भांगरभूंय | प्रतिनिधी
आयजीपी सयत पुलिसांच्यो लेगीत बदल्यो
पणजी : वेंचणूक आयोगा कडल्यान विधानसभा वेंचणुकेची तयारी सुरू जावपाचे फाटभूंयेर राज्याचे मुखेल वेंचणूक अधिकारी (सीईओ) आयएएस संजय गोयल हांची अरूणाचल प्रदेशांत बदली जाल्या. मुखेल वेंचणूक अधिकार्यां सयत पुलीस म्हानिरीक्षका सयत आयपीएस अधिकार्यांच्यो लेगीत बदल्यो जाल्यात.
केंद्रीय वेंचणूक आयोगाच्या निर्देशा उपरांत राज्यांत विधानसभा वेंचणुके खातीर वेंचणूक अधिकारी तशेंच साहाय्यक वेंचणूक अधिकार्यांची नेमणूक जाल्या. हे भायर जिल्होधिकार्यांनी लेगीत बसका घेवन ईव्हीएम मशिनाची तपासणी तशेंच हेर कामां सुरू केल्यांत. फाटल्या सप्तकांत वरीश्ठ नागरी सेवा अधिकार्यां सयत हेर अधिकार्यांच्या बदल्यांचे आदेश राज्य सरकारान जारी केल्ले. आतां केंद्र सरकारान मुखेल वेंचणूक अधिकार्यां सयत आयपीएस अधिकार्यांच्या बदल्यांचे आदेश जारी केल्यात. हाका लागून मुजत सोंपचे पयलीं राज्यांत विधानसभा वेंचणूक जावपाचे संकेत मेळटात.
मुखेल वेंचणूक अधिकारी पदाचेर आशिल्ले संजय गोयल हांची अरूणाचल प्रदेशांत बदली जाल्या. हे भायर पुलीस म्हानिरीक्षक (आयजीपी) अभयकृष्ण शर्मा आनी पुलीस उपम्हानिरीक्षक (डीआयजी) वर्षा शर्मा हांची दिल्लींत बदली जाल्या. पुलीस अधीक्षक आर्षी आदिल आनी टिकमसिंग वर्मा हांची जम्मू काश्मिरांत बदली जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
