भांगरभूंय | प्रतिनिधी
नवी दिल्ली : महाराष्ट्रांत नीट, टीईटी अश्या परिक्षांचे पेपर फुटले उपरांत शिक्षणाचें जाल्लें वेपारीकरण आनी वट्ट पयशांची उलाढाल हातूंत शिक्षणाचो जाल्लो वेवसाय उक्तडार आयिल्लो. आतां कोचिंग क्लासींमदीं विद्यार्थी फारावपाची सर्त सुरू जाल्या. आघाडीच्या एडटेक कंपनींतली एक आशिल्ले फिजिक्सवालान (PhysicsWallah) आपल्या ऑफलायन कोचिंग वेवसायाच्या विस्तारा खातीर नवी प्रोत्साहन येवजण लागू केल्ल्याची म्हायती मुखार आयल्या. हे येवजणे खाला नव्यान रुजू जाल्ल्या शिक्षकांनी वा टॅलेंट नर्चर टीम वांगड्यांनी शिफारस केल्ल्या विद्यार्थ्यांनी जेईई आनी नीट सारकिल्ल्या परीक्षांनी तोखेवपा सारकें येस मेळयल्यार संबंदीत कर्मचार्यांक २ लाखां पसून ते १५ लाखां मेरेनचें इनाम दितले, अशें जाहीर केलां.
मेळिल्ले म्हायती प्रमाण, ही येवजण विशेश म्हणल्यार नवेच नियुक्त केल्ल्या शिक्षकां खातीर आशिल्ल्यान तांणी आदल्या संस्थानांतल्या विद्यार्थ्यांक फिजिक्सवालाच्या वर्गांत प्रवेश घेवपाक उर्बा दिवपी, असो तांचो हेतू आसा. विद्यार्थ्यांच्या परिक्षेंतले कामगिरी प्रमाण इनामांची रक्कम निश्चीत करतले.
मजगतीं, कंपनीन ही येवजण नवी नाशिल्ल्याचें स्पश्ट केलां. कर्मचार्यांच्या कामगिरीचो सन्मान आनी गुणेस्त विद्यार्थ्यांक उर्बा दिवपा खातीर अशे तरेच्या पुरस्कार येवजण्यांचें पुनरावलोकन आनी अद्ययावतीकरण करतात, अशेंय कंपनीच्या प्रवक्त्यांनी सांगलें.
कोचींग संस्थांनी सर्ती खर जातल्यो. मात आजूनय क्षेत्रांतल्या कांय तज्ञांच्या मतान, नव्या शिक्षकांक विद्यार्थ्यां वांगडा हाडपा खातीर उर्बा दिवपाच्या ह्या धोरणाक लागून विवीध कोचिंग संस्थांनी विद्यार्थ्यां मदीं उर्बा दिवपाच्या ह्या धोरणाक लागून विवीध कोचिंग संस्थांनी विद्यार्थ्यां खातीर सर्ती अदीक खर जावपाची शक्यताय आसा. विशेश म्हळ्यार भारता सयत जोड अरब अमिरातीतल्या ऑफलायन केंद्रांचो विस्तार करपाच्या कंपनीच्या रणनीतीचे फाटभूंयेर हे येवजणे कडेन शिक्षण क्षेत्राचें लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
