मोपा विमानतळार गोंयच्या बायलां कर्मचार्‍यांचे छळाचे आरोप

भांगरभूंय | प्रतिनिधी

कामाचे स्वरूप सांगिनासतना बदली, एचआरा कडल्यान मेमो

पेडणें: मोपाच्या GMR Goa International Airport Limitedत कार्यरत आशिल्ल्या कांय गोंयच्या बायलां कर्मचार्‍यांचेर भायल्यान आयिल्ल्या कांय वेवस्थापकां कडल्यान मानसीक छळ जाल्ल्याचें गंभीर आरोप मुखार आयल्यात. वरीश्ठ अधिकार्‍यांच्या वयक्तीक सोयीं प्रमाण ड्युटीचेर हजर रावपाक लावप, न्हयकार दिल्यार मेमो दिवप, अचानक बदली करप वा नोकरी वगडावपाचो भंय दाखयता असो दावो संबंदीत कर्मचार्‍यांनी केला. ह्या प्रकाराक लागून विमानतळावेल्या कामकाजाच्या वातावरणा विशीं प्रस्न निर्माण जाला. कर्मचारी समाधानी नाशिल्ल्याचें वातावरण आशिल्ल्याचें सांगतात.
ह्या प्रकरणाक नवो ट्विस्ट आयला, कंपनीच्या Human Resources Operations विभागाचे वेवस्थापक राजेश शर्मा हांणी एका बायलां कर्मचार्‍याक Non-Reporting at New Work Location ह्या विशया खाला अधिकृत मेमो दिला. संबंदीत कर्मचार्‍यान नव्या कार्यस्थळार हाजीर रावंक नाशिल्ल्याचो आरोप ह्या मेमोंत केला, कंपनीच्या No Work No Pay धोरणाचो उल्लेख करीत फुडार्‍याक शिस्तभंगाची कारवाय करपाक शकना, अशीय शिटकावणी दिली.
मात, संबंदीत कर्मचार्‍यान हे कारवायेचेर आक्षेप घेतला. तिच्या म्हणण्या प्रमाण, २९ जून २०२६ तारखेर जारी केल्ल्या बदली आदेशांत फकत नवीन कार्यस्थळी रुजू जावपाचे निर्देश दिल्ले. मात, ते सुवातेर नेमकें खंयचें काम करपाचें, जापसालदार्‍यो कितें आसतल्यो, कामाचें स्वरूप, ड्युटीचीं वरां, वरीश्ठ अधिकारी कोण आसतलो वा कार्यपद्धती कितें आसतली, हे विशीं कसलीच स्पश्ट म्हायती आदेशांत दिवंक नाशिल्ली. अशे परिस्थितींत गरजेची म्हायती दिनासतना फकत हाजीर रावूंक नाशिल्ल्याचो थपको दिवन मेमो दिवप हो अन्याय आशिल्ल्याचो आरोप संबंदीत कर्मचार्‍यान केला.
ह्या प्रकरणाक लागून कर्मचारी संघटनांनीय चिंता उक्तायल्या. गोंयच्या कर्मचार्‍यां कडेन भेदभाव करतात काय, बायलां कर्मचार्‍यांचे कागाळी कडेन आडनदर जाता काय, तशेंच कामगार कायदे, सेवा अटी आनी सैमीक न्यायाचीं तत्वां पाळप जाता काय, हाची स्वतंत्र आनी निश्पक्ष चवकशी करपाची मागणी केल्या. बायलां कर्मचार्‍यांक सुरक्षीत, सन्मानजनक आनी भेदभावमुक्त कार्यस्थळ उपलब्ध करून दिवप ही दरेका नियोक्ताची जापसालदारी आशिल्ल्याचें संघटणांचें म्हणणें आसा.
कामगार क्षेत्रांतल्या तज्ञांच्या मतान, खंयच्याच कर्मचार्‍याची बदली करतना नव्या पदावेल्यो जपसालदार्‍यो, कामाचें स्वरूप, अहवाल दिवपाची पद्धत, ड्युटीचें वेळापत्रक आनी हेर सेवा अटी स्पश्टपणान लेखी स्वरूपांत दिवप गरजेचें आसता.हाका लागून फुडाराक गैरसमज, वाद वा शिस्तभंगाच्या कारवायांची शक्यताय उणी जाता आनी कर्मचार्‍याकूय आपल्या कर्तव्यांची स्पश्ट कल्पना मेळटा.
मजगतीं, ह्या सगल्या आरोपांविशीं GMR Goa International Airport Limited वा संबंदीत वेवस्थापनाची अधिकृत भुमिका अजूनय मुखार येवंक ना.
वेवस्थापना कडल्यान स्पष्टीकरण मेळ्ळे उपरांत ताकाय समान म्हत्व प्रसिद्ध करतले. हाका लागून ह्या प्रकरणांतल्या सगल्या गजालींची निश्पक्ष चवकशी जावन सत परिस्थिती मुखार येवपा कडेन कर्मचारी, संघटना आनी सामान्यांचें लक्ष लागलां.