भांगरभूंय | प्रतिनिधी
मडगांव : दवर्ली तळेबांध तळ्याची सुवात दवर्लीच्याच कांय लोकांनी विकल्या. म्हाका ह्या वेव्हाराची मातूय कल्पना नाशिल्ली. आतां हो जागो विकत घेतिल्ल्या मनशान जमीन रुपांतरणाचो (कन्व्हर्जन) प्रस्ताव सादर केला. मात हे गजालीक थळाव्या नागरिकांचो खर विरोध आशिल्ल्यान आमदार म्हणून हांवूय थळाव्यांच वांगडा ठामपणान उबो रावतलों, अशी गवाय आमदार उल्हास तुयेंकार हांणी दिली.
दवर्ली तळेबांध हांगच्या तळ्याची सुवात भू-रुपांतरणा खातीर प्रस्तावीत आशिल्ल्यान, नगरनियोजन विभागान हे विशीं जाहीर नोटीस जारी केल्ली. ही नोटीस प्रसिद्ध जाले उपरांत थळाव्या नागरिकांनी तळ्याच्या जागेच्या रुपांतरणाक नेटान विरोध केला. ह्या वादाचेर अधिकृत भुमिका मांडटना आमदार उल्हास तुयेंकार हांणी म्हणलें, हें तळें दवर्लीच्या थळाव्या लोकांच्या हक्काचें आसा. सुरवातेक कोणेंतरी ह्या जाग्याची विक्री केली आनी उपरांत आनीक एकल्यान ती सुवाते विकत घेतली. आतं ह्या नव्या खरेदीदारान जमीन रुपांतरणा खातीर नगरनियोजन खात्याकडेन अर्ज केला. तळ्याच्या अस्तित्वाक धोको लावपी ह्या भू-रुपांतरणाक जनतेचो विरोध आसा, हाका लागून जनतेचो जो निर्णय आसतलो तोच म्हजोय असतलो.
ह्या प्रकरणा वयल्जान कांय लोक आमदार म्हणून आपल्याचेर टिका केल्ल्याचो आक्षेप तांणी घेतलो. ह्या जाग्याची खरेदी-विक्री वेव्हारा कडेन म्हजो कसलोच संबंद ना आनी म्हाका ताची कल्पनाय दिवंक नाशिल्ली. ही सुवात दवर्लीच्याच लोकांनी विकल्या, आमदार म्हणून म्हाका विचारून हो वेव्हार जावंक ना. जागो विकत घेवपी वेवसायीक नेमां प्रमाण रुपांतरण करता आसतले, तरी ताका जनतेचो विरोध आसा. हाका लागून लोकांच्या भावनांचो आदर करीत हांव दवर्लीच्या लोकां वांगडाच रावतलों अशें आमदार तुयेंकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
