भांगरभूंय | प्रतिनिधी
विश्वजीत, दिगंबरा सयत आमदारांनी घेतली बी. एल. संतोषजींची भेट
भाजप मुख्यालयाचे १५ ऑगस्टाक उक्तावण शक्य
पणजी : आमी कागाळी मांडल्यो नात, येवपी वेंचणूक आनी संघटणेच्या वावराचेर आमची चर्चा जाल्ल्याची म्हायती मंत्री तशेंच आमदारांनी राष्ट्रीय सरचिटणीस बी. एल. संतोष हांची भेट घेतले उपरांत दिली. संतोष हांणी बसकेंतल्या चर्चेची म्हायती दिवपाक न्हयकार दिलो.
संतोष हे आमदार, मंत्र्यांकडेन चर्चा करून पक्षाच्या वावराचो नियाळ घेवपा खातीर गोंयांत आयल्या. शेेनवारा सांजेच्या वेळार गोंयांत पावले उपरांत तांणी आयतारा सकाळीं कदंब पठाराचेर भाजप मुख्यालय इमारतीच्या कामाची पळोवणी केली. मुख्यमंत्री डॉ. प्रमोद सावंत हांचे सयत पणजे कार्यालयांत प्रधानमंत्र्यांची मन की बात कार्यावळ आयकले उपरांत तांणी आमदार, मंत्र्यांकडेन वन टू वन चर्चा केली. भलायकी मंत्री विश्वजीत राणे, बांदकाम मंत्री दिगंबर कामत, सभापती गणेश गावकार, आमदार प्रेमेंद शेट, आमदार निलेश काब्राल हांचे कडेन तांणी वन टू वन चर्चा केली.
म्हज्यो कोणाचविशीं कसल्योच कागाळी नात. येवपी वेंचणुकेत पक्षाक भोवमत मेळोवन दिवपा खातीर हांव वावर करतलों. संघटणा घटमूट करपाविशीं चर्चा जाली, अशें भलयाकी मंत्री विश्वजित राणे हांणी सांगलें. वेंचणुके खातीर कशे तरेन वावर करपाक जाय, हाचेर चर्चा जाल्ल्याचें तांणी सांगलें.
बी. एल. संतोष हांचे कडेन म्हजी सदिच्छा भेट जाली. पर्वरी फ्लायओव्हर तशेंच दाबोळी पुलाच्या कामा विशीं तांणी विचारणा केली. मंत्री जाले उपरांत तांची आनी म्हजी ही पयलीच भेट आशिल्ली, अशें दिगंबर कामत हांणी सांगलें.
कुडचडें मतदारसंघांत म्हजोे वावर सुरूच आसा. हांव ट्रायड आनी टेस्टेड आमदार आसां. रोहन गांवस देसाय वा कोणाकूय सामाजीक कार्य करपाक हरकत ना. उमेदवारी कोणाक दिवपाची हाचो निर्णय पक्ष घेतलें, अशें आमदार निलेश काब्राल हांणी सांगलें.
भाजप मुख्यालयाचें १५ ऑगस्टॉक उक्तावण शक्य
बी. एल. संतोष हांणी कदंब पठाराचेर भाजप मुख्यालयाच्या बांदकामाची पळोवणी केली. प्रधानमंत्री नरेंद्र मोदी वा गृहमंत्री अमित शहा हांचे हस्तुकी १५ ऑगस्टाक मुख्यालयाचे उक्तावण जावपाची शक्यता आसा, अशें केंद्रीय मंत्री श्रीपाद नायक हांणी सांगलें.
मुख्यमंत्री डॉ. प्रमोद सावंत, प्रदेश भाजप अध्यक्ष दामू नायक, केंद्रीय मंत्री श्रीपाद नायक, आदले आमदार सिद्धार्थ कुंकळ्येकार हांणी संतोष हांचे सयत कामाची पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
