भांगरभूंय | प्रतिनिधी
पणजीः राज्य सरकारान पंढरपूरांतल्या विठ्ठल रखुमाई भवना खातीर प्लॉट मेळोवपाची प्रक्रिया सुरू केल्या. हे भवन देवळा पासून फकत देड ते 2 किमी अंतराचेर आसतले. फुडल्या पंढरपूर वारी पयलीं ह्या भवनाचें बांदकाम पुराय जातलें अशी म्हायती मुख्यमंत्री डॉ. प्रमोद सावंत हांणी दिली. सोमारा वारकारी दिंडी येवजणेच्या अनुदान वितरण कार्यावळींत ते उलयताले. कला आनी संस्कृती मंत्री रमेश तवडकार, खासदार सदानंद शेट तानावडे, खात्याचे संचालक नितीन नायक, बाबू कवळेकार ह्या वेळार हाजीर आशिल्ले.
पंढरपूरांतल्या भवनाक विठ्ठल रखूमाई वा गोंय पंढरपूर भवन अशें नांव दितले अशें मुख्यमंत्र्यान सांगलें. हे संबंदी निमाणो निर्णय हांगाच्या वारकारी पंगडांनी घेवपाचो आसा. भवना खातीर 2 हजार चौखण मिटर जमीन निश्चीत केल्या. हे वारी पयलीं प्लॉट मेळोवपाची प्रक्रिया पुराय जावपाची शक्यताय आसा. तर फुडल्या वर्साच्या वारीच्या आदीं ह्या भवनाचें उक्तावण जातलें. मागीर मुख्यमंत्री म्हूण हांव देवा कडेन मागणें करतलों की त्या भवनाचें उक्तावण करपाची आनीक एक संद मेळची.
ताणें म्हणलें, गोंयांत वारीची परंपरा पुर्तुगेज सत्ते पयलीं सावन चलता. जायते भक्त येवन 12 ते 14 दीस चलत पंढरपूराक वतात. वारकरी पंगडांनी आमचे कडेन कसलीच मजत मागूंक नाशिल्ली. पूण ही येवजण आमी आमच्या फुडाकारान सुरू केल्या. हे येवजणे खाला चाळीसा परस चड वारकरी आशिल्ल्या पंगडांक एक ते पांच लाख रुपया अर्थीक मजत दितात. अंदूं राज्यभरांतल्या 36 पंगडांनी नोंदणी केल्या. हातूंत 3500 परस चड वारकारींचो आस्पाव जाता. येवजणे खाला दिल्लें अर्थीक मजत दोन दिसां भितर पंगडांच्या बँक खात्यांत जमा जातली.
सरकार फुडल्या वर्सा अयोध्या यात्रेची येवजण सुरू करपाचो विचार करता. साठ वर्सां वयर पिरायेच्या नागरिकांक हे येवजणेचो लाव मेळटलो. अयोध्येतल्या गोंय राम निवासां खातीर जमीन मेळयल्या. हांगा रावपाची वेवस्था नाममात्र शुल्काचेर करतले अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
