भांगरभूंय | प्रतिनिधी
अयोध्येच्या श्रीराम मंदिरांत भक्तांनी अर्पण केल्ल्या रोख रकमेच्या, भांगरा- रुप्याच्या वस्तींच्या आनी हेर मोलाच्या वस्तूंच्या कथित अपहाराक लागून देशभर व्हड खवदळ जाला. हें प्रकरण फक्त चोरयेचें न्हय, तर मंदिरांतले देणगी वेवस्थेंतले त्रुटी आनी देखरेखीचेरुय प्रस्नचिन्ह निर्माण करपी थारलां.
उत्तर प्रदेश सरकारान नेमिल्ल्या विशेश तपास पथकाच्या (SIT) मुळाव्या अहवाला उपरांत श्रीराम जन्मभूमी तीर्थ क्षेत्र ट्रस्टाच्या वांगड्यांनी पुलिसांत कागाळ दाखल केली. मागीर आठ जाणांचेर गुन्यांव नोंद केलो आनी सगल्यांक अटक केली. हे सगले देवळांतल्यो फंड पेटयो उगडप, रोख रक्कम आनी वस्ती मेजप वा ते प्रक्रिये कडेन संबंदीत कामांत वांटेकार आशिल्ले. पुलिसांनी चोरी, विस्वासघात, अपहार आनी गुन्यांवकारी कट संबंदी कलमां लायल्यात.
साडेसात कोटींचो अपहार?
सुरवातेक सुमार 7 ते 7.5 कोटी रुपयांच्या गैरवेव्हाराची चर्चा जाली. मात, तपास यंत्रणांनी अजून इतले रकमेचो अधिकृत दावो केल्लो ना. आतां मेरेन वेगवेगळ्या दुबावितां कडल्यान मेळून सुमार 77 लाखांची रोकड, भांगर, रुपें, परदेशी चलन आनी हेर मोलाच्यो वस्तू जप्त केल्यात. ताका लागून तपास अजूनय चालू आसा आनी निमणो आंकडो वाडपाची शक्यताय तपास यंत्रणा न्हयकारनात.
तपासांत मुखार आयिल्ले म्हायती प्रमाण, दुबावीत फंड पेटयांतली कांय रोकड मेजणेच्या वेळार कुशीक काडटाले. ती देवूळ वाठारांतल्या संडस, बाथरुमांत वा सीसीटीव्हीच्या नदरे पसून पयस आशिल्ल्या जाग्यार लिपयली आसतली. उपरांत ती थोड्या- थोड्या प्रमाणांत भायर व्हरताले, जेणेंकरून दुबाव येवचो न्हय. पुलीस आतां दुबावितांच्या बँक खात्यांची, घरच्या, नात्यांतल्या सोयऱ्यांच्या खात्यांची तशेंच हालींच्या काळांत विकत घेतिल्ले मालमत्तेची आनी गाडयांची चवकशी करतात. कांय दुबावितांनी चोरयेच्या पयशांतल्यान जमीन, गाडयो आनी हेर मालमत्ता विकत घेतिल्ल्याचो दुबाव तपासांत व्यक्त केला; मात ताचे विशीं निमणें निश्कर्श अजून आयिल्ले नात.
लाखांनी, कोटींनी देणग्यो
हें प्रकरण उक्तडार कशें आयलें? देवळांतल्या देणग्यांच्यो नोंदी आनी प्रत्यक्ष जमा जावपी रक्कम हांचे मदीं तफावत मेळिल्ल्यान ट्रस्टान सरकारा कडे चवकशेची मागणी केली. उपरांत सरकारान एसआयटी नेमली. मुळाव्या अहवालांत गंभीर अनियमितताय मेळ्ळे उपरांत गुन्यांव दाखल केलो. आता ही चवकशी अयोध्या पुलीस आनी विशेश तपास पंगड जोडपालवान करतात. राममंदिरांत दर दिसा लाखांनी रुपयांची देणगी येता. विशेश सण, रामनम, दिवाळी वा प्राणप्रतिश्ठापना सारक्या सुवाळ्या वेळार हो आंकडो कितल्याशाच कोटी रुपयां मेरेन पावता. रोख रक्कम फंड पेटयांतल्यान काडले उपरांत मेजणी करून बँकेत जमा करतात. भांगराच्यो वस्ती आनी मोलाच्यो वस्तू ट्रस्टाचे सुरक्षित तिजोरेंत दवरतात आनी तांची वेगळी नोंद करतात. हेच प्रक्रियेंत कथित गैरवेव्हार जाल्ल्याचो आरोप आसा.
अटक केल्ले दुबावीत
अटक केल्ल्या दुबावितांचीं नांवां – रमाशंकर यादव उर्फ टिन्नू (चंपत राय हांचो ड्रायव्हर आनी लागींचो वांगडी), मनीष यादव (रमाशंकर यादव हांचो पुतणयो), लवकुश मिश्र, अनुकल्प मिश्र, अविनाश शुक्ल, करुणेश पांडे, रामशंकर मिश्र आनी सुभाष चंद्र श्रीवास्तव (निवृत्त बँक कर्मचारी, हो पयशे मेजतालो.) चंपत राय हे राष्ट्रीय स्वयंसेवक संघाचे म्हालगडे फुडारी आनी विश्व हिंदू परिषदेचे आंतरराष्ट्रीय उपाध्यक्ष आसात.
रामलल्ला पांचशें वर्सां उक्त्यार
ह्या प्रकरणाचे फांटभूंयेर जायते जाण ‘रामल्ला 500 वर्सां उकते जागेर आशिल्लो’ अशें म्हणटात. हें वाक्य इतिहासिक संदर्भांत वापरतात. कांय इतिहासकारांच्या मता प्रमाण, अयोध्येतली मूळ रामजन्मभूमी मंदिर उडोवन 16 व्या शेंकड्यांत थंय मशीद बांदिल्ली. 1949 वर्सा रामलल्लाची (बाळक राम) मूर्ती त्या जाग्यार प्रकट जाल्ले उपरांत न्यायालयीन प्रक्रिया सुरू जाली. 6 डिसेंबर 1992 दिसा ‘बाबरी ढाँचा’ विवीध हिंदु संघटना, पक्षाच्या करसेवकांनी उडयलो. ताचे उपरांत जायतीं वर्सां रामलल्लाची मूर्ती तात्पुरत्या मंडपांत दवरिल्ली. 2019 वर्सा सर्वोच्च न्यायालयाच्या निकाला उपरांत नव्या देवळाच्या बांदकामाक सुरुवात जाली आनी जानेवारी 2024 वर्सा प्राणप्रतिश्ठापना जाली. ताका लागून ‘500 वर्सां उकत्यार’ हो शब्दप्रयोग प्रत्यक्ष अर्थान न्हय, तर लांब काळ व्हड मंदिर नाशिल्ले भावनेंतल्यान वापरतात. इतिहासांत जायत्या आक्रमकांनी देवळां लुटलीं, पूण सध्याचो देणगी अपहार हो पूर्णपणान वेगळो आनी आधुनिक काळांतलो कथित अर्थिक गैरवेव्हाराचो विशय आसा.
ह्या प्रकरणाक लागून फक्त अर्थिक गैरवेव्हाराचो मुद्दा मुखार आयलो ना, तर देशांतल्या व्हड धर्मीक संस्थांनी देणगी वेवस्थापन चड पारदर्शक, तंत्रज्ञानाधारित आनी भोवपदरी लेखा परिक्षणा खाला आसचें, अशी मागणीय नेट धरपाक लागल्या. ह्या अयोध्या राममंदिर प्रकरणांतलें निमणें सत्य न्यायालयीन प्रक्रिया आनी तपास पूर्ण जाल्या उपरांतच स्पश्ट जातलें.
ज्ञानदीप पोतेकार
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
