भांगरभूंय | प्रतिनिधी
वाळपय: गोंय सरकारा वतीन गोंयभर राबयतल्या जनकल्याण कार्यावळी खाला आयज (बिरेस्तारा) सकाळीं 10 वरांचेर वाळपयच्या कदंब बस स्टॅण्ड वाठारांत सत्तरी म्हालांतल्या नागरिकां खातीर विशेश कार्यावळीचें आयोजन केलां. सरकाराच्या विवीध लोककल्याण येवजण्यांची म्हायती लोकां मेरेन पावोवपा बराबरच सत्तरी म्हालांतल्या विवीध मळार बरें कार्य करपी व्यक्तीमत्वांचो भोवमान हे कार्यावळींत करतले.
ह्या कार्यावळीचें उक्तावण भलायकी मंत्री विश्वजीत राणे आनी पर्यें मतदारसंघांच्यो आमदार डॉ. देविया राणे हांचे हस्तुकीं जातलें. विवीध सरकारी विभागांचे अधिकारी, लोकप्रतिनिधी, ग्रामपंचायत प्रतिनिधी आनी व्हड संख्येन नागरीक हाजीर रावतले.
कार्यावळींत ‘म्हजें घर’ येवजण आनी किसान क्रेडीट कार्ट (केसीसी) हे विशीं लोकजागृताय करतले. ‘म्हजें घर’ येवजणेचो लाव घेवपा खातीर गरजेची पात्रताय, अर्ज प्रक्रिया, गरजेचीं कागदपत्रां, अर्थीक सहाय्य आनी येवजणेचो लाव कसो मेळोवप हाची विस्तारान म्हायती संबंदीत अधिकारी नागरिकांक दितले. तशेंच शेतकारां खातीर किसान क्रेडीट कार्ड येवजणे खाला सुलभ अशी रिणाची सुविधा, शेतां खातीर अर्थीक मजत आनी बँकींग सुविधे विशींय मार्गदर्शन करतले.
सरकाराच्यो कल्याणकारी येवजण्यो समाजांतल्या दरेक घटकां मेरेन पावच्यो हो हे कार्यावळी फाटलो मुखेल उद्देश आशिल्ल्याचें आयोजकांनी सांगलें.
ह्याच कार्यावळींत सत्तरी म्हालांतल्या विवीध मळार तोखणायेचें कार्य करून राज्य, राष्ट्रीय तशेंच आंतरराष्ट्रीय पांवड्यार आपली म्होर उमठावपी व्यक्तीमत्वांचो विशेश भोवमान करतले. तांच्या कार्याची समाजान दाखल घेवची, तांच्या यशाची म्हायती नव्या पिळगे मेरेन पावची आनी गांवगिऱ्या वाठारांतले तरणाटे-तरणाट्यो हांकां प्रेरणा मेळची ह्या उद्देशान हो भोवमान सुवाळो आयोजीत केला.
भौवमाना खातीर निवड जाल्ल्या व्यक्ती मदीं अंकिता माजीक (केरी) हांचो भरतनाट्यम मळार राष्ट्रीय आनी आंतरराष्ट्रीय पांवड्या वेल्या तोखणायेच्या कार्या खातीर आस्पाव आसा. भारतीय शास्त्रीय नृत्याचो सांबाळ, संवर्धन आनी प्रसारा खातीर तांणी सेगीत योगदान दिलां आनी खूबशे प्रतिश्ठीत सांस्कृतीक माचयांचेर गोंयचें प्रतिनिधित्व केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
