भांगरभूंय | प्रतिनिधी
पोस्टमार्टेम रिपोर्टांत मरणाचें कारण स्पश्ट
म्हापशें ः कळंगुटेच्या एका रिसॉर्टांत मालपे उडुपी हांगचे वॉटर स्पोर्टस् बोट वेवसायीक संदीप सलायम हाका दुबावीत तरेन मरण आयलां. संदीप हो कर्नाटकांतल्या एका मंत्र्यांचो आदलो वाहन चालक. पोस्टमार्टम रिपोर्टांत संदीपाच्या मरणाचें कारण दोतोरांनी स्पश्ट करूंक नाशिल्ल्यान हे घडणुकेंत गुढ निर्माण जालां.
मंगळारा रातच्या सुमार १० वरांचेर ही घडणूक उक्तडार आयली. संदीप रिसॉर्टचे कुडींत मरण आयिल्ले अवस्थेंत सांपडले उपरांत हॉटेल वेवस्थापनान हे विशींची म्हायती पुलिसांक दिली. म्हायती मेळ्ळे उपरांत कळंगूटे पुलीस घडणुके सुवातेर दाखल जाले आनी तांणी पंचनामो करून कूड बांबोळे पोस्टमार्टेमा खातीर धाडिल्ली. थंय बुधवारा सकाळीं ताचे कुडीचेर पोस्टमार्टेम जालो. मात दोतोरांनी पोस्टमार्टेम रिपोर्टांत मरणाचें कारण स्पश्ट करूंक ना. जाल्यार फुडले फॉरेन्सीक तपासणे खातीर व्हिसेरा राखून दवरला. ह्या प्रकरणाचो फुडलो तपास पुलीस निरीक्षक लक्षी आमोणकार हांच्या मार्गदर्शना खाला उपनिरीक्षक परेश सिनारी हे करतात.
मजगतीं, संदीप मलायम हो आपलीं भावंडां आनी इश्टां वांगडा उडुपीच्यान गोंयांत पर्यटना खातीर आयिल्लो. सोमारा २९ तारखेर ते कॅसिनोंत गेले. थंयच्यान मंगळारा सकाळीं हे सगळे कळंगूटे आयले. संदीप हांचे वांगडा एक बायल आशिल्ली. हाका लागून तो घडणुके सुवातेवेल्या रिसॉर्टांत देंवलो. जाल्यार ताचे भाव आनी इश्ट दुसर्या हॉटेलांत रावपाक गेले.
ह्या रिसॉर्टांतल्यान संदीप मलायम हो मंगळारा सकाळीं ११.३० च्या सुमारास चेक इन जाल्लो. सांजेवेळार सुमार ६ वरांचेर तो फोन घेनाशिल्ल्याचें पळोवन ताचे वांगडा आयिल्लो गट त्या रिसॉर्टार आयलो. तांणी रिसॉर्ट वेवस्थापनाक आपलो भाव फोन उखलिना म्हूण सांगलें. मात रिसॉर्टच्या कर्मचार्यांनी तांकां कुडींत मेळपाक वचपाक न्हयकार दिलो. हाका लागून ते फाटीं सरले. ताचे पयलीं सांजेवेळार सुमार ४ वरांचेर मरण आयिल्ल्या संदीपा वांगडा आशिल्ली ती बायल हॉटेलांतल्यान भायर सरिल्ली.
उपरांत सेगीत फोन करूनय संदीप फोन घेना म्हूण ते परत रिसॉर्टार आयले. तांणी हॉटेल व्यवस्थापना कडेन मागणी केली तेन्ना कुडीचें दार उगडलें. तेन्ना संदीप खाटीचेर पडिल्लो दिसलो.
मजगतीं, पंचनाम्या वेळार पुलिसांक घडणुके सुवातेर सिगारेट आनी सोर्याच्यो बाटल्यो मेळिल्ल्यो. संदीपान कॅसिनो आनी हॉटेलांत बरोच सोरो पियेल्ल्याचें पुलीस चवकशेंत दिसून आयलें. मात, पोस्टमार्टेमा वेळार संदीपाक खंयच्या काराणाक लागून मरण आयलां हें स्पश्ट करूंक नाशिल्ल्यान पुलिसां मुखार नेमकें कारण सोदून काडपाचें आव्हान आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
