​प्रियोळ, सांगें, नुवें आनी केपें एसटी खातीर आरक्षीत जावपाची शक्यताय

भांगरभूंय | प्रतिनिधी

पणजी : प्रियोळ, सांगें, नुवें आनी केपें हे चार मतदारसंघ एसटीं खातीर आरक्षीत जावप शक्य आसा. हे मतदारसंघ राखीव जाल्यार समाजकल्याण खात्याचे मंत्री सुभाष फळदेसाय, आदले मंत्री आनी नुवेंचे आमदार अालेक्स सिक्वेरा, केपेंचे आमदार एल्टन डिकोस्ता, आदले मंत्री आनी आमदार चंद्रकांत कवळेंकार हांकां फटको बसतलो. एसटी आरक्षणाक लागून काय मंत्री, आमदारांक फटको बसता आशिल्ल्यान एसटी आरक्षणाच्या कार्यवाये विशी सरकारा मदी मतभेद आसा.

विधानसभा वेंचणूक लागी पाविल्ल्यान राजकी घडणुकांक नेट आयला. सगल्या पक्षांनी वेंचणुकेची तयारी सुरू केल्या. हे फाटभूंयेर एसटी आरक्षण लागू करपाचे मागणेन लेगीत नेट धरला. सभापती गणेश गांवकार, कला आनी संस्कृती खात्याचे मंत्री रमेश तवडकार, आमदार गोविंद गावडे, आदले मंत्री आनी उटाचे अध्यक्ष प्रकाश वेळीप हांच्यो बसका सुरूच आसा. हे वेंचणुकेत एसटी आरक्षण लागू जावचे अशें आमचे यत्न आसात. केंद्र सरकाराक हे विशी अधिसूचोवणी जारी करपाची गरज आसा. ही प्रक्रिया खंय पावल्या हे विशींची वासपूस मुख्यमंत्री डॉ. प्रमोद सावंत हांचे लागी आमी करीत आसा, अशी म्हायती कला आनी संस्कृती खात्याचे मंत्री रमेश तवडकार हांणी दिली.

हो विशय केंद्र सरकारच्या अखत्यारीत येता. अधिसूचोवणी जारी केल्या उपरांत खंयचे मतदारसंघ आरक्षीत करपाचे हाचो निर्णय केंद्रीय वेंचणूक आयोग घेतलो. राज्य सरकाराची कसलीच भुमिका ना, अशें मुख्यमंत्री डॉ. प्रमोद सावंत हांणी सांगलांं.

अनुसूचीत जमातींक (एसटी) राजकी आरक्षण मेळचे, अशी मागणी पयली सावन एसटी समाजाची आशिल्ली. केंद्र सरकारान गोंय एसटी आरक्षण विधेयक तयार करून ते संसदेत सादर केले. हे विधेयक संसदेत संमत जावन ताका राष्ट्रपतींनी मान्यताय दिल्या. हाका लागून गोंय एसटी आरक्षण कायदो आतां अस्तित्वांत आयला. मात ताची अधिसूचोवणी जारी जावंक नाशिल्ले कारणान येता ते वेंचणुकेत ताची कार्यवाय जावपा विशीं दुबावाची स्थिती आसा. 2011 उपरांत देशाची जनगणना जावंक ना. 2021 वर्सा कोविडाक लागून जनगणना जावपाक पावली ना. आतां जनगणनेचो पयलो पांवडो जाला. दुसरो पांवडो फुडले वर्सा जातलो. हो पांवडो जावचे पयली गोंय विधानसभेचो कार्यकाळ सोंपता. हाका लागून आरक्षण 2011च्या जनगणनेचेर आधारीत लागू करचे पडटले. 2011च्या जनगणनेचेर आरक्षण लागू करपाक लेगीत काय जाणांनी हरकत घेतल्या. 2011च्या जनगणनेचेर आरक्षण लागू करप शक्य आसा काय, ताचो कायदेशीर सल्लो घेवन केंद्र सरकार निर्णय घेतले. सॉलिसिटर जनरलां कडेन चर्चा करून निर्णय घेवपाचे उतर केंद्रीय गृहमंत्री अमीत शाह हांणी शिश्टमंडळाक दिला. मुख्यमंत्री डॉ. प्रमोद सावंत हांचे फुडारपणा खाला शिश्टमंडळान फाटल्या म्हयन्यांत दिल्लींत केंद्रीय गृहमंत्र्यांची भेट घेतिल्ली.

आरक्षणाची कार्यवाय जाली जाल्यार दरेकी मतदारसंघात दिग्गजांक फटको बसतलो. मगोचे अध्यक्ष दीपक ढवळीकार हे प्रियोळ मतदारसंघांतल्यान वेंचणूक लढोवपाक इत्सुक आसा. प्रियोळ राखीव जालो जाल्यार ते वेंचणूक लढोवपाक अपात्र थारतलें. नुवें मतदारसंघांतल्यान आमदार अालेक्स सिक्वेरा तशेंच लिंडन मोंतेरो हे वेंचणूक लढोवपाक इत्सुक आसा. नुवें राखीव जाल्यार हे दोग जाण अपात्र थारतलें. मिकी पाशेको हे लेगीत नुवें राखीव जाल्यार नुवें सावन वेंचणुकेक अपात्र थारतले. हे भायर केप्यां आमदार एल्टन डिकोस्ता आनी आदले मंत्री चंद्रकांत कवळेकार हांकां फटको बसतलो. सांग्यार मंत्री सुभाष फळदेसाय हांकाय वेंचणूक लडोवपाक मेळची ना.

नुवें एसटी खातीर आरक्षीत जालो जाल्यार हांव वेंचणूक लढोवपाक अपात्र थारतलो. हांव वेंचणूक लढोवपाक इत्सुक आसा. मात नुवें एसटी खातीर राखीव जाल्यार पक्षाच्या उमेदवाराक तेंको दिवपा पसून म्हाका हेर पर्याय ना, अशें आमदार अालेक्स सिक्वेरा हांणी म्हणला.

नुवें मतदारसंघांतल्यान हांव वेंचणूक लढोवपाक इत्सुक आसा. मात एसटी खातीर नुवें राखीव जालो जाल्यार वेंचणूक लढोवप म्हाका शक्य जावचे ना, अशें लिंडन मोंतेरो हांणी म्हणला.

हांव सेगीत मंत्री वा आमदार उरचो ना. सांगें मतदारसंघ राखीव जावपाक म्हजी कसलीच हरकत ना. आरक्षण घटने प्रमाण आशिल्ल्यान ते मान्य करचेच पडटले, अशें मंत्री सुभाष फळदेसाय हांणी म्हणला.