राजकी अस्थिरताय पयस दवरुया

भांगरभूंय | प्रतिनिधी

सत्ते विरोधांतले राजकी पक्ष एकठांय येतले, वेंचणुकेंत जैतय मेळयतले. वेंचणुके उपरांत एकठांय रावतले?

फाटल्या सप्तकांत विधानसभा वेंचणुके पासत प्रशासकी मांडावळ स म्हयन्या आदीं कशी जाता तें भांगरभूंय लेखांत सांगिल्लें. व्हड प्रमाणांत अधिकाऱ्यांच्यो बदल्यो जावपाक आरंभ जाला, विरोधक एकठांय येवपाची भास जावंक लागल्या. पंचायत ते विधानसभा पांवड्यार राजकारणी चड वगत आपल्या मतदारसंघांनी भोंवतात, मतदारांक मेळटात. मतदारसंघांतलो उदरगतीचो वावर बेगीन जाता, प्रशासनय धांवता.
विरोधी पक्षांनी एकवटाची भास करतना गोंयांत परतून राजकी अस्थिरताय येवची न्हय हे खातीर वावुरपाची गरज उप्रासल्या. सत्ते विरोधांतले राजकी पक्ष एकठांय येतले, वेंचणुकेंत जैतय मेळयतले. वेंचणुके उपरांत एकठांय रावतले? वेंचणुके मागीर सत्ते आड एकूच पक्ष, एकूच माची जातली? काँग्रेस, राष्ट्रवादी काँग्रेस, तृणमूल काँग्रेस, आम आदमी पार्टी, जिवे जाल्ले, आशिल्ले आदले प्रादेशीक पक्ष, डाव्या आनी उजव्यांनी विचार करपाचो वगत आयला.
गोंयान राजकी अस्थिरताय येतना, आयली तेन्ना कितें जालें ताचो अणभव घेतिल्ले राजकारणी आसात. समेस्तांकय अस्थिरतायेच्यो यादी आसतल्यो. दोन तीन आमदार सत्ते वटेन वचपाचे दीस सोंपल्यात. किरकोळ पक्षांतरां परस पुराय राजकी पक्ष, चडशे आमदार, खासदार तत्वां एक सारकीं आसल्यार एकठांय येवन वेगळ्याचाराची बांदावळ करतात. राज्यांत, देश पांवड्यार चलिल्ल्या ह्या राजकारणांतल्यान गोंयचो मतदार शिकतलो. वेंचणुकेंत मतदान करतना एकाच राजकी पक्षाक व्हड प्रमाणांत मतां दितलो हें विरोधी पक्षांक होलमलां, सरकारांतल्या व्हड पक्षाक तें कळ्ळां. मतां विखुरपा पासत वेंचणुकेच्या आंगणांत देंवपी निमाण्या वगतारय आसतले, तांकां मतदारांनी वळखुपाक शिकचें. वेंचणूक आयोग मतदारांक जागयतलो चडांत चड मतदान जावपा पासत. मतदान व्हड प्रमाणांत जाल्यार तें सत्ते आड झुजपी राजकी पक्षांक हें गणीत अस्तंत बंगालाचे वेंचणुकेंत दिसलें. तें गणीत बदलपाक तिसरो, चवथो राजकी पंगड पंजाब, गोंय, कर्नाटक, उत्तर प्रदेश राज्यांतल्या वेंचणुका आदीं बांदपी आसात. तांचो अणभव, तांची मोख जोखपाक मतदारांक कळोवपाक दिसाळीं, टीव्ही चॅनल्स वावराक लागल्यात.
एका झुजान वेगळी राजकी निती आपणावपाक, आदल्या इश्टांक, दुस्मानांक नवी माची दिवपाची सर्त आसतली. तें सर्तींतल्यान अपक्ष म्हणून वेंचणुकेच्या आंगणात येवप्यांचो आंकडो वाडटलो. अपक्ष निमाणें सत्तेक वेंग मारतात, उदरगत आपल्या मतदारसंघांत हाडपी अपक्षय फटवतले. कोण फटोवंक शकता तांकां? तांच्या लागसारच्या मतदारसंघातले आमदार, मंत्री.
सत्तेंत आशिल्ल्या राजकी पक्षांचो हावेस वाडटा, अस्थिरताय येतना दिसता तेन्ना पक्षांतरां जातात. विरोधांत आशिल्ल्या राजकी पक्षांच्या एकवटांत सत्तेत वचपाचीं सपना पळोवपी, उंचेले शिक्षण घेवपी आसतले. तांचे वरींच सत्तेंत आशिल्ल्या आमदारां मदीं राजकी अणभवांतल्यान उंचायेर पाविल्ल्यांक, आपल्या मतदारसंघां पासत वावुरिल्ल्यांक भिवपाची गरज ना.
केंद्रीय मंत्रीमंडळांतल्या खासदार, मंत्र्यांच्या वावराचो अभ्यास जावपाक लागला. दोन वर्सां आदीं गोंयच्या मंत्री, आमदारांच्या कामकाजाचो नियाळ करून बदल घडोवन हाडपाक सांगपी केंद्रीय मंत्री नितीन गडकरी परतून गोंयांत येत व्हय? तांचेर भाजपाची गोंय विधानसभा वेंचणूक जापसालदारकी येवपाची शक्यताय न्हयकारुंक येवची ना. वगतार शिटकावण्यो दिवपी प्रदेशाध्यक्ष, केंद्रीय मंत्र्यांक केंद्र सरकारांत बक्षीस मेळूंक शकता.
हालींच गोंयांत आयिल्ले राजकी पक्षांचे प्रभारी मतदारसंघांनी भोंवल्यात तांकां उदरगत दिसल्या. मतदार, आमदारांक, कार्यकर्त्यांक, अध्यक्ष, सचिवांक वांगडा न घेतां राजकी प्रभारी मतदारसंघांची पळोवणी करुंक शकतात. पिरायेन ज्येश्ठ आशिल्ल्या आदल्या आनी आतांच्या आमदारांक गांवां परस शारां भावतात? शारांतल्यान घरां तांकां लागीं आयल्यांत. वेंचणुके वेळार तांकां मतदारसंघांत चड वावुरचें दिसता अशेंय प्रभारींक कळोवपी मतदार आसतले. कितें रकाद धाडटात प्रभारी? गोंयची सवस्तकाय आपल्या राज्यां परस बरी आसा हो?
वरिश्ठ आमदारांनी आपल्या मतदारां भितरल्या फुडारांत आमदार जावंक शकतात अशें नेतृत्व घडयिल्लें आसल्यार वरिश्ठांक तें जड वचूंक शकता. फुडारांतल्या नेतृत्वाची जापसालदारकी आमदार कितले घेतात? खासदार तांणी घडयल्यार ते आमदारां आड वेंचणुकेंत आसतले.
पिराय वाडटना भलायकी आत्र्या पयऱ्यान इबाडपी आमदार, मंत्र्यांची वळेरी सरकारा लागीं आसतली. आपल्या भुरग्यां भायलें नेतृत्वय तांणी घडयल्यार तांच्या मतदारसंघात उदरगत जातली. मतदारसंघांच्या उदरगतीच्या वावरांत आमदारां वांगडा घुस्पल्ल्या मतदारांक वरिश्ठांचे भलायकेची म्हायती आसता. बदलपी राजकारणांत फुडारांत आमदार, मंत्री जावपाक सोदपी इत्सा आशिल्ल्यांचे, आमदारांचे भलायकेचो नियाळ प्रभाऱ्यांनी घेवचो.
वेंचणूक लागीं आयल्या हें सांगपी अधिकाऱ्यांच्यो बदल्यो तांच्या ज्येश्ठत्वाच्यो, फुडारांत वरिश्ठ जावपाच्यो कुरवो. आपसां मदीं अधिकारी, कर्मचारी एकामेकां लागीं उलयतले कार्यावळींनी. त्यो कार्यावळी वेंचणुकेंत कोणाक लाव मेळोवन दिवपी हें सांगतल्यो.
कायदो आनी सुवेवस्था इबाडल्या म्हणून अधिकाऱ्यांक जापसालदार धरपांत राजकारण आसा? पुलिसांच्यो बदल्यो वेंचणुके आदीं जातात तेन्ना आमदार, मंत्र्यांच्या ते लागींचे नासतले ही जापसालदारकी घेवपी सचीव, खात्यांचे मुखेली राजकारणा पसून पयस रावंक शकना. तांकां राजकारण खबर आसता तें मुळा सावन.
काँग्रेस पक्षांत प्रदेश पांवड्यार परत येवपी जिल्हो, नगरपालिका पांवड्यार वेंचून आयिल्ले विरोधी वांगडी आसतले. आमदार जावपा पासत तांचे भितर आशिल्ली सर्त कोणाक लावाची थारतली? प्रतिमा कुतिन्हो हांकां हेर पक्षांतलें राजकारण कळ्ळें. प्रदेश काँग्रेस पांवड्यार त्यो वावुरल्यार फुडल्या पांच वर्सांनी तांकां विधानसभेची वाट दिसतली, अंदूं नवे वाटेन त्यो वचपाक सोदता आसत जाल्यार तांकां संद मेळूंक येता.
विरोधी पक्षांतलीं पक्षांतरां नवीं न्हय, सत्तेत आशिल्ल्या पक्षांक तें गिराण लागचें ना ही जतनाय घेवपाची गरज आसा. सत्तेंत आशिल्ले पयलींचे विरोधी वांगडी सत्तेर भौमतान आयिल्ल्या राजकी पक्षांत वचपाचें राजकारण पक्षांतर कायद्या कडेन नवे नदरेन पळयात, बदल करात अशें सांगपी.
गोंयचे मतदारसंघ हेर राज्यांचे तुळेन ल्हान, त्या मतदारसंघांनी आमदार, मंत्र्यां बरोबर वावुरपी घरकान्नी वेंचून येवंक शकतात. घरकान्न वेंचून येतना घरकाराक कुशीक दवरपाचें राजकारण मतदार खेळूंक शकतात. धुवो आनी पुतांक बरे दीस हे वेंचणुकेंतल्यान आयल्यार उदरगतीचें नवें दार नव्या मतदारांक दिसतलें.
गोंय विधानसभेचे वेंचणुकेंत 50 टक्के बायलांक उमेदवारी दिवपाची मानसीकताय घडोवपाचे दिकेन प्रदेश काँग्रेस पावल घालता. 10 बायलांक वेंचून हाडपाची जापसालदारकी घेवपाच्या तांकीची अस्तुरी प्रदेश काँग्रेसीक तातूंतल्यान मेळची. विरोधी पक्ष मुखेली आपले घरकान्नीक कुंकळ्ळे मतदारसंघांतल्यान वेंचून हाडूंक शकतले? तांचो मतदारसंघ बायलां खातीर विधानसभा वेंचणुकेंत राखून दवरतले? अनुसुचीत जातीचे गोंयकार एका मतदारसंघांतल्यान लागसरच्या मतदारसंघांत गेल्यात? जापो मतदार दिवंक शकतात.

सुहासिनी प्रभुगांवकार
9881099260