भांगरभूंय | प्रतिनिधी
पणजी : फाटल्या कितल्याशाच वर्सां सावन अयोध्येच्या राम मंदिरांत चोरी जाता. भक्तांनी दान दिल्ल्यो भांगराच्यो वस्ती, रामाच्यो पादुकां, हार आनी रोख रक्कम चोरयेक गेल्या. उत्तर प्रदेश तशेंच केंद्रांतलें भाजप सरकार हें प्रकरण दामूंक सोदता. आमी आवाज काडले उपरांत ह्या प्रकरणांत एफआयआर दाखल केली. सध्या ह्या प्रकरणांतल्या मुखेल सुत्रधारांक भाजपा कडल्यान संरक्षण मेळटात. ह्या सुत्रधारां आड खर कारवाय करची अशी मागणी ‘आप’चे राष्ट्रीय संयोजक अरविंद केजरीवाल हांणी केली. शुक्रारा पणजे जाल्ले पत्रकार परिशदेंत ते उलयताले.
केजरीवाल हांणी म्हणलें, राम मंदिरांतले चोरयेचो प्रकार २०२१ सावन सुरू आसा. हे विशीं आयबीन केंद्र सरकारांक वट्ट बारा फावटीं अहवाल दिल्लो. तरी वरीश्ठ केंद्रीय फुडार्यांनी हाचे कडेन आडनदर केल्ली. हातूंत देवळाच्या ट्रस्टांतले लोक गुंथिल्ल्याची शक्यताय आसा. देवळाच्या ट्रस्टान लोकांच्या दानांतल्यान मेळिल्ले रकमेचो वापर घोटाळ्या खातीर केला.
उण्या दरांतल्यो जमनी चड रक्कम दिवन विकत्यो घेतल्यात. एका प्रकरणांत १४ कोटी रुपयांची जमीन ट्रस्टान ९५ कोटी रुपयांक विकत घेतल्या. हांगच्या बांदकामाच्या कंत्राटांतूय कमिशन घेतलां. हालींच मेळिल्ले सीसीटीव्ही फुटेजी प्रमाण हांगा ४० दिसांनी ७० फावटीं चोरी जाल्ल्याचें स्पश्ट दिसता. हें समजले उपरांत हांगच्या प्रशासनान फाटल्या आठ दिसांची सीसीटीव्ही फुटेजूच डिलीट केली. प्रशासनान चोरयेचें प्रकरण गंभीरपणान घेवंक नाशिल्लें. आमी थंय वचून आंदोलन केले उपरांत प्रशासनाक जाग आयली. आतां ह्या प्रकरणांत एफआयआर दाखल जाल्या. मात फकत ल्हान आरोपींकूच धरल्यात. व्हडले आजूनय मेकळे भोंवतात. चेंपण वाडले उपरांत ह्या प्रकरणाची चवकशी करपाक एसआयटीची स्थापना केली. मात तिका कसलेच अधिकार नात.
लोकांच्या भावनां कडेन खेळ
गोंयां सयत पुराय देशांतल्या लाखांनी सनातनी भाविकांनी राम मंदिरा खातीर दान, देणग्यो दिल्ल्यो. आतां चोरयेक गेल्यात ते हेच दुडू आनी वस्ती. मात भाजपाक हाचें कांयच पडूंक ना. भाजप सरकाराक भगवान रामाचो वापर फकत मतां आनी पयशां खातीर करपाचो आसा, असो गंभीर आरोप केजरीवाल हांणी केलो.
समविचारी पक्षां वांगडा युती करपा विशीं आजूनय चर्चा जावंक ना. हे विशीं वाल्मिकी नायक हानी गोंयचे हेर पदाधिकारी जो निर्णय घेतले ताका फाटबळ दितले. कॉंग्रेस फुडारी के सी वेणुगोपाल गोंयांत जरी आयल्यात तरी युती विशीं कसलीच बसका जावची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
