भांगरभूंय | प्रतिनिधी
पणजी : गोंयचे न्यायवेवस्थेच्या आनी वकिलांच्या हिताचे नदरेन सामकी म्हत्वाची आशिल्ल्या ’स्वतंत्र बार काव्नसील’चे मागणेन आतां परत गती घेतल्या. पणजे बार काव्नसीलच्या केंद्रीय वांगड्यांच्या गोंय भेटी मजगतीं थळाव्या अधिवक्त्यां वांगडा (वकिलां वांगडा) जाल्ले एके विशेश बसकेंत ह्या विशयाचेर सामकी म्हत्वाची आनी सविस्तर चर्चा जाली. हाजीर आशिल्ल्या सगळ्यो ज्येश्ठ आनी तरणाट्या वकिलांनी गोंयां खातीर स्वतंत्र बार काव्नसील आसप ही काळाची गरज आसा, ही मागणी कायदेशीर नदरेन पुरायेन सारकी आनी गरजेची आशिल्ल्याचें मत ठामपणान उक्तायलां. हे बसकेक लागून फाटल्या कितल्याशाच वर्सां सावन प्रलंबीत आशिल्ल्या ह्या विशयाक आतां एक नवी दिका मेळपाची शक्यताय आसा. बसकेंत पार पडिल्ल्या चर्चासत्रांत हाजीर आशिल्ल्या मुद्यांचेर भारताचे डेप्युटी सॉलिसिटर जनरल प्रवीण फळदेसाय हांणी उजेड घालो.
खरें म्हळ्यार, बार काव्नसीलची वांगडी ऍड. पारिजात पांडेय हांची ही गोंय भेट मुखेलपणान कांय हेर प्रशासकीय विशयांचेर चर्चा करपा खातीर आनी एक सदित्सा भेट म्हणून आयोजीत केल्ली. मात हे बसकेक गोंयच्या सुमार ३० परस चड नामनेचे वकील हाजीर राविल्ल्यान, राज्याचे न्यायवेवस्थे कडेन संबंदीत ह्या मुखेल मुद्याचेर चर्चा सुरू जाली. सद्याचे स्थितींत गोंयचे वकील क्षेत्र ’बार काव्नसील ऑफ महाराष्ट्र आनी गोवा’ खाला कार्यरत आसा. विशेश म्हळ्यार, ह्या जो काव्नसीलान गोंयां खातीर स्वतंत्र बार काव्नसील आसचें, ह्या संदर्भांतलो थाराव ह्यान पयलींच एकमतान मंजूर केला. फकत इतलेंच न्हय तर गोंयच्या थळाव्या बार असोसिएशनानूय ह्या न्याय्य मागणेचो थाराव पयलींच पास करून आपलें स्पश्ट फाटबळ दाखयलां.
देशांतल्या दरेका राज्याची भौगोलीक, सामाजीक आनी सांस्कृतीक फाटभूंय वेगळी आशिल्ल्यान दरेका राज्याचें स्वताचें स्वतंत्र बार काव्नसील आसप गरजेचें मानतात. हाका लागून थळावीक वकिालांचे प्रस्न अदीक गतीन सुटपाक शकतात आनी प्रशासकीय कामांत सुटसुटीतपणा येता.
असो तर्कशुद्ध विचार करून गोंयच्योय मागण्यो पुरायेन योग्य आशिल्ल्याचें हे बसकेंत सांगलें. ही मागणी फाटल्या कितलयाशाच वर्सां सावन सेगीत करतात. गोंयच्या सगल्या वकील वर्गाची हीच भावना आसा. आतां फकत थारावा पुरतें मर्यादीत उरनासतना, येवपी काळांत ही मागणी बेगीनूच पुराय जावचे खातीर खंयची कायदेशीर पावलां उखलपाक जाय आनी कशे तरेन दिल्ली पातळेर हालचाली करच्यो. हाचेर असोसिएशन फुडली रणनीती थारतले. तरणाटी आनी कायदो क्षेत्रांतल्या अभ्यासकांचें ह्या घडामोडींकडेन विशेश लक्ष आशिल्ल्यान, येवपी दिसांनी ह्या पुराय प्रक्रियेक व्हड गती मेळपाची चिन्नां दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
