भांगरभूंय | प्रतिनिधी
कांक्राचें निदान जातकच रजा लागू करपाची मागणी
पणजी : अॅडवान्स स्टेज कांक्र (कॅन्सर) दुयेसा सयत दुर्धर दुयेसां खातीर शिक्षकांक जी वर्साची रजा मेळटा ताचो लाव खूब उण्या शिक्षकांक जाता. अॅडवान्स स्टेज कॅन्सर दुयेंसा खातीर रजा दिवपा परस कॅन्सराचें निदान जातकच शिक्षकांक रजा दिवप लावकारी थारतलें. हाका लागून योग्य तरेन उपचार जावन कांक्राचें दुयेंस आशिल्लो शिक्षक बरो जावपाक मजत जातली. कांक्र वा दुर्धर दुयेसाचें निदान जातकच रजा लागू करची, अशी मागणी अ. गो. सरकारी कर्मचारी संघटणेन केल्या.
कांक्र तशेंच किडणी, काळजाच्या दुयेंसा खातीर शिक्षकांक वर्सभर (365 दीस) रजा दिवपी खासा वैजकी रजा दिवपी सवलत सरकारान दिल्या. हे विशीचो आदेश 10 फेब्रुवारी 2026 दिसा जारी जालो. गोंय, दमण, दीव विद्यालयीन शिक्षण कायदो 1984च्या खाला हो आदेश जारी जाला. अॅडवान्स स्टेज कांक्र दुयेंस वा हेर दुर्धर दुयेंसां खातीरूच उपचारा खातीर वर्साची रजा दिवपी ही सवलत आसा. मुळाव्या शिक्षका सयत उच्च माध्यमीक विद्यालयांत शिकोवपी शिक्षकां खातीर ही सवलत आसा. रजे खातीर गोंय वैजकी म्हाविद्यालय हॉस्पिटलाच्या प्रमाणपत्रा सयत संबंदींत शिक्षकाक मुख्याध्यापका कडेन रजे खातीर अर्ज करचो पडटलो. मुख्याध्यापकान शिक्षण संचालनालया कडेन अर्ज धाडले उपरांत कागदपत्रां पळोवन ताका मान्यताय मेळटली. गरज पडल्यार वर्सा परस चड तेंप लेगीत रजा मेळप शक्य आसा.
कांक्र सारक्या दुयेंसाचें निदान जाले काय रोखडेच दुयेंतीक उपचार सुरू करचे पडटा. केमोथेरपी उपचार सुरू जाले कांय दुयेंतींक विसव घेवचो पडटा. बेगीन उपचार सुरू जाले जाल्यारूच दुयेंतीचो जीव वाटावपाची शक्यता चड आसता. सवलती प्रमाण कांक्राचें निदान जातकच दुयेंतीक रजा मेळना. अॅडवान्स स्टेजीच्या कांक्रा खातीरूच रजा मेळटा. हाका लागून कांक्राच्या सगल्या दुयेंतींक रजा मेळना. अॅडवान्स स्टेजी वेले कांक्र दुयेंती उपचार घेवन लेगीत चड तेंप जगपाची शक्यताय सामकी उणीं आसता, अशा शिक्षकांनी सांगलें. कसल्या प्रकारचे कांक्र दुयेंस आसले तरी निदान जातकच रजेचो लाव दिवचो, अशी मागणी आसा. बऱ्याच शिक्षकांची ही मागणी आसा. निदान जातकच रजेची सवलत दिली जाल्यारूच गरज आशिल्ल्या शिक्षकांक हे येवजणेचो लाव जातलो, अशें मत शिक्षकांनी उक्तायला.
दुर्धर दुयेंस वा अॅडवान्स स्टेज कांक्र दुयेंसा खातीर शिक्षकांक वर्सभर रजा दिवपी गोंय हे एकमेव राज्य आसा. ही येवजण सरकारान लागू केल्या. कांक्राचें निदान जातकच रजा दिवपाची तजवीज करप सरकाराच्या हातांत आसा, अशें शिक्षण संचालक शैलेश झिंगडे हांणी सांगलें.
………………
कांक्राचें निदान जातकच शिक्षकांक रजा दिवपाची तजवीज आसपाक जाय. अशें जाल्यारूच सवलतीचो खऱ्या अर्थान लाव जातलो, अशें अ. गो. सरकारी कर्मचारी संघटणेचे अध्यक्ष अभय मांद्रेंकार हांणी म्हणलें. कांक्र तशेंच दुर्धर दुयेंसाच्या उपचारा खातीर सरकारी कर्मचाऱ्यांक योग्य प्रमाणांत रजा मेळची. सरकारी सेवा नेमांत तजवीज करपाची मागणी संघटणे वतीन करतलें, अशें अध्यक्ष अभय मांद्रेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
