भांगरभूंय | प्रतिनिधी
ताज सिदादे गोवा, फुंदासांव ओरियंट इन इंडिया आनी कला आनी संस्कृती खात्याचो पालव
पणजी: गोंयच्या तरणाट्या कलाकारांक उर्बा दिवप, शास्त्रीय कलांक माची उपलब्ध करून दिवप हे खातीर ताज सिदादे गोवा, फुंदासांव ओरियंट इन इंडिया आनी कला आनी संस्कृती खात्या वतीन बाल कला तरंग 2026 चें आयोजन केलां. हातूंत शास्त्रीय गायक, वाद्य आनी नाच विभागांत सर्त घेतले. फुंदासांव संस्थेचे डॉ. पावलो गोम्स हांणी पणजे जाल्ले पत्रकार परिशदेंत ही म्हायती दिली. ह्या वेळार फॉमेंतो रिसॉर्ट अॅण्ड हॉटेल्स प्रायव्हेट लिमिटेडची नीता ब्रीद, गायक सोनिया शिरसाट आनी खात्याची अधिकारी मिताली नायक हाजीर आशिल्लीं.
गोम्स हांणी सांगलें,अंदूं पयलेच फावटी आयोजीत करपी हे सर्ती वरवीं शास्त्रीय कलांचे संवर्धन करपाचो यत्न करतले. सर्त पुरायेन फुकट आसतली. हातूंत 12 ते 15 वर्सां आनी 16 ते 22 वर्सां अश्या दोन पिरायेच्या गटांतल्या भुरग्यांक वांटेकार जावपाक मेळटलें. सर्त फक्त हौशी कलाकारां खातीर आसतली. सर्तींत थळावे गोंयकार तशेंच सध्या गोंयांत रावपी कलाकारांक वांटेकार जावपाक मेळटलें. वाद्य ह्या विभागांत तबलें, गायन विभागांत हिंदुस्थानी शास्त्रीय गायन जाल्यार नाच विभागांत भरत नाट्यमाचो आस्पाव केला. सर्तकांक आपले कलेचे व्हिडियो balkalatarang2026gmail.com हे मेलीचेर धाडचे पडटले. व्हिडियो धाडपाची निमाणी तारीख 23 जुलय 2026 आसतली.
व्हिडियोची लांबाय चडांत चड 6 मिणटां दवरल्या. जाल्यार सर्तकांक आपली वळख करून दिवपा खातीर 1 मिणटाचो काळ आसतलो. दोनूय मेळून व्हिडियो चडांत चड 7 मिणटांचो आसपाक जाय. आयिल्ले व्हिडियो तज्ञ स्कृटिनी करतले. निमाणें फेरये खातीर 18 ते 20 सर्तकांची निवड करतले. ह्या सर्तकां खातीर विशेश कार्यशाळा घेतले. निमाणी फेरी 23 ऑगस्टाक रवींद्र भवन, मडगांवां सांजेवेळार 5 वरांचेर सुरू जातली. सर्तींतल्या जैतिवंतांक गोंयां सयत हेर संदी उपलब्ध करून दिवपाक आमी यत्न करतले अशें गोम्स हांणी सांगलें.
नीता ब्रीद हांणी सांगलें, फॉमेंतो समुहाच्या अंजू तिंबलो हांचे दुरदृश्टींतल्यान हे सर्तीची कल्पना मुखार आयली. आमच्या समुहान सदांच राज्यांतली कला, संगीत, लोक कला सांबाळून दवरपाक मजत केल्या. भुरग्यांक परतून आपल्या मुळां कडेन व्हरपाक आमी ही सर्त आयोजीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
