भांगरभूंय | प्रतिनिधी
कळंगूट पुलीस बंगळुरू सावन आयज हाडटले गोंयांत
भांगरभूंय । प्रतिनिधी
म्हापशें : कॅसिनोंत वळख वाडोवन गिरेस्तांक ‘हनी ट्रॅपां’त ओडून लुटपी आनी उडुपी (कर्नाटक) वाठारांतले वॉटर स्पोर्ट्स वेवसायीक संदीप सुवर्णा (42) हाच्या मरण प्रकरणांत फरारी आशिल्ली दुबावीत बायल अक्षता उर्फ रपाश्री सी. हिका कर्नाटक पुलिशेचे मजतीन बंगळुरूंत धरल्या.
दुबावीत बायल गोंयांतल्यान बंगळुरू वटेन पळून गेल्ल्याची म्हायती मेळटाच कळंगूट पुलिसांचो पंगड बुधवारा (1 जुलय) कर्नाटकांत गेल्लो. सेगीत तीन दीस ह्या पंगडान थळाव्या पुलिशेचे मजतीन सोद घेवन शुक्रारा तिका धरली. हे दुबावीत बायलेचो ट्रान्झीट रिमांड घेतला. पुलीस पंगड तिका घेवन शेनवारा सकाळीं गोंयांत पावतलो. ते उपरांत संदीपाक खंयचें गुंगीचें वखद दिल्लें आनी ह्या मरणाचो घटनाक्रम कितें, हें उक्तें जातलें.
कॅसिनोंत येवपी गिरेस्त व्यक्तींक ‘हनी ट्रॅपां’त आडकावन तांकां लुटपाचो हे बायलेचो धंदो आशिल्लो. तिच्या ‘हनी ट्रॅपां’त आडकल्ल्या खूबश्या पर्यटकांक ब्लॅकमेलिंगाक फुडो करचो पडिल्लो. ह्याच जाळ्यांत आडकल्ल्या संदीप सुवर्णा हाका मात मरण आयलें. हाचे आदीं एप्रीलांत गुजरातांतलो पर्यटक तोमेश यादव हाकाय तिणें गुंगीचें वखद दिवन बेशुद्ध केल्लो. ताचे कडल्यान 2.40 लाख रुपया रोख आनी 15.4 लाखांच्यो भांगराच्यो वस्ती तिणें फारायल्ल्यो. यादव हाणेंच फुडें सरून हे बायले आड पुलिशेंत पयली कागाळ दाखल केल्ली.
30 जूनाक कळंगूटच्या एका रिसॉर्टांत संदीप सुवर्णा हाची कूड सांपडिल्ली. घडणुके दिसा ही दुबावीत बायल ताचे वांगडा तेच कुडींत आशिल्ली. तिणें संदीपाक गुंगीचें वखद दिवन बेशुद्ध केलो आनी ताची गळ्यांतली भांगराची सरपळी तशेंच पाकीट फारायल्ल्याचो दुबाव आसा.
ह्या मरण प्रकरणांत संदीपाचो भाव चेतन सुवर्णा हाणें दिल्ले कागाळे वयल्यान दुबावीत बायले आड भारतीय न्याय संहितेचें कलम 123, 309 आनी 103(1) खाला खुनाचो गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
