भांगरभूंय | प्रतिनिधी
पणजीः कला अकादमीचें दीनानाथ मंगेशकर सभाघर १ ऑगस्ट सावन दुरुस्ती खातीर बंद आसतलें. हें काम केन्ना पुराय जातलें हें तज्ञ वांगड्यांनी सादर केल्ल्या निमण्या अहवालाचेर निंबून आसा. हे खातीर आयआयटी चेन्नयचे डॉ. पिल्लय हांची तज्ञ म्हण नेमणूक केल्या, अशी म्हायती कला अकादमीचे वांगडी सचिव शंकर गावकार हांणी दिली.
कला अकादमीच्या दुरुस्ती कामा विशीं टास्क फोर्सान केल्ले कामांचे तपशील सादर करतना गांवकार हांणी सांगलें, टास्क फोर्सान आवाज, उजवाड आनी ध्वनीशास्त्र आनी संरचनात्मक थिरता हे दोन वेगळे विशय घेवन तांचे खातीर वेगळे तज्ञ नेमल्यात.
आवाज, उजवाड आनी ध्वनीशास्त्र खातीर तीन तज्ञ टास्क फोर्सान नियुक्त केल्यात. तांणी पयलीं मुळावो अहवाल तयार केल्लो. मात निमाणो अहवाल तयार करपा खातीर तांणी फाटीं पळोवणी लेगीत केल्या. आतां ह्या निमण्या अहवालांत खंयच्यो चुको सारक्यो करचो हें सांगून ते नुसार त्रुटी सुदारतले, अशें गांवकार हांणी सांगलें.
टास्क फोर्सान आयआयटी चेन्नयचे डॉ. पिल्लय हांची नियुक्ती केल्या. पयलीं जें काम जालां ते सारकें आसा काय ना हें तज्ञच सारकें सांगपाक शकतात. कितें चुकलां आसत आनी कितें सुदारपाक जाय हें तज्ञ आपल्या निमाण्या अहवालांत मांडून भौशीक बांदकाम खात्याक हीं कामां ताकतिकेन घेवपाक सांगतले. अदमासान खर्च तयार करून १ ऑगस्ट सावन काम चालू करतले, अशी म्हायती गांवकार हांणी दिली.
कला अकादमीचे दुरुस्ती खातीर ५० कोटी रुपयांचो अदमास खर्च तयार केल्लो. तातूंतले १० कोटी आमी आडावन दवरल्यात आनी उरिल्ल्या १० कोटींतल्यान हें काम जातलें. जो मेरेन ह्या विशींचो अहवाल तयार जायना हे पयशे मंजूर जावचे नात, अशें गांवकार हांणी स्पश्ट केलें.
फकत कला अकादमीचे दीनानाथ मंगेशकर सभाघरच बंद आसतलें, पुराय कला अकादमी न्हय. ब्लॅक बॉक्स, हेर वर्ग आनी कार्यालायां सुरू आसतलीं. १ ऑगस्टा उपरांत बुकींग करपाक मेळचें ना. हें सभाघर कितले दीस बंद आसतलें असो प्रस्न टास्क फोर्साक विचारिल्लो. मात ते म्हणटा, हें तज्ञ पंगडाच्या निमण्या अहवालाचेर निंबून आसा. जर तें सगळें कितें सारकें आसा म्हणत जाल्यार कांयच काम जावचें ना. बारीक कितें काम आसल्यार म्हयन्या भितर काम जाव येता, अशी म्हायती गांवकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
