भांगरभूंय | प्रतिनिधी
देव दिता आनी देंवचार नाडटा अशी एक म्हण आसा. हांगा मात्सो बदल करून म्हणचें पडटलें, सरकार दिता आनी देंवचार नाडटा. सरकार काय बरो आयआयटी सारकेलो प्रकल्प आमकां दिवंक सोदता आनी कांय सभागे तो नाका म्हूण शबय घालतात आनी कारण कितें काय म्हणल्यार देंवचाराची भोंवपाची वाट खंय बंद जातली. जो गांवची राखण करता ताचीच राखण करूंक लोक एकठांय जातात. कितें म्हणप हाका तेंच कळना. कोणतरी एकलो शाणो व्हिडियो काडून विचारता, ताका वेलंगां वचपाचें जालें तर ताणें कशें वचपाचें? कितें म्हणप आतां असल्या मनशाक? ताका खबर आसूंक जाय आसलें दर गांवचो राखणदार वेगळो आसता. कटमगाळ आनी झुजांगाळ वेगळे वाठार. दोनूय कडले राखणदार वेगळे. कटमदादाक गोडश्या निवेद्य दाखयतात जाल्यार झुजांगाळींतल्या देंवचाराक वेलंगेचे लोक कोंबे कापतात. इतलेंच कित्याक हो शिमे वयलो वेगळो आनी गांवांत आशिल्लो साखळयो वेगळो. एकलोय दुसऱ्याची शीम हुपना. आनी हें खबर आसतनाय बेठेच लोकांक चाळोवन घालूंक कितेंय सांगप? तुमचो विरोध आयआयटीक मगा, मागीर तो करात पूण देव, देंवचार हांकां भितर घेवं नाकात. ते समर्थ आसात. तांची वाट कोणूच आडावंक शकनात.
गोंयच्या लोकांनी पळे आयआयटीची धजा उडयल्या ती पळेल्यार गोंयकारांक आयआयटी नाकाच अशें दिसूंक लागलां. आतां आयआयटी म्हणल्यार कितें हेंच जर आमकां खबर ना जाल्यार तो आमचो दोश न्हय. आमकां कॅसिनो चलतात. थंय वचून कोण गाराणींय घालिनात वा फुगड्योय घालिनात. विरोध जाता तो शिक्षणीक प्रकल्पाक. गोंयांत सद्याक कितल्यो तरी खाजगी युनिव्हर्सिटी आयल्यात. पारूल, गणपत ह्या नांवांनी येवपी जायराती आमी वाचतात. थंय भुरगीं एडमिशनांय घेतात. गोंयांत कितलीं तरी व्हड व्हड शिक्षणीक आस्थापनां आयलीं आनी सुरूय जालीं. तांणी कितले तरी जागे हडप केले पूण कोणेच विरोध केलो ना. विरोध फक्त आयआयटीक. कित्याक जाता काय हो विरोध? कसलें राजकारण दडलां हातूंत? आयआयटी प्रकल्प कोणाक आनी कित्याक नाका तेंच कळना. राजकारणी लोकांचें एक समजूं येता. वेंचणूक लागीं आसा म्हणटकूच तांकां सरकाराक विरोध करूंक कितें तरी निमित्त जायच. पूण हेरांचें कितें, तांणी मात तरी समजूंक नाका?
कितलीं वर्सां जालीं बाबडी आयआयटी इल्लो जागो मेळत व्हय जागो करीत गोंयभर भोंवता. आनी दर एके सुवातेर तिका विरोध जाता. दोंगर कापतात वा शेतां पुरयतात अशे वेळार सैम सांबाळूंक जावपी विरोध समजूं येता. पूण दर फावटी कारणा बगर विरोध करप कितलें सारकें? आयआयटी गोंयांत चालू आसा. दर वर्सा जायते विद्यार्थी आयआयटींत शिकप घेतात. आतां तिका स्वताचें घर जाय जाल्यार ताका विरोध. फर्मागुडयेर पयलीं सावन इंजिनियरींग कॉलेज आसा आनी हेच वास्तूंत आयआयटी चलता. आतां थंय तेंकुनूच जर आयआयटी येता तर ताका विरोध कित्याक जावचो? ह्या प्रकल्पाक तेंकुनूच कोणे कितले प्लॉट करून विकले हें ह्या विरोध करप्यांक खबर आसा? जे कोण विरोध करूंक गेल्ले तांणी थंय वतना रस्त्याचे कुशीक नदर मारल्या? थंय आयिल्ले आनी येवपी घरप्रकल्प पळेल्यात? हो दोंगर फोडून, काजी कापून जेन्ना प्लॉट जाताले तेन्ना कोणेच जाप काडली ना. थंय विरोध जालो ना आनी आतां आयआयटीक विरोध?
हें अशेंच घडत रावलें जाल्यार आयआयटी जावंक पावतली? गोंयकारांक आयआयटी नाकाच असो ताचो अर्थ जालो ना? सुरवेक शिक्षणीक हबाचीं सपनां पळोवपी काणकोणां जागो पळेलो. पूण थंयच्या लोकांक आयआयटी नाका जाली. काणकोणाक कित्याक कोण जाणा कांयच नाका जालां. तशे काणकोणचे लोक खूब हुशार. पूण एक रवींद्र भवन सोडल्यार तांणी खंयच्याच प्रकल्पाक येवकार दिवंक ना. काणकोणां पयलीं एनआयटी येवची आसली. पूण थंय जाल्ल्या विरोधाक लागून कुंकळ्ळे पावली. उपरांत आयआयटी आयली तिकाय विरोध. आतांय येवंक सोदपी फिल्म सिटीकूय तांचो विरोध चल्लाच. आतां कुंकळ्ळी एनआयटीचो कारभार पळेत जाल्यार गोंयकारांक असल्या प्रकल्पांनी कसलोच लाव ना म्हणपाचें सगल्यांक कळ्ळां.
उपरांत सत्तरीच्या बाबान आयआयटी आपले थंय व्हरपाचें सपन पळेलें. आतां सत्तरी म्हणली म्हणजे बाबा करता ती पूर्वदिशा अशें दिसतालें, पूण हांगाय विरोध जालो, सामको खर विरोध. पुलिशे वांगडा लटाफटी जाल्यो आनी लोकांक मारूय पडलो. तांचेर केसीय घाल्यो. पूण लोक फाटीं सरले नात. उरफाटें बाबाकूच फाटीं सरचें पडलें. उपरांत आयआयटीक सांगेंचें सपन पडलें. सांगेंच्या आमदारान तर तिका सांग्यारूच मुक्कामाक व्हरपाचो हट्ट धरलो. ताणें आयआयटी खातीर आपली प्रतिश्ठाच पणाक लायिल्ली म्हणल्यार जाता. पूण ताचेंय सपन फळादीक जावंक पावलें ना. परतून एकदां आयआयटी काणकोण वता अशें कानार पडटालें इतल्यान शिरोडेंच्या आमदारान तिका बेतोड्यां-कोडार स्थानापन्न करपाचें थारायलें. शिरोडा मतदारसंघांत सुभाषभाऊन कांय शिक्षणीक कॉलेजी सुरू करून शिरोड्याक शिक्षणीक हब केलांच, तातूंत आयआयटीची भर पडिल्ली जाल्यार आनीक बरें जावपाचें. पूण हांगाच्याय लोकांनी विरोध सुरू केलो. आनी प्रकल्प रद्द करून घेतलो.
आनी आतां फर्मागुडी. हांगा तरी आयआयटीक विरोध जावचो ना काय दिशिल्लें. पूण कोणतरी उठलोच. आनी मजा म्हणल्यार लोकूच ताचे फाटल्यान धांवले. एके वटेन खाजगी विद्यापिठांक जमनी मेळटा. तांकां काय कोणे विरोध केल्लो दिसना. हालींच पारूल विद्यापिठाचें उकतावन जालें. एक खाजगी विद्यापीठ, जालें बांदून. कोणे विरोध केलो? ना! हांगाय म्हणून थळाव्यांक वा गोंयकारांक कसलोच लाव जावपाचो ना. हांगा जे भुरगे शिकतले तेय हेर कडलेच. पूण ह्या प्रकल्पाक कोणेच विरोध केलो ना. तांकां जाय ती जमीन मेळ्ळी आनी विद्यापीठ सुरूय जालें. अशें जर जावं येता जाल्यार आयआयटीक विरोध कित्याक?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
