भांगरभूंय | प्रतिनिधी
जू न 21, आंतरराष्ट्रीय योग दीस, आमी संवसारा वांगडा उमेदीन मनयलो. प्रधानमंत्री मोदीजींनी कोलकात्यांत व्हड दबाज्यान आसनां करून योग दाखयलो आनी शिकयलो. योग विद्येक आज बरे दीस आयल्यात. योगांत करियर जावपाक शकता काय? हे विशीं विचार करपाचो वेळ आयल्या. पतंजली हें नांव योग विद्ये कडेन जोडिल्लें आसून, ताचे पुराय श्रेय रामदेव बाबाक वता, हातूंत मात्तूय दुबाव ना. गावागावांनी पतंजलीचे प्रतिनिधी योगाचो प्रसार करीत आसात. हातूंतल्या बायलां मदीं एक म्हणल्यार कांदोळेची आदली शिक्षिका, सौ. शिरोडकर. आपल्या कारकिर्दींत तिणें जायते योग शिक्षक आनी विद्यार्थी तयार केल्यात.
योगविद्या ही भारताने संवसाराक दिल्ली एक व्हड भेट. शरीर आनी मन थंड आनी शांत रावचें, म्हणून आदल्या जाणट्यांनी ही विद्या जगा फुडें हाडली. हातूंत ऋषी- मुनींचो वांटो मोठो आसा. आदीं ही विद्या आपले मेरेनूच मर्यादित आशिल्ली. पुण्यांत बी एस केअय्यंगार हे खूब वर्सां पयलीं योग विद्या सगळ्यांक फुकट शिकयताले, हें पळोवन कांय अमेरिकन लोक तांचे कडे शिकले आनी उपरांत अमेरिकेत वचून फी लावन ती विद्या शिकोवंक लागले.
योगाचे जायते प्रकार आसात, देखीक : राजयोग, कर्मयोग, ज्ञानयोग, भक्तीयोग आनी हटयोग. जांकां जो मानवता, तो ते प्रकार वेंचून शिकतात. आमकां हटयोगाचो चड परिचय आसून, हातूंत विंगडविंगड आसनां आनी प्राणायामाचो आस्पाव जाता.
सौ. शिरोडकर ह्यो एक आदर्श शिक्षिका आसात. योग शिक्षक जाल्या उपरांत त्या पावलें सडे (फातोडे) हांगाचे नेमिल्ले सुवातेर वताल्यो. केन्ना केन्नाय अशे घडटालें की, त्यो वेळार पावतल्यो, पूण हॉलाची चावी घेवन येवपी थळावे लोक वेळार पावनासलें. अशा वेळार ती भायर वाट पळोवन उबी रावताली. शाळा चुकली तरी हरकत ना, पूण योगाचो वर्ग चुकचो, हें तिका मान्य नाशिल्लें. शिक्षिकेच्या प्रामाणिकपणा खातीर तिचो हालींच महिला मेळाव्यांत सत्कार जालो.
शिरोडकार टीचर आतां शिक्षण सेवेंतल्यान निवृत्त जाल्यात. आतां त्यो पूर्णपणान योगाच्या वर्गांक अर्पण जाल्यात. त्यो दिसांसून तीन फावट मुफत वर्ग घेतात. सेंट तेरेजा हायस्कुलांत 1988 सावन निवृत्त जायसर त्यो शिक्षिका आशिल्ल्यो. योगाच्या आकर्शणा खातीर 2008 सालांत त्यो हरिद्वार वचून पतंजली योगाचें शिक्षण घेवन आयल्यो. कांदोळेच्या श्रीशांतादुर्गा देवळांत त्यो सदां योग वर्ग चलयतात. तेभायर, भुरग्यां मदीं राष्ट्रीयत्व आनी मूल्यशिक्षण रुजोवपा खातीर तेंय शिक्षण त्यो मुफत दितात.
श्री योगेंद्रजींची ‘द बेतर योग संस्था’ ही सेवावृत्तीन चलिल्लें एक प्रतीक आसा. योग हें ऋषी-मुनींचें ज्ञान, तें सेवे खातीरच आसचें. नोकरींत पगार मेळटलो, पूण सेवेचें म्हत्व वेगळें आसता. जशी आयुर्वेद विद्या, तशीच योग विद्या लोकांक शिकोवंक सगल्यांनी फुडें सरचें. शिरोडकार टीचरीन तिचे जायते विद्यार्थी तयार केल्यात, जांणी जायतीं बक्षीसां मेळयल्यात. तुमी लेगीत ही संद घेवंक शकतात.
आतां योगांतल्या करियर विशीं माहिती घेवया. योग सर्टिफिकेट कोर्स करून तुमी प्रमाणपत्र मेळोवन योग प्रशिक्षक जावंक शकतात. योग शिक्षक म्हणून कॉलेजांनी, विद्यापीठांनी वचून शिकोवंक शकतात किंवा वैयक्तिक क्लासय घेवंक शकतात. गिरेस्त लोकांक जशी बॉडीगार्डची गरज आसता, तशीच आज योगाचीय गरज वाडल्या.
योग थेरपिस्ट म्हणून काम करपाचीय संद आसा. दर एका रोगा खातीर विशिश्ट आसनां आसतात, ताचो अभ्यास करून तुमी दुयेंतींक मार्गदर्शन करूंक शकतात. हाचे संबंदान जायतें साहित्य ऑनलायन मेळटा. पर्यटकांक तर योगाचें खूप आकर्षण आसता. परदेशी पर्यटक तर योगा खातीर सामके पिशेच जातात. आजकाल पांच ताऱ्यांच्या
हॉटेलांनी योग शिक्षण हें एक मुखेल आकर्शण मानून ताची जायरात करतात. गोंयांत लेगीत तुमी
पतंजली योग वा कन्याकुमारी वचून शिक्षण घेतिल्ल्या तज्ञ प्रशिक्षकां कडल्यान योगाभ्यास करूंक शकतात.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
