भांगरभूंय | प्रतिनिधी
मडगांव : भारतीय जनता पक्षान केल्ली उदरगत आयज जनते मुखार आसा. लोकशायेंत दरेका नागरिकाक वेंचणूक लढोपाचो अधिकार आसा. कांय फुडार्यांक फकत वेंचणुको लागीं आयली काय जनतेची याद येता. हाका लागून येवपी वेंचणुकेंत मुखार कोणूय उमेदवार जरी आसलो तरी आमकां कसलोच फरक पडचो ना. नावेली मतदारसंघांत परत कमळूच फुलतलें आनी राज्यांतूय भाजपचेंच सरकार येतलें असो ठाम विस्वास नावेलीचे आमदार उल्हास तुयेंकार हांणी उक्तायलो.
नावेली विधानसभा मतदारसंघांत सध्या खुबश्या इत्सूक उमेदवारांचीं नांवां चर्चेंत आसात. हातूंत चर्चिल आलेमांव हांची धूव वालंका आलेमाव, ’आप’तल्यान राजीनामो दिल्ले समाजीक कार्यकर्ते सिद्धेश भगत, तशेंच कॉंग्रेस सोडून फाटले वेंचणुकेंत ’आप’ पषांतल्यान परत कॉंग्रेसींत येवपी प्रतिमा कुतिन्हो हांच्या नाावांचो आसपाव आसा. ह्या राजकी घडामोडींचे फाटभूंयेर आमदार उल्हास तुयेंकार हांकां विचारलें तेन्ना तांणी विरोधकांक स्पश्ट सांगतना म्हणलें, लोकशायेंत कोणाकूच वेंचणूक लढोवपा पसून आडावपाक मेळना. मात, मतदारसंघांतली जनता काम करप्यां वांगडा उबी रावता.
आपल्या कार्यकाळांतल्या कामां विशीं सांगतना तुयेंकार हांणी, भाजपाचो आमदार ह्या नात्यान हांव नावेले आनी दवर्ली वाठारांत खुबशीं आडकून उरिल्लीं कामां पुराय केल्यांत. ह्यान पयलीं जेन्ना आवेर्तान फुर्तादो भाजपांत आशिल्ले, तेन्ना दवर्ली वाठारांत दोन मैदानां उबारलीं आनी दवर्ली चर्ची लागसार कम्युनिटी हॉल निर्माण केलो. फाटलय चार वर्सांनी आमदार म्हणून काम करतना हांव जनतेच्या सुख-दुख्खांत धांवून गेलां. ह्या वाठारांत जमनी पोंदच्या सरयांचें (अंडरग्राउंड केबलींग) काम पुराय केलें. फकत भाजपूच शाश्वत उदरगत करपाक शकता, हाची खात्री जनतेक पुरायेन आसा.
वेंचणुको तोंडार आयिल्ल्यान कांय फुडारी आतां सक्रीय जाल्यात. मात भाजप फकत वेंचणुकां पुरतो मर्यादीत ना, आमचे कार्यकर्ते वर्सभर लोकांचे सेवेंत कार्यरत आसतात. प्रतिमा कुतिन्हो आनी वालंका आलेमाव हांणी फाटली विधानसभा निवडणूकय लढयल्ली. हाका लागून तांचे उमेदवारीन भाजपाक कसलेच तरेचो फरक पडचो ना. आमच्यो बूथ कमिट्यो घटमूट आसात. कार्यकर्त्यांच्या नेटार नावेलीची जागा आमी भोवमतान जिकतले आनी गोंयांत परत भाजपाचेंत सरकार भोवमतान सत्तेर येतलें अशें तांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
