भांगरभूंय | प्रतिनिधी
पणजी: गोवा एससीईआरटीच्या मराठीच्या पुस्तकांत गोंयां भायल्या चड लेखकांचो आसपाव करून गोंयच्या लेखकांक फाटीं दवरिल्ल्याची बातमी प्रसिद्ध केले उपरांत अभ्यास मंडळान एक व्हिडियो जारी केला. तातूंत, गोंयाच्या लेखकांची टक्केवारी पन्नास टक्क्यांच्या लागीं वा ताचे परस मात्शी उणी आशिल्ल्याचें म्हणलां. हो वाद चालू आसतनाच यत्ता चवथेच्या पुस्तकांत वट्ट ७५ टक्क्यां परस चड लेखक गोंयां भायले घेतिल्ल्याचें उक्तें जालें.
गोंयच्या लेखकांनी अभ्यास मंडळाचे हे गजालीक हरकत घेतले उपरांत आपल्या लागींच्यांक सांगून आपलो एक व्हिडियो प्रसारीत केला. सोशल मिडियाचेर हो व्हिडियो घाला, मात गोंयच्या खुबश्या लेखकांनी दिसाळ्यांत आयिल्ले खबरेची कमेंटां वरवीं तोखणाय केल्या. हें सत मुखार हाडिल्ल्यान साहित्य आनी शिक्षण मळावेल्या सगल्यांनीच बातमेक लागून तरी ह्यान फुडें गोंयच्या लेखकांक सन्मान मेळटलो, अशी अपेक्षाय उक्तायल्या.
मूळ बातमेंत फकत गोंयां भायले चड लेखक आशिल्ल्याचेंच म्हणिल्लें. तातूंत खंयच पुस्तकाच्या दर्जा विशीं वा साहित्या विशीं उल्लेख नाशिल्ले. मात अभ्यास मंडळान ते बातमेचो चुकीचो अर्थ काडून फाटल्या दोन दिसां सावन बोवाळ सुरू केला. हें सगळें सुरू आसतनाच कांय शिक्षकांनी तिसरी आनी चवथेचीं पुस्तकांचेर उजवाड घाला. तातूंत चवथेच्या पुस्तकांत तीन ते चार लेखक गोंयचे आसात. उरिल्ले तेरा परस चड लेखक गोंयां भायले आसात. तातूंत एक धडो अभ्यास मंडळान बरयला. ह्या पुस्तकांत ७५ टक्क्यां परस चड लेखक गोंयां भायले आसात.
यत्ता तिसरेच्या पुस्तकांत स लेखक गोंया भायले आसात. हेर सगळे धडे अभ्यास मंडळान तयार केल्यात. पयली आनी दुसरी यत्तेचीं पुस्तकां आजूनय छापूंक नात.
गुणवत्तेचो विचार केलो: अनिल सामंत
पांचवी ते णववेच्या पुस्तकां विशीं अभ्यास मंडळान व्हिडियो जारी केला. तातूंत अभ्यास मंडळाचेर नियंत्रक म्हणून काम पळोवपी अनिल सामंत हांणी बातमेंत खरेंपण नाशिल्ल्याचें म्हणलां. पाठ्यपुस्तकांची गुणवत्ता बरी जावची, ते खातीर धड्यांची निवड करतना तांतलें भावजीवन ते पिरायेच्या लोकांक जुळपी आसा काय? भाशा योग्य आसा काय? गोंयकारांची जीण त्या पाठ्यपुस्तकांत दिसता काय? तातूंत भुरग्यांक नव्या काळा मुखार वचपा खातीर विचार दिवपी मजकूर आसा काय? हो सगळो विचार करून पाठ्यपुस्तक तयार केलां, अशें सामंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
