डोंबिवलींतलो धुडगूस

भांगरभूंय | प्रतिनिधी

फुडारीच कायदो कित्याक हातांत घेतात? कारण राजकी फाटबळ आसा, अशें तांकां दिसता.

शक्तीचो खरो उपेग हो राखणे खातीर आसता. कोणाचे विचार वा कृती चिड्डुपा खातीर न्हय. दादागिरी करून भंय निर्माण जाता, पूण त्या मनशाक वा संघटणेक केन्नाच आदर मेळना, हें मतींत दवरूंक जाय. कायद्याक पाळो दिवप हे सगल्यांचें कर्तव्य. ताचे परस कोणूच व्हडलो न्हय. म्हणटकच विवेकान वाद जिखचे. दादागिरी करून न्हय. ती पराभवाची सुरवात. दुबळ्या मनाची शक्त दाखोवपाची ती निमणी धडपड. हालींच डोंबिवली (मुंबय) एका हाॅस्पिटलांत शिंदे सेनेच्या नगरसेवकान एके दोतोर बायलेचो फोन ओडून काडलो. दादलो दोतोराचेर थापट मारले. मागीर ताच्या 2- 3 वावुरप्यांनी त्या दोतोराक बरोच पेट दिलो. कितें तरी चुकलें म्हूण दोतोर, नर्सीक बडयले इतल्याचेरूच हो प्रकार सोंपना. तो राजकी संस्कृती, कायद्याचो भंय, भलायकी वेवस्था हांचेर व्हडलें प्रस्नचिन्न लायता. त्या नगरसेवकाक आतां अटक जाल्या. ताचें नगरसेवकपदूय रद्द जावंक जाय.
डोंबिवली म्हापालिकेचें हाॅस्पिटल भरिल्ल्यान चलयेक खाजगी हाॅस्पिटलांत व्हरपाक लायलें आनी हो वाद पेटलो. सांजवेळा 6 ते 9 मेरेन दुखीन वळवळत पडिल्ले चलयेचेर उपचार करूंक ना. ताका लागून घरच्यांनी नगरसेवकाक फोन केलो आनी फुडलो प्रकार घडलो. तो व्हिडियो फाटले दोन दीस सोशल मिडियाचेर भोंवत आसा. फक्त दोतोरूच न्हय, तर कर्मचारी, सुरक्षा रक्षकांचेरूय हल्लो जाल्ल्याचो आरोप जाला. भुरग्याचीं घरचीं म्हणटात, तें खरें आसल्यार दोतोरांचेरूय कारवाय जाय. बेड ना जाल्यार उपचार करपाक मेळनात? कोण चूक, कोण बरोबर तें तपासा उपरांत कळटलेंच. पूण कायदेशीर मार्ग आसतना, मारपेट करप खंयचेच परिस्थितींत योग्य न्हय. दोतोर, नर्सी, सरकारी अधिकारी, शिक्षक, पत्रकार, ड्रायव्हर आनी हेराचेर हल्ले जावपाच्यो घडणुको वाडत आसात. उपचाराक कळाव जाल्ल्यान घरचीं दोतोराच्या आंगार वचपाच्यो घडणुको गोंयांत पसून घडल्यात. मात डोंबिवलींत सिनेमांतलो हिरो येवचो, तसो एक लोकप्रतिनिधी येता आनी फायटींग करता, हें चुकीचें. हे फुडारी लोकांचे रक्षक काय भक्षक, तेंच कळना जालां. महाराष्ट्रांत, बिहार- युपींत असले प्रकार खूब जातात. सगलेच पेपरांचेर, सोशल मिडियांचेर येनात इतलेंच.
फुडारीच कायदो कित्याक हातांत घेतात? कारण राजकी फाटबळ आसा, अशें तांकां दिसता. तें चड करून आसताय बी. महाराष्ट्रांत मराठी उलय म्हूण वेपाऱ्यांक, वेवसायिकांक फोर्सार करून मारपेट करपाच्यो जायत्यो घडणुको घडल्यात. मात दोशींचेर कांयच कारवाय जावंक ना. म्हणटकच आतां सगलेच हिंसक जावंक लागल्यात. न्याय मेळपाक उशीर जाता म्हूण थोडे स्वता न्याय दिवपाचो यत्न करपाक लागल्यात. भौशीक जाग्यांचेर संयम सुटपाक लागला. हालींच मुंबय रेल्वेचें दार बंद केलें म्हूण वाद जावन एका 17- 18 वर्सांच्या चल्याक चाकवान जिवेशीं मारलो. कायदो हातांत घेवपाची मानसीकताय खूबच वाडल्या. विनवणी करून काम जायना म्हूण आमी कायदो हातांत घेतात, अशें हल्लो करपी सांगतात. मात लोकशाय वेवस्थेंत हें स्विकारपाक मेळना. लोकांच्यो समस्या, प्रस्न सोडोवपाक राजकी वावुरपी मुखार येतात, ही बरी गजाल. पूण मारपेट जातकच पुराय राजकी वेवस्थाच बदनाम जाता, ताचें कितें?
असल्या हल्ल्यांची सुनावणी जलदगती न्यायालयांत जावंक जाय. सुरक्षा कर्मचारी प्रशिक्षीत आसचे. दोतोरांचो दुयेंतींच्या घरच्यां कडेन स्पश्ट संवाद आसप गरजेचें. दोतोरांची चूक आसल्यार तांची रोखडीच चवकशी जावची. राजकी पक्षांनी आपल्या वावुरप्यांच्या नाकांत वेसण घाल्यार बरी. कायद्या वयलो विस्वास उणो जायत आसा. समाजांतली असहिश्णुतायूय वाडटा. राजकी फुडाऱ्यांचे वावुरपी तर चडूच थयथयाट करपाक लागल्यात. दरेक काम ते कायदो हातांत घेवनूच वा बेकायदेशीर पद्दतीन करपाक सोदतात. समाजा खातीर ही धोक्याची घांट म्हणची पडटली.