भांगरभूंय | प्रतिनिधी
तुयेंच्या इलेक्ट्राॅनिक्स मॅन्युफॅक्चरींग क्लस्टरांत (ईएमसी) बरींच वर्सां वापराविणें आशिल्ले प्लाॅट सरकारान परतून घेवपाची शिटकावणी दिल्या. प्लाॅट घेवनूय बऱ्याच जाणांनी थंय उद्देग सुरू करूंक नात. नव्या गुंतवणुकदारांक त्या प्लाॅटांचें फेरवांटप जातलें. म्हायती तंत्रज्ञान मंत्री रोहन खंवटे हांणी काल हें सांगलें. फक्त तुयें ईएमसींतले न्हय, तर सगल्याच उद्देगीक वसणुकांनीय कितले प्लाॅट रिकामी आसात…. ताची म्हायती घेवन सरकारान फुडलीं पावलां उबारपाचो वेळ आयला. कारण बेरोजगारी वाडत आसा. ताका लागून राज्यांत इलेक्ट्राॅनिक्स, आयटी मळा वयल्यो बऱ्यांतल्यो बऱ्यो कंपनीं येवपाची गरज आसा. पुणें, बंगळुरू, हैदराबादांत उद्देग आसात, तशे गोंयांतूय सुरू जावचे. तातूंत पगार बरो मेळटा, म्हणटकच सरकारी नोकरेचें आकर्शण इल्लें तरी उणें जातलें. अर्थांत ‘फाल्यां यो, च्यावेक गेला, नेटवर्क ना’, असल्या ब्रह्मवाक्यांचेर बंदी आशिल्ल्या ह्या उद्देगांनी मान मोडसर काम करचें पडटलें!!
तुयें ईएमसी हो तसो म्हत्वाकांक्षी प्रकल्प. सादारण स लाख चौखण मिटर जमनीचेर तो उबो आसा. पुराय तांकीन चल्ल्यार हांगा सादारण तीन हजार तरी नोकऱ्यो मेळुये. सरकारी म्हायती प्रमाण, हांगाचें सुविधा उबारपाचें काम 90 टक्के पूर्ण जालां. 50 तले 17 प्लाॅटांचें वांटपूय जालां. मात कांय जाणांनी अजून उद्देग सुरू करुंक नात. हे पडून आशिल्ले प्लाॅट आतां ताब्यांत घेतले. मात तांचे धनी ‘पावस वचुंदी, करता सुरू’ म्हणीत जाल्यार कितें करतले? ह्या प्रकल्पाक गती मेळची. तिवूय बी वेंचणूक जाहीर जावचे पयलीं. इलेक्ट्राॅनिक्स, आयटी, विमान- रेल्वे कडेन संबंदीत प्रदुशण नाशिल्ले उद्देग हांगा येवप गरजेचें. कश्टाचें काम करपी गोंयकार आतां उरूंक नात. म्हणटकच व्हायट काॅलर नोकऱ्यो दिवपी प्रकल्प राज्यांत येवंक जाय. सगल्यो सरकारी सेवा आॅनलायन दिवन इंटरनेट मळाचेर क्रांती घडोवपाची संद आमकां आसा. देखून केबलाचें जाळें विणपाचें काम राज्यभरांत फाटलीं कांय वर्सां चालू आसा. ताकाय गती मेळची.
तुयें प्रमाण राज्यांतल्या सगल्या 23 उद्देगीक वसणुकांनी कितले प्लाॅट उरल्यात, कितले वापराविणें आसात, ताचो नियाळ घेवपाची गरज आसा. गोंयांत आतां थोडोच जागो उरला. तो विकपाचें सत्र चालू आसा. आतां उद्देगां खातीर जमीनूच उरूंक ना, असो दावो थोडे करतात. पूण, सरकारी आंकडेवारी प्रमाण, 417 प्लाॅट रिकामी आसात. 209 वांटल्यात. तातूंत तण, झिली, झाडां वाडल्यांत, तर 319 प्लाॅट बंद उद्देगांच्या ताब्यांत आसात. हे 945 प्लाॅट जाले. निवासी प्रकल्पांक ज्या वेगान जमनी विकप चल्लां, ताचे परस तिपेट वेगान ही पडून आशिल्ली उद्देगीक जमीन विकसीत जावची. हे सुस्त न्हिदिल्ले प्लाॅट जागे जाल्यार नवे गुंतवणुकीक चालना मेळटली. रोजगाराची त्सुनामीय येतली. आयडीसीन कामाक लागचेंच.
उद्देगीक वसणुकांनी सादारण 3011 प्लाॅट आसात. 2066 प्लाॅटांचेर उद्देग सुरू आसात. 417 रिकामी आसात. 319 बंद वा दुयेंत उद्देग म्हूण जाहीर केल्यात. वांटप जावनूय पडून आशिल्ले 209 प्लाॅट आसात. म्हणल्यार एक तृतियांश जमनींचेर नव्या उद्देगांक हांत पाय पातळपाची संद आसा. उद्देगीक वसणुकांनी कितले कामगार काम करतात, तो आंकडो सरकारी यंत्रणां कडेन आसतलोच, पूण अदमासा प्रमाण 60 हजार प्रत्यक्ष आनी 40 हजार अप्रत्यक्ष रोजगार मेळ्ळा आसतलोच! वेर्णेंची उद्देगीक वसणूक हातूंत आघाडेचेर. थंय नामनेचे कारखाने, उद्देग आसात. उत्पादन, निर्गत, येणावळ, रोजगाराचे बाबतींत तीच सगल्यांत मुखार आसा. कुंडय, पिळर्ण, कुंकळ्ळीय फाटीं नात. रिकामी जागे उरल्यात, ते भरपा खातीर नेम इल्ले सदळ करूं येतात. गोंयकार उद्देजकांक, तरणाट्यांक हांगा प्राधान्य
मात मेळपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
