भांगरभूंय | प्रतिनिधी
पणजी : वास्को वाठारांतल्यान एक धक्को दिवपी घडणूक मुखार आयल्या. गरिबांक लुटपी एका सराफाक उक्तडार हाडला. वास्को लागसारच्या ’सडा’ भागांतल्या कांय तिडकल्ल्या बायलांनी कायदो हातांत घेवन, एका सराफाक स्वताच धरलो आनी सरळ वास्को पुलीस स्टेशनांत ओडीत हाडलो. भिमप्पा चलवादी अशें ह्या दुबावीत सराफाचें नांव. तांणी खुबश्या जाणांक लाखांनी रुपयांक तोपी घातिल्ल्याचो आरोप आसा.
हे विशीं मेळिल्ले चड म्हायती प्रमाण, सराफ भिमप्पा चलवादीन आपणें स्वताची स्वतंत्र बँकींग प्रणाली सुरू केल्ल्याचो दावो केल्लो. बँके प्रमाणूच मात सामक्या उण्या म्हणल्यार वट्ट ०.६५ टक्के व्याजदरान गोल्ड लोन दिवपाचें हांयस तांणी थळाव्या बायलांक दाखयलें. सामान्य बायलांनी बँके परस उण्या व्याजदरान रीण मेळटा म्हणून आपलें भांगर काडून ह्या सराफाकडेन घाण दवरलें. खुबश्या बायलांनी नेमान हप्ते भरून आपणें घेतिल्लें रीण फारीकूय केलें. मात बायलो जेन्ना आपलें भांगर परत घेवपा खातीर गेल्यो, तेन्ना सराफान आपलें मूळ रूप दाखोवपाक सुरवात केली. रीण नील जाले उपरांतूय तांणी बायलांच्यो भांगरा वस्ती परत दिवपाक स्पश्ट न्हयकार दिलो.
हे फटवणुके आड पिडेस्त बायलांनी मुरगांव पुलीस स्टेशनांत दोन स्वतंत्र एफआयआर (गुन्हे) नोंद केल्ल्यो. मात, गुन्यांव नोंद करूनय पुलिसांनी आरोपीचेर कसलेच तरेची खर कारवाय करूंक ना. आरोपी फरार आशिल्ल्याचें सांगून पुलिसांनी हात वयर केले. हे विशीं अजाप करपा सारकी गजाल म्हळ्यार, पुलीस आपल्याक धरपाक शकनात, कारण पुलीस म्हज्या बोल्सांत आसात, अशें उक्तडार हो सराफ बायलांक सांगतालो. पुलिसां कडल्यान न्याय मेळपाची आस्त नाशिल्ल्यान आनी आरोपी सुशेगाद भोंविल्ल्याचें पळोवन बायलांक बरीच तिडक आयली. तांची स्वताच हें प्रकरण सोडोवपाचें थारायलें.
बुधवारा बायलांनी सांपळो रचून ह्या फरारी सराफाक सडा वाठारांत धरलो. ताका धरून सरळ वास्को पुलीस स्टेशनांत हाडलो. हाका लागून पुलीस स्टेशनाच्या वाठारांत बायलांनी बरोच बोवाळ घालून तिडक उक्तायली. बायलांनी आरोप केला, लोकांच्या कश्टांच्या पयशांचेर आनी भांगराचेर ह्या सराफान रोखडेंच दोन नवे आलिशान बंगले आनी हेर मालमत्ता खरेदी केल्यो, जाल्यार दुसरे कडेन मूळ धनीे आपलें भाञगर केन्ना मेळटलें काय हे आशेन रावल्यात.
हे प्रकरण फकत एके फटवणुके पुरतेंच मर्यादीत ना. उण्या व्याजाच्या हांयसाक बळी पडपी सामान्यां खातीर हो एक व्हड धडो आसा. अनधिकृत वित्तीय संस्था वा मनशां कडेन भांगरा सारकिल्ल्यो मोलादीक वस्ती घाणाक दवरतना जतनाय घेवची. हाचेर आतां समाज माध्यमांचेर व्हड चर्चा सुरू जाल्या. पिडेस्त बायलांनी आतां तांच्या हक्काचें भांगर बेगोबेग जप्त करपाची आनी गुन्यांवकाराक वाटोवपाक पळोवप्यांचेर खर कारवाय करपाची मागणी केल्या. ह्या प्रकरणांत आतां वास्को आनी मुरगांव पुलीस फुडलीं कायदेशीर पावलां कशीं उखलतात, हाचे कडेन सगल्यांचें लक्ष लागून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
