भांगरभूंय | प्रतिनिधी
महसूल खात्याची शारीकरणाची अधिसुचोवणी रद्द
ह्या विशया वयल्यो ग्रामसभा रद्द करपाचे निर्देश
लोकांच्या भावनांचो विचार करून घेतला निर्णय
भांगरभूंय । प्रतिनिधी
पणजी : गोंयांतल्या 56 गांवांचो शार वाठारांत आस्पाव करपा संबंदी अधिसुचोवणी महसूल खात्यान फाटीं घेतली. ह्या निर्णयाची महसूल विभागान पंचायत संचालनालयाक आयज लेखी पत्रां वरवीं अधिकृतपणान म्हायती दिल्या. उपरांत शार दर्जो दिवपा संदर्भात लोकांच्यो सुचोवण्यो आनी आक्षेप नोंद करून घेवपा खातीर नियोजीत ग्रामसभा रद्द करपाचे निर्देश गट उदरगत अधिकाऱ्यान सगल्या पंचायतीक दिवचे, असो आदेश पंचायत खात्यान जारी केलो.
फाटल्या दोन दिसांत राजकी आनी समाजीक मळार वेगवेगळ्या घटकांनी उक्तायिल्ली प्रतिक्रिया आनी थळाव्या लोकांच्या भावनांचो विचार करून प्रशासनान हो निर्णय फाटीं घेतला हें स्पश्ट जालां.
ह्या प्रकरणाची फाटभूंय 2020 वर्साच्या सरकारी गॅझेटा कडेन संबंदीत आसा. ह्या गॅझेटांत गोंयांतल्या 56 गांवांचें शारीकरण करपाचो प्रस्ताव मांडिल्लो. पूण ते उपरांत थळाव्या पांवड्यार ह्या निर्णया खातीर आनी विरोधांत वेगवेगळीं मतां मुखार आयलीं. संबंदीत गांवांच्या थळाव्यांनी एकठांय येवन आपापल्या वाठारांचें शारीकरण करचें न्हय अशें थाराव संमत केल्ले.
मे 2026 वर्सा महसूल खात्यान पंचायत संचालनालयाच्या संचालकाक एक मेमोरंडम धाडिल्लो. ह्या मेमोरंडमांत संबंदीत पंचायतींनी एका म्हयन्या भितर ह्या विशयाचेर आपलें मत उक्तावपाचे निर्देश दिल्ले. हो मेमोरंडम भौशीक जाले उपरांत वेगवेगळे राजकी पक्ष, समाजीक संघटना आनी थळाव्या लोकांनी ह्या प्रस्तावाक परतून विरोध करपाक सुरवात केली.
थळावे लोक आनी तज्ञांच्या मतान गांवांचें शारीकरण केल्यार गांवांचे सोंसपाचे तांकीचेर परिणाम जावंक शकता. शारांतली लोकसंख्या व्हड प्रमाणांत गांवांनी स्थलांतरीत जाल्यार गांवांची सैमीक सोबीतकाय, मूळ संस्कृतायेचेर आनी थळाव्या पर्यावरणाचेर वायट परिणाम जातलो असो अदमास लोकांनी उक्तायिल्लो.
ह्यो सगल्यो गजाली आनी थळाव्या पांवड्या वयल्यान येवपी मागण्यांची दखल घेवन निमाणे महसूल खात्यान ह्या 56 गांवांच्या शारीकरणाची अधिसुचोवणी रोखडीच प्रभावीपणान फाटीं घेतल्या. प्रशासनान घेतिल्ल्या ह्या निर्णयाक थळाव्या लोकांनी आनी भौशीक प्रतिनिधींनी येवकार दिला.
उपरांत रोखडोच पंचायत खात्यान हे विशीं आदेश जारी करून सगळ्या गट उदरगत अधिकाऱ्यांक सांगलें, गांवांत शारी वाठार म्हणून जाहीर करपा संदर्भांत लोकांचो अभिप्राय, सुचोवण्यो वा तांचीं मतां एकठांय करपाची जी मोहीम आशिल्ली ती फाटीं घेतल्या. जर खंयचेय ग्रामपंचायतीन पयलींच हाका लागून नोटीस काडल्या वा ह्याच विशयाचेर चर्चा करपाक खंयचीय सादारण, विशेश वा ग्रामसभा थारायल्या आसत ती सभा धपक्याक रद्द जातली, अशे निर्देश आपल्या अधिकारा खाला येवपी सगल्या ग्राम पंचायतींक कळोवचें.
ही अधिसुचोवणी फाटीं घेवन भाजप सरकारान जनतेचेर उपकार करूंक नात. गोंयचे जनतने एकवटान दिल्ल्या लढ्याचें हें जैत आसा. हें जैत दरेका थळाव्याचें, दरेके ग्रामपंचायतीचें, दरेके सामाजीक संस्थेचें आनी गोंयची वळख जपपा खातीर झुजपी दरेका गोंयकाराचें आसा.
—
हें गोंयकारांचें जैत. गोंयच्या पुराय गांवांक एकठांय करपाची शिटकावणी दिले उपरांत सरकारान अधिकृत रितीन वादग्रस्त शार वाठारांची अधिसुचोवणी तत्काळ रद्द केल्या. नीज गोंयकाराचो आवाज केन्नाच उणाक लेखचो न्हय.
—
चिंबलच्या थळाव्यांनी शार वाठार अधिसुचोवणे आड एकमतान विरोध करून, हरकती दाखल करून आनी ग्रामसभेंत घेतिल्ल्या थरावा उपरांत, सरकारान ही अधिसुचोवणी फाटीं घेतल्या. हें जैत चिंबलाची वळख, हक्क आनी फुडार राखपा खातीर एकवटान उबे राविल्ल्या दरेक थळाव्यांचें आसा. ह्या ‘धोकेबाज’ प्रस्तावा आड आवाज काडपी सगल्यांचे मना सावन उपकार. लोकांच्या एकवटान परतून एकदां दाखोवन दिलां, जनतेची शक्त ही खंयच्याय हुकूमशाय थारावा परस चड बळिश्ट आसता.
थाकाय मेळिल्ले 56 गांव
पेडणें म्हाल
पेडणें, हरमल, मांद्रें, मोरजी आनी पार्शे.
बार्देस म्हाल
हळदोणें, हणजूणें, कळंगूट, कांदोळी, कोलवाळ, खोर्ली, गिरी, मयडें, निर्ला, पेन्ह द फ्रान्का, पिर्ळण, रेईश मागूस, साळगांव, साल्वादोर दी मुंद, शिवोली आनी सुकुर.
दिवचल म्हाल
कारापूर
सत्तरी म्हाल
होंडा
तिसवाडी म्हाल
बांबोळी, कालापूर, चिंबल, कुमारजुंवें, गोवा वेल्हा, जुंवें, मेणकुरें, मुर्डा आनी नावेली.
फोंडें म्हाल
बांदोडें, बोरी, खांडोळें, कुर्टी, मडकय, ओरगांव, प्रियोळ, कवळें आनी उसगांव.
साश्ट म्हाल
आके, बाणावली, चिचोणें, कुडटरी, दवर्ली, नुवें, राय, सां जुझे दी आरीयाल, वार्का आनी वेर्णा.
मुरगांव म्हाल
चिखली, कुठ्ठाळी, पाळे आनी सांकवाळ.
केपें म्हाल
शेल्डें.
सांगें म्हाल
सांवड्डें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
