भांगरभूंय | प्रतिनिधी
पणजीः दक्षीण कोरियांत जावपी ‘फर्स्ट ग्लोबल चॅलेंज 2026 हे ऑलिम्पीक धर्तेचेर जावपी आंतरराष्ट्रीय रोबोटिक्स सर्तींत भारताचें फुडारपण करपाक गोयांतल्या पांच विद्यार्थ्यांची निवड जाल्या. ही सर्त 7 ते 10 ऑक्टोबर 2026 ह्या काळांत इंचॉन, रिपब्लीक ऑफ कोरिया (दक्षीण कोरिया) हांगा जातली. ‘फर्स्ट ग्लोबल चॅलेंज’ ही अमेरिकेंतल्या ‘फर्स्ट ग्लोबल’ ह्या ‘नाॅन प्रॉफीट’ संस्थे वरवीं दर वर्सा आयोजीत केल्ली एक आंतरराष्ट्रीय रोबोटिक्स सर्त आसा.
‘फर्स्ट ग्लोबल चॅलेंज 2026’ च्या टीम इंडियांत गोयांतल्या पांच विद्यार्थ्यांचो आस्पाव आसा. हे विद्यार्थी आपल्या वेगवेगळ्या कुशळटायेच्या नेटार ‘टॅक इन्फिनिटी’ह्या पंगडाक ह्या जागतीक सर्ती खातीर तयार करतात. ह्या पंगडांत स्पर्श स्वप्नेश वेर्लेकार , ध्रुव समीर साळगांवकार, सोहम महेश रेडकार (सगले सारस्वत विद्यालय, म्हापशें), अवनीश देवेंद्र फडते (मुष्टीफंड हायस्कूल, कुजिरा) आनी अनाम रझा (पोदार इंटरनॅशनल स्कूल, पोरणें गोंय) हांचो आस्पाव आसा.
‘टॅक इन्फिनिटी’ ह्या पंगडान ‘स्टेम एज्युकेशन ट्रस्ट’ आयोजीत ‘भारतीय यंत्र खेळ महोत्सव’ 2026 ह्या राष्ट्रीय निवड सर्तींत ‘विक्रम साराभाई राष्ट्रीय उत्कृश्ठता पुरस्कार’ जिखून ‘टीम इंडिया 2026’ म्हूण आपली सुवात मेळयली. ह्या पंगडांत सारस्वत विद्यालय, म्हापशें; मुष्टीफंड स्कूल, पणजी; आनी पोदार स्कूल, पारणें गोंय हांगाचे विद्यार्थी आसात. हातूंतले चडशे विद्यार्थी सरकारी अनुदानीत शाळांतले तशेंच मध्यमवर्गीय कुटुंबांतले आसात.
ह्या येसा विशीं उलयतना ‘स्टेम एज्युकेशन ट्रस्ट’चे संस्थापक गगन गोयल हांणी सांगलें, ‘एसईटी’ची थापणूक ज्या उद्देशान जाल्ली, ताचें एक व्हड देख (उदाहरण) म्हळ्यार ही टीम इंडिया. जिज्ञासा, कश्ट आनी व्हड सपनां पळोवपाचें धेर्य ह्या विद्यार्थ्यां कडेन आसा. हे विद्यार्थी फकत सर्तींत वांटो घेनात, तर परत येवन हेर विद्यार्थ्यांना शिकयतात, मार्गदर्शन करतात आनी उमेद हाडटात. तांकां आदार करप म्हळ्यार फुडारांतल्या एका व्हड चळवळींत केल्ली गुंतवणूक आसा.
पंगडाचे मार्गदर्शक अनय कामत हांणी सांगलें, ह्या विद्यार्थ्यांची उदरगत पळोवप खरोखरच उमेद हाडपी आसा. दर एका पांवड्यार तांणी नव्यो गजाली शिकल्यात आनी स्वता भितर सुदारणा केल्या. तांची निवड ही तांच्या कश्टांची योग्य दखल आसा. तांच्या ह्या प्रवासांतल्यान गोंय आनी भारतांतल्या, चड करून शिक्षक आनी पालकांच्या मार्गदर्शना खाला काम करपी साबार विद्यार्थ्यांच्या पंगडांक उमेद मेळटली, अशी म्हाका आस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
