बेशिस्त ड्रायव्हराक एआयचो मार

भांगरभूंय | प्रतिनिधी

एआय प्रणालींत चूक जावंक फावना. नाजाल्यार भलत्याकूच गरजे भायर तालांव फारीक करचो पडटलो.

यूग तंत्रज्ञानाचें म्हणटकच, कोणेंय नाक मुड्डिलें तरीय तंत्रज्ञान शिकून घेवचेंच पडटलें. शिकना तो शेणलो. विज्ञान- तंत्रज्ञानाचो गैरवापर करपीय करोडांनी लोक संवसारांत आसात. तरीय ह्या तंत्रज्ञानान आमचें जिवीत ल्हव केलां, हें मानून घेवचेंच पडटलें. तंत्रज्ञान हें मनशा खातीर आसता, मनीस ताचे खातीर न्हय. आतां गोंयांत 15 जुलयाच्यान एआयचेर चलपी कॅमेऱ्यां वरवीं तालांव दितले. येवकार. कॅमेरा आशिल्ल्या सिग्नलांचे जागेय फाटीं जाहीर केल्ले. खरें म्हणल्यार ते करपाक जायनाशिल्ले. कारण आमच्या गोंयांतल्या अपघातांचो आंकडो पळयल्यार ड्रोनां वरवीं सगल्याच रस्त्यांचेर कॅमेऱ्याची नदर जाय. 4 जुलयाक खंय 56,536 जाणांनी नेम मोडिल्ल्याचें कॅमेऱ्यांत दिसलें. कायदो मोडपी हजारांनी गोंयकार आसात तर? आॅगस्टांतल्यान अपघात उणें जावपाक लागतले, अशी आस्त बाळगुपाची?
राज्यांत एआयचेर वा टायमराचेर चलपी सिग्नलां आसात. कांय जाग्यांचेर वर्स जालें तरी तीं सुरू करूंक नात. हाचे फाटलें कारण कळना. घडये सुरळीत चलपी येरादारीक आडमेळीं बी येत, असो यंत्रणेक दुबाव आसतलो. एआय सिग्नल येरादारी चड कार्यक्षम करतात. मात ताची जतनाय घेवपीय तितलेच कुशळ जाय. मोडिल्लें सिग्नल दुरुस्त करपाक चार दीस लागूंक फावना. सिग्नल तोडप, हेल्मॅट- सीट बेल्ट घालप ना, झेब्रा क्राॅसींग हुपप हें कॅमेऱ्यांत रोखडेंच नोंद जाता. मागीर मोबायलाचेर 500 रुपया तालांव. (लोक तो भरिनात. कारण तांकां ते फेक लिंक दिसता. तालांवाची रक्कम वाडटा, समन्स येतात. अर्थांत सात- आठ तालांव पसून भरिनासतना रावपी लोक आसात. हो चमत्कार ते कशे करतात काय?) एआय चलनाक लागून भ्रश्टाचाराचें प्रमाण देंवलां अशें म्हणटात. हे यंत्रणेक लागून रस्त्यांचेर कितल्यो गाडयो आसात, ताची माहिती मेळटा. म्हणटकच फुडाराक येरादारीचें नियोजन करप शक्य जाता.
एआय सिग्नलांचें तोटेय आसात. कारण, तांकां परिस्थिती समजना. झेब्रा क्राॅसिंगाचेर गाडी एक इंच पसून मुखार गेली जाल्यार तालांव पडटा. ड्रायव्हर नेम मोडपा खातिरूच मुखार वचना. पूण हें एआयक कशें कळटलें? कांय सिग्नलांचेर 90 ते 120 सेकंद रावचें पडटा. पूण आडव्या रस्त्या वयल्यान 30 सेकंदा उपरांत एकूय गाडी वचना. हाका लागून इंधनाचो खर्च, प्रदुशण वाडटा, ड्रायव्हर तिडकता. खरें म्हणल्यार स्मार्ट सिग्नलांनी कितल्यो गाडयो आसात, नात तें पळोवन आपशीच वेळ बदलपाक जाय. नाजाल्यार लोक मागीर तो टायमराचेर चलपी सिग्नल असो दुबाव घेतात. फक्त तालांव दिवपा खातीर सिग्नल काय सुरक्षीत येरादारी आनी ड्रायव्हरांक शिस्त लागपाक, तें पयलीं थारावचें पडटलें. एआय प्रणालींत चूक जावंक फावना. नाजाल्यार भलत्याकूच गरजे भायर तालांव फारीक करचो पडटलो. बरेच ड्रायव्हर मस्ती करतात तशे एआय कॅमेरेय मस्ती करचे नात, हें पळोवपाची जापसालदारकी येरादारी खात्याची. सगलें वजें एआय बसोवपी, सांबाळपी कंपनीच्या माथ्यार दिवचें न्हय.
दुसरी गजाल, मोटारसायकल पायलटांची. तांकां अॅप वापरूंक सांगलां. पूण ताची सक्ती करूंक ना. पायलट सेवा ही पुर्तुगेज काळा सावन आसा. तांणी गैरप्रकार केल्ल्याच्यो कागाळी नात. मात खाजगी दुचाकी घेवन कांय लोक गुपचूप भाडीं मारतात, तें चुकीचें. हातूंत सरकारी कर्मचारीय आसात खंय. खाजगी दुचाकीन भाडीं मारतना दिसल्यार ती जप्त करपाची शिटकावणी सरकारान दिल्या. बरी गजाल. पायलटांक आतां इलेक्ट्रीक दुचाकी घेवपाक अनुदान मेळटलें. पूण पायलटांचो आंकडो देंवत आसा, ही खंतीची गजाल. ही सेवा म्हणल्यार गोंयची वळख. ती वाडोवपाचोय यत्न करचो. स्मार्ट येरादारीचे दिशेन आमी पावल उबारलां खरें, पूण सगल्यांक समान कायदो आनी प्रवाशांक सुविधा हाची संतुळा राखल्यारूच तिका यश मेळटलें.