भांगरभूंय | प्रतिनिधी
प्रस्तावीत आयआयटी प्रकल्पाक विरोध करचो न्हय
पणजी : फर्मागुडी हांगा प्रस्तावीत आयआयटीक लागून कटमगाळ दादाच्या पवित्र थळाक कसलोच धोको जावचो ना. कटमगाळ दादाच्या थळाचो जागो सोडून आयआयटी कॅम्पस जातलो. लोकांनी विरोधा खातीर विरोध करचो न्हय, असो उलो मुख्यमंत्री डॉ. प्रमोद सावंत हांणी केला.
आयआयटीच्या कॅम्पसा खातीर सरकारान फर्मागुडयेर अभियांत्रिकी म्हाविद्यालया लागच्या जमनीची निवड केल्या. आयआयटी जाली जाल्यार कटमगाळ दादाच्या पवित्र थळाक धोको निर्माण जातलो, अशी भिरांत लोकां मदीं आसा. हाका लागून आयतारा थळाव्या लोकांनी कटमगाळ दादा कडेन गाराणें घालून प्रकल्पाक विरोध केलो. आरजीचे आमदार विरेश बोरकार हांणी लेगीत विरोध करपी लोकांक तेंको दिलो. हे फांटभूयेर आयआयटीक लागून कटमगाळ दादाच्या थळाक कसलोच धोको निर्माण जावचो ना, अशें डॉ. सावंत हांणी स्पश्ट केलां.
वीजमंत्री आनी आमदार सुदिन ढवळीकार तशेंच आमदार गोविंद गावडे ह्या दोनूय आमदारांकडेन हांवें चर्चा केल्या. पुराय आयआयटीचो प्रकल्प हो सरकारी जाग्याचेर जाता. कटमगाळ दादाक हांव लेगीत मानता. जे लोक केन्नाच थंय वचूंक नाशिल्लेे ते लोक विरोध करपा खातीर पावले. लोकांच्यो भावना भडकावन घालच्यो न्हय, असो उलो डॉ. सावंत हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
