भांगरभूंय | प्रतिनिधी
सत्तरी: सत्तरीच्या ठाणे ग्रामपंचायत वाठारांतल्या सुर्ला गांवा लागसार म्हादय अभयारण्याच्या वाठारांत आशिल्ल्या बाराजण घसघश्याचेर आयतारा दनपरां एकलो बुडलो. बेळगांवच्या आपल्या इश्टां वांगडा ह्या घसघश्याचेर न्हांवपाक आयिल्ल्या आदित्य दीपक कुमार सत्पती (२०, मूळ ओडिशा) हाका बुडून मरण आयलें. काल रातभर आनी आयज दीसभर सोदून पुलिसांक ताची कूड दनपरां मेळ्ळी.
हे विशीं चड म्हायती प्रमाण, बाराजण घसघश्याचेर आयतारा बेळगांवच्या इश्टांचो ग्रुप न्हांवपा खातीर आयिल्लो. बेळगावच्यान आपल्या इश्टां वांगडा आयिल्लो २० वर्सां पिरायेचो आदित्य हाचो उदकांत देंवले उपरांत अचकीत ताचो तोल गेलो आनी आनी तो बुडलो. ताका ताच्या इश्टांनी वाटावपाचो यत्न केलो. मात उदकाचो प्रवाह वेगान आनी खोलाय चड आशिल्ल्यान तांकां अपेस आयलें.
उपरांत वाळपय उजो पालोवपी दळ, पुलीस आनी थळाव्या नागरिकां वांगडा बेळगांवच्या नौदळाच्या प्रशिक्षीत जवानांनी बेगोबेग सोद कार्य सुरू केलें. तातडीने शोधकार्य सुरू केलें. मात, रातच्या काळखाक लागून आनी उदकाचो प्रवाह बरोच आशिल्ल्यान ही मोहीम रातची बंद दवरली. मात आयज, २९ जुलयाच्या सकाळ सावन बुडिल्ल्या आदित्त्याचो सोद घेवप चालूच आशिल्लें. निमाणो सोमारा दनपरां ताची कूड सांपडली. उपरांत उजो पालोवपी दळाच्या जवानांनी आनी नौदळ पंगडान ती भायर काडली.
मजगतीं, ह्या घसघश्याचेर वचपाक प्रशासनान पुरायेन बंदी घातल्या. तरी सुमार देडशें ते दोनशें पर्यटकांनी रान कर्मचार्यांच्या सुचवण्यां कडेन आडनदर करून ह्या घसघश्याचेर प्रवेश केलो.
आदित्याचे बापूय निवृत्त नौदळ अधिकारी आसा. हे घडणुकेक लागून तांच्या कुटुंबाचेर दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
