भांगरभूंय | प्रतिनिधी
भारतीय संस्कृतायेंत सूर्याक खूब म्हत्व आसा. मळबांतलो एक तेजस्वी गिरो म्हळ्यार सूर्य; तो जिविताचो उगम, ऊर्जा, आरोग्य आनी चेतनेचो मूळ स्त्रोत आसा. पोरण्या काळा सावन सूर्योपासना हो भारतीय जिवीत पद्धतीचो एक अविभाज्य भाग आसा. हेच परंपरेंतल्यान रथसप्तमी आनी त्याच दिसा मनयिल्लो ‘जागतीक सूर्यनमस्कार दीस’ ही संकल्पना मुखार आयल्या. माघ शुद्ध सप्तमी 25 जानेवारीक, म्हणजेच सूर्य उत्तरायण जावन चड तेजस्वी जाता त्या दिसा, सूर्यनमस्काराच्या माध्यमांतल्यान मनीस आनी निसर्ग हांचे मदलो संबंद चड घट करपाचो हो पवित्र दीस मनयतात.
सूर्यनमस्कार ही योगासनांची एक मालिका आसून ती एक पुराय शारीरीक, मानसीक आनी आध्यात्मीक साधना आसा. सूर्यनमस्काराच्या बारा पांवड्यांचो परिणाम मनशाच्या कुडींतल्या सुमार सगल्या स्नायूंचेर, सांध्यांचेर आनी भितरल्या अवयवांचेर जाता. नेमान सूर्यनमस्कार केल्यार कूड घटमूट उरता, मन शांत जाता आनी आत्मविश्वास वाडटा. देखूनच जागतीक सूर्यनमस्कार दिसाचो उद्देश फक्त योगाभ्यासा पुरतो मर्यादीत उरनासतना, तो भलायकी जागृताय, आत्मशिस्त आनी जिवीतपद्धत (lifestyle) सुदारपा कडेन जोडिल्लो आसा.
आयच्या धांवपळीच्या जिवितांत मनीस आपल्या आरोग्या कडेन दुर्लक्ष करता. ताण (stress), असंतुलीत आहार, व्यायामाचो उणाव हाका लागून जायते रोग वाडत आसात. अशा वेळार सूर्यनमस्कार हो एक सोंपो, स्वस्त आनी प्रभावी उपाय थारता. खंयच्याय पिरायेचो मनीस आपल्या ताकती प्रमाण सूर्यनमस्कार करूंक शकता. कसलीच खाशेली साधनां वा व्हड सुवात नासतना लेगीत घरा कडेन सूर्यनमस्काराचो सराव करूं येता, हें ताचें व्हड खाशेलपण आसा.
जागतीक सूर्यनमस्कार दिसा निमतान शाळा, म्हाविद्यालयां, योगसंस्था, सामाजीक संघटणा आनी स्वयंसेवी संस्था वेगळे वेगळे उपक्रम आयोजीत करतात. पंगडान सूर्यनमस्कार, योगशिबिरां, प्रात्यक्षिकां, व्याख्यानां आनी सर्तींच्या माध्यमांतल्यान लोकां भितर योगा विशीं जागृताय निर्माण करतात. भुरग्यां भितर शिस्त, एकाग्रता आनी सकारात्मक विचारसरणी रुजोवपा खातीर अशा उपक्रमांचो बरोच उपेग जाता. खाशेल्यान तरुण पिळगीक भारतीय संस्कृताये कडेन जोडपाचें हें एक प्रभावी माध्यम थारता.
सूर्यनमस्काराचे कुडीचेर फायदे खूब व्हड आसात. नेमान सराव केल्ल्यान रक्ताभिसरण सुदारता, कुडीतली लवचिकता वाडटा आनी पचनक्रिया घट जाता, वजन नियंत्रणांत उरता, कणाे (मणको) घट जाता आनी स्नायूंक स्फूर्त मेळटा. तशेंच श्वसनक्रिया घट जावन फुफ्फुसांची कार्यक्षमता वाडटा. जायत्या तज्ञांच्या मतान, दीसपट्टे 12 सूर्यनमस्कार घाल्यार कुडीक पुराय व्यायामाचो लाव मेळटा. मानसीक आरोग्याचे नदरेनय सूर्यनमस्कार खूब उपेगी आसा. दर एका पांवड्यार स्वासाचेर लक्ष केंद्रीत केल्ल्यान मन शांत जाता आनी ताण (stress) उणाव जाता. नकारात्मक विचारां पसून पयस रावन सकारात्मक उर्जेचो अणभव येता. आयच्या काळांत वाडत चलिल्ली चिंता, नैराश्य आनी मानसीक थकव्याचेर सूर्यनमस्कार हो एक सैमीक उपाय थारूंक शकता. देखूनच जागतीक सूर्यनमस्कार दीस हो मानसीक आरोग्याचो संदेश दिवपी दीसय आसा.
सूर्यनमस्काराचें आध्यात्मीक म्हत्वय तितलेंच खोल आसा. सूर्य हो आत्मज्ञानाचें प्रतीक मानतात. सूर्यनमस्कार घालतना उच्चारिल्ले बारा सूर्यनाम मंत्र कुडींतल्या ऊर्जा केंद्रांक जागृत करतात. ह्या साधनेतल्यान आत्मचिंतन, आत्मशुद्धी आनी आत्मविकासाचो मार्ग उक्तो जाता. देखून सूर्यनमस्कार हो फक्त व्यायाम उरनासतना, एक साधना जाता.
भारतीय संस्कृतेन निसर्गाक अनन्यसाधारण स्थान आसा. सूर्य, पृथ्वी, उदक, वायू आनी उजो ह्या पंचमहाभूतां कडेन सुसंवाद राखपाची शिकवण आमचे परंपरेन दिल्या. ‘जागतीक सूर्यनमस्कार दीस’ निसर्गा कडेन नातें जोडपाचो आनी पर्यावरणा विशीं संवेदनशील जावपाचो संदेश दिता. सूर्याच्या ऊर्जेचेर सगली सृश्टी आदारून आसा, हाची जाणवीक करून दिवन मनीस जातीन निसर्गाचो मान राखचो, होच ह्या दिसा फाटलो व्यापक उद्देश आसा.
आयज योग आनी सूर्यनमस्काराक संवसारभर वळख मेळ्ळ्या. जायत्या देशांनी योगदीस, सूर्यनमस्कार शिबिरां आनी भारतीय योग पद्धतीचो स्विकार जाता, ही भारता खातीर अभिमानाची गजाल आसा. जागतीक सूर्यनमस्कार दिसा वरवीं भारताची संस्कृतीक वळख, आरोग्य परंपरा आनी अध्यात्मीक विचार संवसारा मुखार मांडटात. ‘वसुधैव कुटुंबकम्’ हे भारतीय संकल्पनेचो प्रत्यक्ष अणभव ह्या उप्रमांतल्यान मेळटा.
जागतीक सूर्यनमस्कार दीस हो जिवीतशैली सुदारपाची एक बरी संद आसा. ह्या दिसा केल्लो संकल्प वर्सभर प्रेरणा दिवंक शकता. दिसाक उण्यांत उणे कांय सूर्यनमस्कार घालपाचो निश्चय केल्यार आरोग्य, मनाची शांतताय आनी आत्मविस्वास हातूंत नक्कीच सकारात्मक बदल जाता.
एकंदरीत पळयल्यार, सूर्यनमस्कार योग हो भलायकी, अध्यात्म, संस्कृती आनी निसर्ग हांचो एक सोबीत संगम आसा. आधुनीक विज्ञान आनी पोरणें योगशास्त्र हांची सांगड घालपी हो दीस दर एकल्यान आपणावपा जाय. सूर्यनमस्काराच्या माध्यमांतल्यान निरोगी कूड, शांत मन आनी सकारात्मक नदरेची प्राप्ती करप. तेजस्वी सूर्या वरीच आमचें जिवितूय ऊर्जा, भलायकी आनी खोशयेन उजवाडून येवचें, हीच खरी इत्सा आसा.
प्रमिला प्रसाद फळदेसाय
9011834847
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
