भांगरभूंय | प्रतिनिधी
घरगुती लायटी वयलीं उपकरणां इबाडलीं
भांगरभूंय । प्रतिनिधी
वाळपयः चवथी दिसा बुधवारा सांजे वेळार सत्तरींत व्हड प्रमाणांत पावस पडिल्लो. ह्या वेळार उच्च दाबाची वीज पुरवण जाल्ल्यान घरगुती लायटीचेर चलपी उपकरणांचें व्हड प्रमाणांत लुकसाण जाल्ल्याची म्हायती मेळ्ळ्या. सत्तरी म्हालांतल्या खूबशा वाठारांनी ही स्थिती उप्रासली. ताका लागून लोकांचें व्हड प्रमाणांत लुकसाण जालां. सरकारान हाची विशेश दखल घेवन लुकसाण भरपाय दिवची, अशी मागणी साबार लोकांनी केल्या.
मेळिल्ले म्हायती प्रमाण बुधवारा चवथी दिसा सांजे वेळार तस्तरींत व्हड प्रमाणांत गडगड मारून पावस आयलो. वादळी वाऱ्याक लागून झाडां पेडां पडलीं, कांय कडेन झाडांच्यो खांदयो पडल्यो. मजगतीं, 7 वरांच्या सुमाराक खूबशा गांवांनी उच्च दाबाची वीज पुरवण जाली. ताका लागून लायटीचेर चलपी विवीध घरगुतीं उपकरणांचें लुकसाण जालें. उच्च दाबाचे वीज पुरवणेक लागून अडवयच्या अनंतराव देसाय हांच्या घरांतलीं विजे वयलीं उपकरणां इबाडलीं. ताका लागून तांकां व्हड प्रमाणांत लुकसाण जालां. ह्या कुटुंबाची अर्थीक स्थिती बरी ना. ताका लागून ह्या कुटुंबाक फुडाराचो हुस्को सतायता. ह्या कुटुंबाच्या वांगड्यांनी दिल्ले म्हायती प्रमाण बुधवारा चवथी दिसा सांजे वेळार व्हड प्रमाणांत गडगड मारून पावसाक सुरवात जाली. हे मजगतीं, अचकीत विजे वयलीं उपकरणां लासपाक सुरवात जाली. हाका लागून घरांत भिरांतीचें वातावरण पातळ्ळें. वीज उपकरणांतल्यान व्हड व्हड आवाज आयकुपाक येवपाक लागले. ते उपरांत लायटीचे बटन लासले, बल्ब फुटले.
अर्थीक मजती खातीर यत्न करतलों: सरपंच
अडवय वाठारांत अचकीत विजेचो दाब वाडलो आनी अनंतराव देसाय हाका व्हड प्रमाणांत लुकसाण जालें. तेचवरी ह्या वाठारांतल्या खूबशा घरांतलीं विजे वयलीं उपकरणां पेड्डेर जालीं. हे संबंदांत थळावी आमदार डॉ. दिव्या राणे हांचे कडेन संपर्क करतलों. त्या कुटुंबाक अर्थीक मजत मेळची हे खातीर आपूण यत्न करतलों, अशें भिरोंडेंचे सरपंच उदयसिंग राणे हांणी प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
