भांगरभूंय | प्रतिनिधी
सहकारी सोसायटी दुरुस्ती सयत स्टँम्प कायदो दुरुस्ती अध्यादेशाक मान्यताय
पणजी : राज्यपालांनी मान्यताय दिले उपरांत सहकारी सोसायटी दुरुस्ती आनी स्टँम्प कायदो दुरुस्ती अध्यादेशाची अधिसूचोवणी जारी जाल्ल्यान म्हजो फ्लॅट येवजणेजो मार्ग मेकळो जाला. फाटल्या सप्तकांत मंत्रीमंडळान येवजणे सयत दोनूय अध्यादेशांक मान्यताय दिल्ली.
फ्लॅट नांवार करपा खातीर सरकारान कायद्यांत दुरुस्ती करपी अध्यादेशाक मान्यताय दिल्या.
सहकार कायदो दुरुस्ती अध्यादेशातले मुखेल मुद्दे :
– नोंदणीकृत सहकारी घरनिर्माण सोसायटींक डेव्हलोपराची मान्यताय घेनासतना जमनीच्या मालकी हक्का विशीं कबलांत (युनीलेटरल डीम्ड कन्वेयस ऑफ लँड टायटल) करप शक्य जातलें. हाचे खातीर सरकार खासा अधिकारी नियुक्त करतलें
– रेरा कायदो जावचे पयली म्हणल्यार 2016 पयली फ्लॅट विकते घेतिल्ल्यांक कायदेशीर रितीन सेल डीडाच्या आदारान घरनिर्माण सोसायटी स्थापन करप शक्य जातलें
– युनिलेटरल डीम्ड कन्वेयंसच्या नोंदणी खातीर शुल्क 10 हजारा मेरेन मर्यादित आसतलें
– डेव्हलोपर वा बिल्डरान डीम्ड कन्वेयन्स प्रक्रियेक आडखळ हाडली जाल्यार ताका 10 लाखा मेरेन दंड घालपाची तजवीज आसा.
– सहकारी सोसायटीच्या संचालकाक ताबो घेवपाच्या 15 दिसां भितर वर्सुकी रिटन्स फारीक केल्ल्याचो तपशील तशेंच हेर बँके कडले वेव्हार हांचो तपशील दिवप बंधनकारक आसा. हाचे खातीर कायद्याच्या कलम 59 मदी दुरूस्ती केल्या.
-संचालक म्हूण वेंचून येतकीर 6 म्हयन्या भितर सप्तकाचे सहकार वेवस्थापन प्रशिक्षण घेवप बंदनकारक
– अर्थीक वर्साच्या 3 म्हयन्या पयली साबार बसका जाली ना वा लेखा परिक्षण अहवाल साबार बसकेंत सादर जालो ना वा कलम 32 खाला म्हायती दिली ना जाल्यार संचालक मंडळ बरखास्त करपाचे अधिकार सहकार निबंधकांक आसा.
– सहकारी सोसायटीच्या नव्या कर्मचाऱ्यांक 6 म्हयन्याचो सहकारी प्रशिक्षण अभ्यासक्रम बंधनकारक
– पोरण्या घरनिर्माण सोसायटीची दुरूस्ती, नूतनीकरण वा मोडून परत बांदपाची तजवीज. इमारत पाडल्या उपरांत फ्लॅटधारकांक रावपाची पर्यायी वेवस्था करप बंदनकारक
सहारा प्राधिकरणाची स्थापना
सोसायटी अॅडवायजीर हार्मोनी अॅन्ड रिड्रेसल अॅथोरिटी (सहारा) प्राधिकरणाची स्थापना जातली. हे प्राधिकरणाचेर साहायक निबंधकाच्या पांवड्यावेल्या अधिकाऱ्याची नेमणूक जातली. घरनिर्माण सोसायटी स्थापन करपा विशीं वाद वा हेर कागाळी आसल्यार त्यो सहारा प्राधिकरणा कडेन दिवच्यो पडटल्यो. खास वाद वा कागाळी सुटाव्यो करपाची जापसालदारी प्राधिकरणाची आसतली.
स्टँम्प कायदो दुरूस्ती अध्यादेशा वरवीं फ्लॅट वा घरनिर्माण सोसायटी खातीर स्टॅम्प ड्युटी निश्चीत केल्या. अ, ब आनी क गटात येवपी पालिका/पंचायतींची वळेरी अधिसूचोवणेत दिल्या.
– दर्यादेग पंचायत तशेंच पणजे म्हापालिका आनी म्हापशें, मडगांव, फोंडें आनी वास्को नगरपालिका वाठारांचो अ गटांत आस्पाव केला. रहिवाशी फ्लॅट/ सोसायटी खातीर 50 हजार, वेवसायीक आस्थापना खातीर 1 लाख आनी हेर खातीर (अँसीलरी/अॅमीनीटी) 10 हजार रूपया स्टँम्प ड्युटी आसतली.
– अधिसूचीत पंचायती तशेंच अ गटांत नाशिल्ल्यो नगरपालिका ब गटात आसा. रहिवाशी फ्लॅट/ सोसायटी खातीर 40 हजार, वेवसायीक आस्थापना खातीर 80 हजार आनी हेर खातीर (अँसीलरी/अॅमीनीटी) 7 हजार 500 रूपया स्टँम्प ड्युटी आसतली.
– दर्यादेग वाठार सोडून सगळ्यो पंचायती क गटात येतात. रहिवाशी फ्लॅट/ सोसायटी खातीर 30 हजार, वेवसायीक आस्थापना खातीर 50 हजार आनी हेर खातीर (अँसीलरी/अॅमीनीटी) 5 हजार रूपया स्टँम्प ड्युटी आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
