भांगरभूंय | प्रतिनिधी
रायगड: महाराष्ट्रांतल्या रायगडांत पावसा उपरांत ३ हजार एलपीजी सिलिंडर पाताळगंगा न्हंयेंत व्हांवून गेले. पनवेलच्या एलपीजी बॉटलिंग प्लांटांत हुंवार आयले उपरांत सिलेंडर व्हांवून गेले. प्रशासनान लोकांक उलो मारला, जर खंयसरूय सिलेंडर मेळ्ळ्यार ताका हात लाव नाकात आनी ते घरा व्हरूं नाकात म्हूण.
मध्य प्रदेशंात बुधवारा २७ परस चड जिल्ह्यांनी घोग्यांनी पावस झडलो. सगळ्यांत चड १.७५ इंच पावन दमोह हांगा नोंद जालो. खरगोन हांगा रूपारेल न्हंयेच्या नेटान जावपी प्रवाहांत एक तरणाटो व्हांवून गेलो.
राजस्थानांतल्या अजमेर जिल्ह्यांतल्या किशनगडांत बुधवारा रातीं पावसाक लागून एक घर कोसळ्ळें. ह्या अपघातांत घोव-बायले सयत तीग जाण राशी पोंदा गेले. त्या तिगांकूय वाटोवन हॉस्पिटलांत दाखल केलें. अलवर हांगा पावसाक लागून बाजारांतले रस्ते उदका पोंदा गेले.
दिल्लींत सकाळ सावन पावस पडटा. रेल्वे स्टेशन, मुनिरका आनी खुबश्या वाठारांतले रस्ते उदका पोंदाक गेल्यात. हवामान विभागान आयज ऑरेंज अलर्ट जारी केला. बुधवारा रोहिणी हांगा बांधकाम सुरू आशिल्ली इमारत कोसळून तीन लोकांक मरण आयलें.
गुजरातच्या सुरत हांगा सेगीत तीन दिसां सावन सुरू आशिल्ल्या पावसाक लागून हुवाराची परिस्थिती निर्माण जाल्या. ह्या हुंवारांत तीन दिसांक १९ लोकांक मरण आयलां. जाल्यार, महाराष्ट्रांतल्या पुण्यांत घोग्यांनी पडपी पावसाक लागून कोयराचो दोंगोर तीन माळयेचे इमारतीचेर कोसळ्ळो. हाका लागून इमारतूय कोसळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
