वित्तीय साक्षरताय: अर्थीक गिज्ञान दिवपी पुस्तक

भांगरभूंय | प्रतिनिधी

नव्या शिक्षणीक धोरणान प्रादेशीक़ भाशेक खूब म्हत्व दिलां. हे नदरेन ह्या पुस्तकाचें म्हत्व खूब वाडटा.

‘वित्तीय साक्षरताय’ हें प्रा. डॉ. वामन रा. नायक हांणी बरयिल्लें पुस्तक हालींच उजवाडाक आयलां. हालींसराक कोंकणी भाशेंत वैध्यकीय, शिक्षण, व्यापार, वेवस्थापन अशीं साबार मळावेलीं पुस्तकां उजवाडाक येतात ही बरी गजाल. असलीं पुस्तकां भाशेचो आवांठ वाडयतात. भाशा घटमूट करतात. भाशेक घसघशीत करतात.
प्रा. डॉ. वामन रा. नायक हे अर्थीक मळावेले तज्ञ. तांणी अर्थशास्त्र ह्या विशयांत पदव्युत्तर पदवी आनी डॉक्टरेट घेतल्या. तांकां अर्थशास्त्र हो विशय शिकोवपाचो साबार वर्सांचो अणभव आसा. आपल्या ह्या गिज्ञानाचो आपल्या भाशेक कोंकणीक जावंचो, कोंकणी वाचप्यांक जावंचो म्हण तांणी सोंपे भाशेंत बरयलां. हाचे पयलीं ‘वेध फ़ुडाराचो’ हें तांचें अर्थशास्त्रावेलें पुस्तक राजभाशा संचालनालया कडल्यान उजवाडाक आयलां.
आयच्या बदलत्या परिस्थितींत अर्थीक मळा विशीं गिज्ञान आसप गरजेचें. हें अर्थीक नियोजन फ़कत श्रीमंतां खातीरूच नासता तर तें सामान्य मनशा खातीर चड गरजेचें आसता. मनीस श्रीमंत जावं गरीब, वित्तीय शिक्षणाची, साक्षरतायेची सगळ्यांक गरज आसा.
ह्या पुस्तकांत आठ विंगड विंगड प्रकरणां आसात. वित्तीय साक्षराताय, वित्तीय संस्था, अदमासपत्रक, बॅंकिंग सेवा बचत, बॅंकेतर वित्तीय संस्था, बॅंकिंग सेवा- रिणां, वित्तीय बाजार, अर्थीक समावेशन अशीं तीं आठ प्रकरणां.
ह्या सगळ्या प्रकरणां उदेशीं वाचप्यांक अर्थीक साक्षर करप, अर्थीक नियोजनाचें म्हत्व पटोवन दिवप, गुंतवणुकीच्यो तरा सांगाप, शॅर बाजाराविशीं म्हयती आदी सोपे भाशेंत सांगल्या. वाचप्यांक अर्थीक विशयासारको गडखळ विशय आपले भाशेंत समजुपाक समजुपाक खूप आदार जातलो. सोपे भाषेंत सांगतकच विशय सामान्यांक कळटा.
नव्या शिक्षणीक धोरणान प्रादेशीक़ भाशेक खूब म्हत्व दिलां. हे नदरेन ह्या पुस्तकाचें म्हत्व खूब वाडटा. कठीण विशय सोंप्या भाशेंत सांगपाचो उदाहरणा सयत हो यत्न आसा. पयलें वर्स पदवी , पदव्युत्तर अभ्यासक्रमा खातीर आनी सामान्य वाणिज्य शाखेचें व्यक्तींक बॅंका विशीं आनी वित्तीय सेवाविशींची वळख जावंची म्हूण ह्या कोंकणींतल्या पयल्याच पुस्तकाची अभ्यासकांक आनी सामान्य वाचप्यांक खूब उपेग जातलो अशी आस्त आसा. ते खातीर लेखकाक परबीं फ़ावतात.
प्रा. डॉ. वामन रा. नायक हांणी साबार पुस्तकां बरयल्यांत. समानार्थी-विरूध्दार्थी इंग्लिश-कोंकणी शब्दकोश (गोवा कोंकणी अकादेमी), ‘हिंद स्वराज्य’ हें गांधीजीचे पुस्तक (राश्ट्रीय अनुवाद मिशन), तशेंच कोंकणींत़लो ज्ञानकोश अर्थशास्त्र, समाज शास्त्र, प्रशासन, शिक्षण, संविधान अश्या वेगवेगळ्या विशयांवेल्या उतरांचो अर्थ कोंकणी, हिंदी आनी इंग्लिशींतल्यान उजवाडा येवपाच्या वाटेर आसा.
हें पुस्तक क्युरेट बुक्स प्रा. लिमिटेडचे रामा हरमलकार हांणी उजवाडाक हाडलां. ह्या पुस्तकाचें सोबीत मुखपृश्ठ श्री. वासुदेव दिवकार हांचें आसा. कोंकणीच्या शास्त्रीय तंत्रीक दालनाच्या ग्रंथरचनेंत घसघशीत भर घाल्या ह्या अर्थीक म्हायतीच्या पुस्तकान देखून लेखकाक परबीं.

सखाराम शेणवी बोरकार
9923306751