भांगरभूंय | प्रतिनिधी
पणजीः वेंचून आयले उपरांत आमदार राजेश फळदेसाय हांणी काँग्रेस सोडून भाजपांत प्रवेश केल्ल्यान परतून जिखून येवपा खातीर तांकां बरेच कश्ट करचे पडटले. कुमारजुंवें मतदारसंघांत सध्या तरी भाजपाची उमेदवारी राजेश फळदेसाय हांकांच मेळपाची नक्की दिसता. काँग्रेसीचो विचार करीत जाल्यार समील वळवयकार हे उमेदवारी खातीर इत्सूक आसात. ते भायर गोवा फॉरवर्डाचे कृष्णा ऊर्फ विठ्ठल परब आनी रोहन हरमलकार हे इत्सूक आसात. विरोधकां मदीं मतविभागणी जाली जाल्यार ती राजेश फळदेसाय हांच्या पथ्यार पडपाची शक्यताय आसा.
तिसवाडी म्हालांत पणजी, ताळगांव, सांत आंद्रें, सांता क्रुझ आनी कुमारजुंवें हे पांच मतदारसंघ येतात. ह्या पांचूय मतदारसंघांनी ख्रिस्ती मतदारांचो आंकडो व्हड आसा. फक्त सांत आंद्रें मतदारसंघ सोडलो जाल्यार हेर कडेन भाजपाचे आमदार आसात. पणजी, ताळगांव, सांता क्रुझ आनी कुमारजुंवें ह्या चार मतदारसंघांचेर भाजपाचे आमदार आसात. सांत आंद्रें मतदारसंघांत आरजीचो आमदार आसा.
कुमारजुंवें मतदारसंघांत पोरणें गोंय, खोर्ली, धुळापी, दिवाडी, सांत इस्तेंव ह्या वाठारांचो आस्पाव जाता.
रस्त्यांचे रुंदीकरण, कोयराची समस्या, बेरोजगारी तशेंच प्रस्तावीत बायंगिणी कोयर प्रकल्प हे मतदारसंघांत म्हत्वाचे मुद्दे आसात. बायंगिणी कोयर प्रकल्पाक थळाव्या लोकांचो विरोध आसा. पोरणें गोंय चर्च ही वास्तू संवसारीक दायज थळ आसा. चर्चीच्या वाठारांत कोयर प्रकल्प जावप अयोग्य आसा. आमदार राजेश फळदेसाय हांणी लेगीत विधानसभेंत कोयर प्रकल्पाक विरोध केला. अशें आसून लेगीत बायंगिणी कोयर प्रकल्प जातलोच अशी भुमिका कोयर वेवस्थापन खात्याचे मंत्री बाबूश मोंसेरात हांणी घेतल्या.
सध्या हो विशय चर्चेंत नासलो तरी वेंचणुकेंत हो मुद्दाे आसतलोच. सरकार भाजपाचें आसा आनी आमदार राजेश फळदेसाय हे लेगीत भाजपांत आशिल्ल्यान बायंगिणी कोयर प्रकल्प तांकां आडखळीचो थारतलो. हो प्रकल्प रद्द करपाक तांकां अजून येस येवंक ना. तशेंच खोर्ली उद्देगीक वसणुकेंतले चडशे उद्देग बंद आसात. हे उद्देग सुरू करप वा नवे उद्देग आयले जाल्यार कांय प्रमाणांत रोजगार उपलब्ध जावप शक्य आसा. खोर्ली उद्देगीक वसणुकेंत ऊर्जीतावस्था हाडपाक फावो त्या प्रमाणांत फळदेसाय हांकां येस येवंक ना. दिवाडी, सांत इस्तेंवच्या लोकांक भलायकी सुविधां खातीर फेरीबोटीतल्यान खोर्ले येवचें पडटा. हाका लागून दिवाडी, सांत इस्तेंव वाठारांत भलायकी केंद्र स्थापन करपाचे फळदेसाय हांचे येत्न आसात. भलायकी केंद्र उबारपाक लेगीत तांकां येस येवंक ना.
गवंडाळी रेल्वे उड्डाणपुलाचें काम नेटान सुरू आसा. हो पूल कुमारजुंवें मतदारसंघांत येता. हो पूल बेगीन पुराय जावचो म्हूण आमदार फळदेसाय हांचे येत्न आसात.
2022चे वेंचणुकेंत भाजपाची जनिता मडकयकार हांकां हारोवन राजेश फळदेसाय जैतिवंत जाल्ले. मात थोड्याच तेंपान हेर आमदारां सयत तांणी भाजपांत प्रवेश केल्लो. तांकां मंत्रीपद मेळूंक नासलें तरी पुनर्वसन म्हामंडळाचे ते अध्यक्ष आसात. उदरगती खातीर भाजपांत प्रवेश केल्ल्यान आतां तांकां उदरगती विशीं जाप दिवची पडटली. आयज मेरेन ज्या आमदारांनी काँग्रेसींतल्यान भाजपांत प्रवेश करून वेंचणूक लडयल्या, तांकां अपेसूच आयलां. हाका पांडुरंग मडकयकार हांचो अाडवाद आसा. मगो, काँग्रेस आनी भाजप ह्या तिनूय पक्षांचेर तांणी वेंचणूक जिखल्या. मात भलायकी इबाडिल्ल्यान तांकां मंत्रीपद सोडचें पडलें. तशेंच फाटले (2022) वेंचणुकेंत तांकां पक्षान उमेदवारी दिली ना. तांचे सुवातेर जनिता मडकयकार हांकां उमेदवारी दिली. राजेश फळदेसाय हे व्हड फरकान जैतिवंत जाले.
अंदूं भारतीय जनता पक्षा कडेन राजेश फळदेसाय हांचे तांकीचो उमेदवार आशिल्यान फळदेसाय हांकां भाजपाची उमेदवारी मेळप निश्चीत आसा. पक्षांतराक लागून तांचे आड आशिल्ल्या असंतोशाक ते कशें तोंड दितात, हाचेर तांचे येस अवलंबून आसा. फाटले वेंचणुकेंत भाजपान जनिता मडकयकार हांकां उमेदवारी दिल्ली. मात हे खेपे राजकी मळार त्यो सक्रीय नात.
काँग्रेसीचो विचार करीत जाल्यार समील वळवयकार हे संभाव्य उमेदवार म्हूण वावर करतात. फाटले खेपे तृणमूल काँग्रेसीच्या उमेदवारीचेर तांकां 3072 मतां मेळिल्लीं. तृणमूल काँग्रेस तशेंच तांचे चिन्न वळखीचें नासून लेगीत तांकां 3 हजारां वयर मतां मेळिल्लीं. काँग्रेसीची उमेदवारी मेळ्ळ्यार ते भाजपा मुखार आव्हान निर्माण करूंक शकतात.
गोवा फॉरवर्डाचे कृष्णा उर्फ विक्रम परब हे लेगीत इत्सूक आसात. जिल्हो पंचायत वेंचणुकेंत कृष्णा परब हांणी भाजपाचे सिद्धेश नायक हांकां घाम काडिल्लो. गोवा फॉरवर्डाच्या उमेदवारी खातीर ते इत्सूक आसात. सध्या तरी काँग्रेस – गोवा फॉरवर्ड पक्षां मदीं युती आसा. युती जाली ना आनी काँग्रेस तशेंच गोवा फॉरवर्डान स्वतंत्र उमेदवार उबे केले जाल्यार हाचो लाव भाजपाच्या राजेश फळदेसाय हांकां निश्चितपणान जातलो. भाजपाक हाराेवपा खातीर रणनिती म्हूण भाजप विरोधांतल्या पक्षांनी एकठांय येवपाक जाय. विरोधी पक्ष एकठांय आयले जाल्यार कुमारजुंवेंचो गड राखप भाजपाक कठीण वतलो.
जमीन हडप प्रकरणांतले दुबावीत रोहन हरमलकार हे लेगीत वेंचणूक लडोवपाक इत्सूक आसात. फाटले फावटी अपक्ष रावून तांणी 3870 मतां काडिल्लीं. सध्या तांचेर जमीन हडप प्रकरणाचे आरोप आसले तरी तांचो वावर सुरू आसा. अपक्ष म्हूण ते परतून वेंचणूक लडोवपाची शक्यताय आसा. फाटले वेंचणुकेंत अपक्ष रावून तांणी 3870 मतां घेतिल्लीं. हाचे वेल्यान मतदारसंघा वेलो तांच्या प्रभावाचो अदमास येता.
कुमारजुंवें मतदारसंघाचेर पांडुरंग मडकयकार हांचो मोठो प्रभाव आशिल्लो. तांणी मगो, काँग्रेस तशेंच भाजपाच्या उमेदवारीचेर जैत मेळयलां. मात भलायकेंत इबाड जाल्ल्यान फाटली वेंचणूक लडोवप तांकां शक्य जालें ना. तांचे सुवातेर भाजपान तांची घरकान्न जनिता मडकयकार हांकां उमेदवारी दिल्ली. हाका लागून काँग्रेसीचे राजेश फळदेसाय हांचे जैत सोंपें जालें. वेंचणुके उपरांत तांणी भाजपांत प्रवेश केलो. भाजपा कडेन जैत मेळोवपाच्या तांकीचो उमेदवार नाशिल्ल्यान हे खेपे राजेश फळदेसाय हांकांच उमेदवारी निश्चीत आसा. मात विरोधकांचे भुमिकेचेर तांचे येस निंबून आसा. फाटले खेपे आपान लेगीत वेंचणूक लडयिल्ली. आपाचे गोरखनाथ केरकार हांणी 1022 मतां मेळयिल्लीं. काँग्रेस, आप, गोवा फॉरवर्ड हांणी स्वतंत्रपणान वेंचणूक लडयली जाल्यार मतविभाजनाचो लाव राजेश फळदेसाय हांकां जातलो. मात विरोधकांची आघाडी वा युती जाली जाल्यार मात राजेश फळदेसाय हांकां धपको बसपाची शक्यताय आसा. कुमारजुंवें मतदारसंघांत पांडुरंग मडकयकार हांकांच लागून भाजपाक येस मेळ्ळां.
…………………………
2022चे विधानसभा वेंचणुकेंतलीं मतां
जनिता मडकयकार (भाजप) 3949
राजेश फळदेसाय (काँग्रेस) 6776
समील वळवयकार (तृणमूल) 3072
गोरखनाथ केरकार (आप) 1022
छगन नायक (अपक्ष) 2442
रोहन हरमलकार (अपक्ष) 3870
मारिया वारेला (अपक्ष) 91
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
