमंत्री डॉ. प्रमोद सावंत हांचे कडेन केल्या, अशी म्हायती धनगर समाजाचे फुडारी आनी आदले उपमुख्यमंत्री चंद्रकांत कवळेंकार हांणी दिली.

धनगर समाजाक एसटी दर्जो दिवपा खातीर सद्याचे परिस्थितीचेर कवळेंकार उलयताले. ह्या विशयांत गोंयच्या 12 म्हाल समितींचे मुख्यमंत्र्या कडेन उलोवप जालां आनी त्या त्या म्हालांतल्या समितींनी आपल्या आमदाराक मेळून विनंती केल्या, अशें कवळेंकार हांणी म्हणलें.

पयर आमी मुख्यमंत्र्याची भेट घेवन सांगलां की, धनगर समाजाक एसटी दर्जो मेळपा संबंदी कोंफुसांव जालां. तें जाता तितले बेगीन ते आदिवासी मंत्रालया कडेन वचून सारखें करचें. आरजीआयन हो दर्जो भायर मारला अशें चुकून म्हणलां, पूण ते भायरायनासतना आरजीआयन फक्त नवी त्रुटी काडिल्ली. पूण आदिवासी मंत्रालयान गोंय सरकाराक कळयतना तें भायर मारलां असो चुकीचो संदेश गेला, अशे स्पश्टीकरण कवळेंकार हांणी दिलें.

ही चूक सुदारपाची मागणी मुख्यमंत्र्यां कडेन केल्या. आरजीआय हे मंत्री गृह मंत्री अमीत शाह हांचे खाला येता. देखून जाता तितले बेगीन गृह मंत्र्यां कडेन शिश्टमंडळ घेवन वच्चें. 23 वर्सां जालीं फक्त त्रुटीच query काडीत आसात. त्या सगल्या त्रुटींक जाप दिवन तांचे निवारण केलां आनी सद्या कसल्योच त्रुटी उरिल्ल्यो नात. गवळी धनगर अधिसुचोवणी काडपाची आसली ती लेगीत काडल्या, अशी म्हायती कवळेंकार हांणी दिली.

सगली प्रक्रिया पुराय जाल्या आनी शिश्टमंडळाची गृह मंत्री शाह हांची भेट घेवन हो विशय संसदेंत मान्य करून घेवपा इतलोच उरला. ही भेट जाता तितले बेगेन घडोवन हाडात असो आग्रो आमी मुख्यमंत्र्यां कडेन केला. मुख्यमंत्र्यांनी एक म्हयन्याचो वेळ मागला, पूण तांकां सांगलां, जाता जाल्यार दोन म्हयने घेयात, पूण जो अन्याय फाटलीं 23 वर्सा धनगर समाजाचेर जाला हो खंय तरी पयस करपाची विनंती मुख्यमंत्र्यां कडेन केल्ल्याचें कवळेंकार हांणी सांगलें.