भांगरभूंय | प्रतिनिधी
ईथनान जो मान जोडला तो फकत रायकारांनीच न्हय तर पुराय भारतीयांनी ताचो अभिमान बाळगूंक फावो. असलीं मोतयां चुकून कोणाच्या तरी घराब्यांत जल्मांक येतात.
राय हो कलाकारांचो आनी फुटबॉल मोग्यांचो गांव म्हूण वळखताले, पूण ह्या वर्सा थावन चॅस म्हणल्यार बुद्धीबळ खेळाचो तरणाटो धनी आनी पातशाय ईथन वाझ हाचो गांव म्हूण वळखुंपांत येतलो. ल्हान पिरायेरूच ताणें बुद्धीबळ खेळांत गोंयांतूच न्हय तर भारतीय पावंड्यार नांव हाडिल्लें, पूण आतां ताणें संवसारीक पावंड्यार नांव हाडलें. हालींच बोस्निया आनी हर्झगोविना देशांतल्या साराजेवो हांगा जाल्ले “चॅस समर इन साराजेवो – जीएम मिक्स” सर्तींत आपलें तिसरें आनी निमाणें ग्रॅण्डमास्टर (जीएम) मानांकन मेळोवन फकत चवदा वर्सां पिरायेचेर संवसारांतलो बुद्धीबळ असाधारण प्रतिभावान ग्रॅण्डमास्टर म्हूण ईथन वाझान नांव जोडलें. ताणें णव फेरयेंतल्यान सात गूण मेळोवन आंतरराष्ट्रीय ग्रॅण्डमास्टर सर्तूय जिखली. ग्रॅण्डमास्टर जावंक गरज तीं मानांकनां पुराय जातकच तो भारतांतलो सध्याचो सगळ्यांत तरणाटो ग्रॅण्डमास्टर, संवसारांतलो दुसरो सगळ्यांत तरणाटो ग्रॅण्डमास्टर आनी भारताचो 96 वो ग्रॅण्डमास्टर थारलो. जून 2022 त सुरू केल्ल्या फिडेच्या सुदारीत ग्रॅण्डमास्टर मानांकना खाला ईथनाच्या ह्या यशाक अतिरिक्त म्हत्व आसा. सगळ्यांत तरणाट्या भारतीयान स्वित्झरलॅडांतल्या सर्तींनी आपल्या तीन जीएम मानांकनांतलीं दोन मानांकनां मेळयलीं हेंय तितलेंच म्हत्वाचें.
ईथनान तिनूय ग्रॅण्डमास्टर मानांकनां आंतरराष्ट्रीय ग्रॅण्डमास्टर सर्ती जिखतना मेळयलीं – ही उल्लेखनीय अशी कामगिरी ताचें बळगें आनी सुसंग, दोनूय रेखांकीत करतात. ताचें पयलें ग्रॅण्डमास्टर मानांकन ऑक्टोबर 2025 इस्वेंत बोस्निया आनी हर्झगोविनात जाल्ल्या “जीएम4 फेस्टिवल शाहा बिजेलजीना 2025” सर्तींत आयलें, जंय ताणें सर्त जिखपाक वचचे पयलीं एके फेरये आदींच मानांकन सुरक्षीत केलें. ताचे उपरांत जानेवारी 2026 वर्सा सर्बियाच्या सेंटांत जाल्ल्या “जीएम मिक्स 11 फॅन्टास्टीको” सर्तींत ताणें निमाणे फेरयेंत जिखपाकूच जाय अशा खेळांत 2395 मानांकनच्या फिडे मास्टराक हारयलो आनी मानांकन तसोच सर्तीचें खिताबूय जिखलो. साराजेवोंत ताणें परतून एक फावट आंतरराष्ट्रीय ग्रॅण्डमास्टर सर्त जिखून तिसरें आनी निमाणें जीएम मानांकन पूर्ण केलें.
अशी कामगिरी करून राय गांवाकूच न्हय तर पुराय भारत देसांक एके तरेन संवसारीक पावंड्यार नांव मेळोवन दिवपी आनीक एक वाग ईथन वाझ 3 सप्टेंबर 2011 दिसा रायच्या कोल्यांदोंगर वाड्यांत जल्मलो. ताचो बापूय सॉफ्टवॅर इंजिनीयर एडवीन वाझ आनी आवय बी सॉफ्टवॅर इंजिनीयर लिंदा वाझ जिणें राय पंचायतीक एक कार्यकाळ आपली सेवा दिल्या. ताचो व्हडलो भाव एड्रीक, तोवूय बऱ्या पैकीं बुद्धीबळ खेळगडो. ईथन आजुनूय साश्टींतल्या सां जुजे दे आरयलच्या किंग्स स्कुलांत शिकता. तो देश- विदेशांत भोंवला. ताणें आजवेर बारा आंतरराष्ट्रीय पुरस्कार, चवदा राष्ट्रीय पुरस्कार आनी पन्नासां वयर राज्य आनी स्थानीक पावंड्यार इनामां जोडल्यांत.
ताचे विशीं एक खेरीद गजाल तुमचे नदरेक हाडले बगर जावंचें ना. ईथनाचो व्हडलो भाव एड्रीक एक बरो बुद्धीबळ खेळगडो हाची नोंद वयर केल्या. पूण कोवीड धामी वेळार ताचें लक्ष खेळा वेल्यान अभ्यास कडेन वळ्ळें. ते आदीं ताणें जायतीं इनामां जिखिल्लीं. हें पळेवन ईथना भितर एक खुमखुमी भरली आनी आपणेंय इनामां जिखचीं अशें ताका दिसूंक लागलें. एड्रीकाक पळोवन खेळूंक शिकिल्ल्या ईथनान 2017 इस्वेंत पिरायेच्या 6 व्या वर्साच नांव मेळोवंक सुरू केलें. कोविडा वेळार ताणें खेळाचेर चडूच लक्ष घालें आनी 2022 वर्सा मानांकन मेळयलें. ताणें शारजाह मास्टर्सांत ऑगस्ट 2023 वर्सा पयलें आंतरराष्ट्रीय मास्टर मानांकन मेळयलें. ताणें आपलें दुसरें मानांकन तीन म्हयन्यां उपरांत नोव्हेंबरांत मेळयलें, आनी निमाणें मानांकन 3 जानेवारी 2024 दिसा मेळयलें. सप्टेंबर 2024-त ताणें राष्ट्रकुल बुद्धीबळ चॅम्पियनशिपींतल्या 16 वर्सां सकयल्या विभागांत भांगरा पदक जिखलें.
ईथन आमच्या दोळ्यां मुखार वाडला आनी तो बुद्धीबळ खेळांत नांव जोडूंक आदीं थावन सपनेतालो. बारा वर्सां पिरायेरूच ताणें आंतरराश्ट्रीक मास्टर म्हण बिरूद मेळयलें, तेन्नाय हें बिरूद मेळोवपी तो सगळ्यांत ल्हान बुद्धीबळ खेळगडो आशिल्लो. 2025 वर्सा ताणें अस्तंत आशियांतल्या युवा बुद्धीबळ सर्तींत ५ पदकां मेळयलीं. फकत 14 वर्सां पिरायेचेर ईथन संवसारांतल्या एलिट बुद्धीबळ खेळगड्याच्या पंगडांत सामील जालो आनी तेच बराबर भारताच्या जागतीक बुद्धीबळांतली एक म्हासत्ता म्हणून उल्लेखनीय उदरगतीक आनीक एका महत्त्वपूर्ण टप्प्याची भर घाली.
शांत आनी थोडींच उतरां उलोवपी ईथन म्हणटा, “बुद्धीबळ खेळपाक सुरवात केले उपरांत म्हजें ध्येय आशिल्लें बुद्धीबळांत व्हड कामगिरी करून दाखोवंक आनी ग्रॅण्डमास्टर हें पदक मेळोवंक, आतां तें मेळयिल्ल्यान म्हाका खोस जाता. म्हज्या खेळाचेर हांव आनीक काम करतलों आनी संवसारीक विजेतो जावपाचें सपन साध्य करूंक यत्न करतलों.” सातत्य आनी आत्मविस्वास बाळगुपी ईथन सदांच आपल्या आवय- बापाय कडेन खाल्तीकायेन वागता.
ईथनाची कामगिरी पळोवन ताचो बापूय एडवीन वाझ खूब खोशी आसा. तो म्हणटा, “ल्हानपणा थावन ईथनाक बुद्धीबळ खेळाचो मोग. पिरायेच्या सात वर्सां सावन संवसारांतल्या सगळ्यांत तरणाटो ग्रॅण्डमास्टर जावपाचो ताचो हेतू आशिल्लो. अमेरिका- इराण झुजाक लागून ताच्या खेळांत खंड पडलो. एके भशेन गाडीच पटरी वेल्यान निसरली अशी. ना जाल्यार ताची कामगिरी आनीक बरी आसतली आशिल्ली. कोवीड- 19 माहामारीन तर ताचीं दोन वर्सां सामकीं खालीं, ही वेगळी काणी. ताचे भायर अर्थीक अडचणीं सयत हेर सगळ्यो अडचणी आसून लेगीत ईथनान इतली व्हड कामगिरी केली हाचे विशीं आमी समाधानी आसात. तो आमचे अपेक्षे परस चड बरो खेळ्ळो आनी ताणें सगळ्या वेव्हारीक अपेक्षां परस चड मेळोवन घेतलें, हाचो आमकां अभिमान भोगता.”
ईथनान जो मान जोडला तो फकत रायकारांनीच न्हय तर पुराय भारतीयांनी ताचो अभिमान बाळगूंक फावो. असलीं मोतयां चुकून कोणाच्या तरी घराब्यांत जल्मांक येतात. म्हणून एडवीन बाब आनी लिंदा बायेक परबीं. बुद्धीबळ खेळाचें ताचे भितर मुळावण घालपी ताच्या भावाकूय एड्रीकाक परबीं. ल्हान भुरग्यांनी ईथनाची देख घेवंची आनी शिक्षणा भायर आपल्या जिवितांत कितें तरी वेगळें करूंक वावुरचें. जेणे करून तुमकांय संवसारीक पावंड्यार परजळूंक सुयोग फावो जातलो. हेच सुसंदीच्या म्हालवजार एक विनवणी करूंक सोदतां, पालकांनी तशेंच शिक्षकांनी भुरग्यांक खेळांमळार आपलें नांव कांतोवंक तांकां प्रोत्साहीत करचीं. तेच बराबर, रायचो तरणाटो वाग ईथन बुद्धीबळ खेळांत आनीक मुखार पावचो आनी ताणें आपल्या जिवितांत आनिकूय पाखां जोडचीं अशी आस्त बाळगितां.
—-
– विन्सी क्वाद्रूस, राय, साश्ट
मो. – 9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
