वेंचणुके आदीं एकतरी पक्ष जल्माक येताच

भांगरभूंय | प्रतिनिधी

पणजी : विधानसभा वेंचणूक लागीं पावता तसतशें राजकी वातावरण तापपाक लागलां. बसको तशेंच राष्ट्रीय फुडाऱ्यांच्यो भेटी वाडत आसतना ‘गोवा काँग्रेस पार्टी’ हो नवो पक्ष स्थापन करपाच्यो हालचाली सुरू जाल्यात. हाचे पयलीं जाल्ल्या विधानसभा वेंचणुकां आदीं एकतरी नवो पक्ष जल्माक आयलाच. ह्या पक्षान एक, दोन जागे जिखून मुखेल पक्षांक मार लेगीत दिला. हे फाटभुंयेर आतां ‘गोवा काँग्रेस पार्टी’ स्थापन जावपाच्यो हालचाली चालू आसात.

फाटले वेंचणुके पयलीं आरजीची स्थापना जाली. आरजीक एकूच सांत आंद्रेची जागा मेळोवपाक येस आयलें, मात हेर खूबशा मतदारसंघांनी मतां घेवन तांणी काँग्रेसीक मार दिलो. हे भायर 2022चे वेंचणुकेंत तृणमुल काँग्रेसीन लेगीत मगो कडेन युती करून वेंचणूक लडयल्ली. तृणमूलाक एकूय जागो मेळ्ळो ना. 2017चे वेंचणुके पयलीं गोवा फॉरवर्ड पक्षाची स्थापना जाली. ह्या पक्षाचे 3 उमेदवार वेंचून आयले. तशेंच 2017चे वेंचणुकेंत आम आदमी पक्षान उमेदवार उबे केल्ले. पयलेच खेपे 2017ची विधानसभा वेंचणूक आपान लडयल्ली. आपाक जागे मेळ्ळे ना, मात कांय मतदारसंघांनी तांणी बरीं मतां घेतलीं. 2012चे विधानसभा वेंचणुके पयलीं मिकी पाशेको हांणी गोवा विकास पक्ष पुनर्जिवीत केलो. नुवें आनी बाणावली ह्या दोन जाग्यांचेर गोवा विकास पक्षान जैत मेळयलें. 2007चे विधानसभा वेंचणुके पयलीं चर्चिल आलेमांव हांणी सेव्ह गोवा फ्रंट पक्षाची स्थापना केली. मोपा विमानतळाक विरोध करपाच्या हेतान ह्या पक्षाची स्थापना जाल्ली. चर्चिल आलेमांव (नावेली) आनी आलेक्स रेजिनाल्ड (कुडटरी) ह्या दोन जाग्यांचेर सेव्ह गोवा फ्रंटान जैत मेळयलें.

2002चे विधानसभा वेंचणुकेंत युगोडेपा पक्ष पुनर्जिवीत जावन ताणें 3 मतदारसंघांत जैत मेळयलें. ताळगांव (बाबूश मोन्सेरात), कुठ्ठाळी (माथानी साल्ढाणा) आनी बाणावली (मिकी पाशेको) हे युगोडेपा उमेदवारीचेर जैतिवंत जाले.

1999चे विधानसभा वेंचणुकेंत गोवा राजीव काँग्रेस हो नवो पक्ष आशिल्लो. डॉ. विल्फ्रेड डिसोझा (साळगांव) आनी फ्रान्सीस डिसोझा (म्हापशें) हे दोन उमेदवार जैतिवंत जाले. उपरांत डॉ. विली हांणी राष्ट्रवादी काँग्रेसींत हो पक्ष विलीन केलो. 1994चे वेंचणुके पयलीं चर्चिल आलेमांव हांच्या युगोडेपा पक्षान वेंचणूक लडोवन 3 जाग्यांचेर जैत मेळयलें.

वेंचणुके पयलीं नवो पक्ष तयार जावन ताणें वेंचणूक लडोवप ही गजाल गोंया खातीर नवी ना. काँग्रेसीचें नांव आशिल्ले लेगीत खूबशे पक्ष स्थापन जाल्यात. 1980 उपरांत सर्गेस्त डॉ. विल्फ्रेड डिसोझा हांणी गोवा काँग्रेस पक्ष स्थापन केल्लो. ह्या पक्षान 1984ची विधानसभा वेंचणूक लडयल्ली. हाचे उपरांत 1998 वर्सा डॉ. विली हांणी गोवा राजीव काँग्रेस पक्षाची स्थापना केली. राजीव काँग्रेसीन 1999ची विधानसभा वेंचणूक लडयल्या.