भांगरभूंय | प्रतिनिधी
एनएसयुआयची गोंय विद्यापीठाच्या कुलगूरूकडे कागाळ
पणजीः कांय पेपर उरल्यार तिसर्या वर्सांत फुडें धुकलपाची प्रक्रीया अधिसुचोवणी हाडून अचकीत रद्द केल्या. कसलीच कल्पना दिनासतना ही अधिसुचोवणी हाडिल्ल्यान सुमार ६० कायदो महाविद्यालयातले भुरगे अडचणीत पडल्यात. हे विशीं गोंय विद्यापीठाच्या कुलगूरून हस्तक्षेप करून हो प्रस्न सुटावो काडचो, अशी मागणी एनएसयुआयचे फुडारी कुमार गवळी हांणी केल्या.
एनएसयुआयचे फुडारी आनी पिडेस्त विद्यार्थ्यांच्या एका शिश्टमंडळान हे विशीं गोंय विद्यापीठांत कुलगूरूंची भेट घेतली. भेट घेतले उपरांत गवळी उलयताले.
तीन म्हयने जाले, कायदो महाविद्यालयाचे भुरगे न्याय मागपा खातीर फावटी मारतात. ते कुलगूरू, निबंधक आनी शिक्षण मंत्री जे मुख्यमंत्री आसात तांकांय वचून मेळ्ले, अशें गवळी हांणी सांगलें.
जे भुरगे पयले वर्स वा दुसरे वर्स नापास जाता तांकां तिसर्या वर्सांत फुडें धुकलतात. महाविद्यालयान अधिसुचोवणी काडून ही प्रक्रीया बंद करून ती वॅबसायटीचेर घातली. मात वॅबसायट चल नाशिल्ल्यान तांकां हे विशी कसलीच कल्पना नासली, असो आरोप गवळी हांणी केलो.
जेन्ना अधिसुचोवणी हाडटा तेन्ना भुरग्यांक जागृताय कार्यावळ दवरून सांगपाक जाय आशिल्लें, हे अधिसुचोवणे प्रमाण पयलें वर्स वा दुसर्या वर्सांत जर तुमचे पेपर उरल्यात जाल्यार त्या पेपरांत पयली पास जावचें पडटलें आनी उपरांत तिसर्या वर्सांत तुमकां प्रवेश मेळटलो. मात गोंयचे दोनूय कायदे महाविद्यालय व्ही. एम. साळगांवकार आनी कारे हांणी कसलींच जागृताय सत्रां घडोवंक नात, देखून विद्यार्थ्यांक हे विशीं कसलीच म्हायती नासली. देखून तांकां दिसलें, तांका तिसर्या वर्सांत प्रवेश मेळटलो, अशें रजाव गवळी हांणी दिले.
फुडल्या शिक्षणीक वर्सा खातीर विद्यार्थ्यांनी सेमिस्टाराचें शुल्क लेगीत भरलें तरी लेगीत हे अधिसुचोवणे विशीं तांकां कळीत करूंक ना. तिसर्या वर्सांत प्रवेश मेळचो ना हें कळ्ळे उपरांत ते प्राचार्य मुखार गेले. पूण प्राचार्यान हात वयर काडून आपल्याक कसलीच कल्पना नाशिल्ल्याचें विद्यार्थ्यांक सांगलें. महाविद्यालय जापसालदारकी घेयना म्हण जाप विचारपाक आमी कुलगूरूंक मेळपाक आयिल्ले, अशें गवळी हांणी सांगलें.
तीन म्हयने जाले भुरग्यांक ते वर्गात लेगीत घेनात. पावसांत महाविद्यालाया भायर रावचें पडटा. कुलगुरूंची भेट घेवन भुरग्यांनी आपल्यो कागाळी मांडल्यो. दोनय महाविद्यालयाचे प्रचार्यां वांगडा बसका घेवन हे विशीं सुटावो काडपाचे आस्वासन कुलगूरून दिलां, अशें गवळी हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
