भांगरभूंय | प्रतिनिधी
पणजीःकोंकणी नाट्यसर्तीच्या भांगरा उत्सव सुवाळ्या निमतान फाल्यां शुक्रारा कोंकणी साहित्यीक, नाटककार पुंडलीक नायक हांचो जिणेगौरव पुरस्कारान भोवमान करतले. तशेंच कोंकणी नाट्य मळार तीस वेगवेगळे पुरस्कारांचे वांटप ह्या निमतान जातले, अशें कला अकादमीचे अध्यक्ष चंद्रकांत (बाबू) कवळेकार हांणी सांगलें.
पणजे कला अकादमींत पत्रकार परिशदेंत कवळेकार उलयताले. ह्या वेळार अकादमीचे वांगडी सचीव शंकर गांवकार आनी हेर अधिकारी हजर आशिल्ले.
कला अकादमीन सुरू केल्ले कोंकणी नाट्य सर्तीक ५० वर्सा पुराय जातात. ह्या निमतान शुक्रारा हे कार्यावळीचें आयोजन केलां, अशें कवळेकार हांणी सांगलें.
५० वर्सांच्या कार्यकाळात कोंकणी नाट्य मळाक व्हडलें योगदान दिल्ले नाटककार पुंडलीक नायक हांचो ह्या वेळार मुख्यमंत्री डॉ. प्रमोद सावंत हांचे हस्तुकीं एक लाख रोख आनी मानचिन्न दिवन भोवमान जातलो, अशें कवळेकार हांणी सांगलें.
महाराष्ट्रा कडेन तुळा करीत जाल्यार तांच्या जिल्ल्या इतले आमचे राज्य आसा. मात आमची मायभास कोंकणी खंयच कमी ना. ५० वर्सांच्या कार्यकाळा भितर दर्जेदार नाटकां आमच्या लेखकांनी आनी कलाकारांनी दिवन वेगवेगळ्या पांवड्यार सादर केल्यांत. दिल्ली सारकिल्ल्या व्हडल्या पांवड्यार लेगीत कोंकणी नाटकांनी बरी छाप सोडल्या, अशें मत कवळेकार हांणी मांडलें.
उत्कृष्ट दिग्दर्शन, लेखन, अभिनय, उजवाड येवजण, पार्श्वसंगीत, रंगभूशा, वेशभूशा आनी माचये मांडावळ हे श्रेणींतल्या नाट्य कलाकारांचो भोवमान जातलो. कोंकणी नाट्य सरत्तीचो नियाळ घेवपी खास पुस्तिका उजवाडाक हाडटले. उपरांत पुंडलीक नायक हांचें ‘पिंपळ पेटला’ नाटक जातलें, अशी म्हायती कवळेकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
