भांगरभूंय | प्रतिनिधी
के. सी. वेणुगोपाल आयज घेतले राजकी स्थितीचो नियाळ
काँग्रेसींत फूट कशीच पडची ना : माणिकराव ठाकरे
गिरीशाच्या आरोपाचेर भाजपाचीय प्रतिक्रिया ना
भांगरभूंय । प्रतिनिधी
पणजी : गोंयांत गोवा काँग्रेस पक्ष स्थापन जावपाच्या हालचालींक लागून राजकी मळार खवदळ निर्माण जाला आसलो तरी विधीमंडळ फुडारी युरी आलेमांव वा आदले अध्यक्ष अमीत पाटकार हांणी कसलीच प्रतिक्रिया दिवंक ना. आमदार, खासदारांनी मौन घेतलां आसलें तरी हो मतविभाजना खातीर भाजपाचो डाव आशिल्ल्याचो आरोप काँग्रेस पदाधिकारी करीत आसात. इतले मजगतीं, पक्षाचे राष्ट्रीय सरचिटणीस के. सी. वेणुगोपाल हे आयज बसका घेवन राजकी स्थितीचो नियाळ घेतले. येता ते वेंचणुके खातीर तयारी आनी रणनितीचें नियोजन बसकेंत जातलें. गोवा काँग्रेस पार्टी स्थापन जावपाच्या हालचालींक लागून आयचे बसके कडेन सगळ्यांच्यो नदरो लागल्यात.
गोवा फॉरवर्डाचे विजय सरदेसाय हांचे सयत कांय जाणांनी प्रतिक्रिया उक्तायल्या आसल्यो तरी आदले प्रदेश अध्यक्ष अमीत पाटकार, काँग्रेस विधीमंडळ फुडारी युरी आलेमांव हांणी जाहीरपणान प्रतिक्रिया दिवंक ना. भाजपान लेगीत गिरीशाच्या आरोपांचेर जाप दिवंक ना.
काँग्रेसीचे राष्ट्रीय सरचिटणीस के. सी. वेणुगोपाल हांच्या फुडारपणा खाला आयज जावपी बसका वादळी थारतली. हातूंत गोवा काँग्रेस पक्षाच्या विशयाचेर चर्चा जावपाची आस्त आसा.
विरोधकांच्या मतांचें विभाजन करून भाजपाक अप्रत्यक्ष मजत करपाचो हेत नव्या पक्षा फाटल्यान आसा. गोंयांत काँग्रेस पक्ष एकसंध आसून खंयचेच स्थितीन पक्षांत फूट पडची ना. कोणाकूय काँग्रेस पक्षांत प्रवेश करपाचो आसत जाल्यार ताका पक्ष येवकार दिता, अशें पक्षाचे प्रभारी माणिकराव ठाकरे हांणी म्हणलां.
पक्षाचे राष्ट्रीय सरचिटणीस के. सी. वेणुगोपाल हे एकसारके गोंयांत येनात. गोंयांत आतां विभानसभा वेंचणूक जावपाची आसा. गोंयाक भेट दिवन राष्ट्रीय सरचिटणीस के. सी. वेणुगोपाल हे वेंचणुकेच्या तयारीचो नियाळ घेतात. तांची गोंय भेट आनी बसका पूर्वनियोजित आसा. नव्या पक्षाचो हे भेटी कडेन संबंद ना, अशें प्रदेश काँग्रेस अध्यक्ष गिरीश चोडणकार हांणी सांगलां. मतांचे ध्रुवीकरण जावपा खातीर गोवा काँग्रेस पार्टी हें भाजपान रचिल्ले कथानक आसा, असो आरोप उपाध्यक्ष तुलियो डिसोझा हांणी केला.
धर्मनिरपेक्ष मतांचें विभाजन जावपा खातीर एक नवो पक्ष स्थापन करपाचो भाजपाचो डाव आसा. हाचे खातीर 100 कोटींची तजवीज केल्याचो आरोप प्रदेश काँग्रेस अध्यक्ष गिरीश चोडणकार हांणी फाटले सप्तकांत केल्लो. गिरीश चोडणकार हांची बौद्धीक तपासणी जावपाक जाय, अशी जाप भाजपाचे आदले आमदार सिद्धार्थ कुंकळ्येकार हांणी दिल्ली. हाचे उपरांत भाजपाचे म्हणयारे सिद्धेश नायक हांणी लेगीत हे आरोप भायर मारिल्ले. हे आरोप प्रत्यारोप जाले उपरांत गोवा काँग्रेस पक्ष ह्या नव्या पक्षा विशीं हरकती आपोवपी नोटीस जारी जाल्या.
गोंयांतली कायदो सुवेवस्था इबाडिल्ल्याची कागाळ काँग्रेसीन राज्यपालां कडेन केल्ली. फिक्स यूवर्स फर्स्ट, ऑर्डर इज कॉलेप्सींग विदीन, अशी प्रतिक्रिया आदले खासदार अॅड. नरेंद्र सावयकार हांणी उक्तायल्या. मुख्यमंत्री डॉ. प्रमोद सावंत वा प्रदेश भाजप अध्यक्ष दामू नायक हांचे कडेन संपर्क सादलो आसता तांणी प्रतिसाद दिवंक ना. गोवा प्रदेश काँग्रेस पक्षाचो अध्यक्ष म्हणून जे मनशाक हाडला, ताका लागून काँग्रेसीचे लोक बेजार जाल्यात. ह्या बेजारसावणेंतल्यान हो पक्ष स्थापन जाता. ज्या मनशाक कसलोच मान ना ताका घेवन वेंचणुकेक वचप शक्य जावचें ना, अशें फुडाऱ्यांक सांगलें. तरी वडील फुडाऱ्यांनी हे आयकूंक नाशिल्ल्यान आतां नवो पक्ष स्थापन जाता, अशें नव्या पक्षा विशीं उलयतना फादर एरमितो रिबेलो हांणी म्हणलां. मात हाच्या फाटल्यान भाजपाचो हात आशिल्याचो दुबाव तांणी न्हयकारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
