भांगरभूंय | प्रतिनिधी
ठाकरे : वेंचणुकेक केन्नाय तयार आशिल्ल्याचो दावो
भांगरभूंय । प्रतिनिधी
पणजी : काँग्रेसीत सगल्यांक प्रवेश आसतलो. पूण तांणी कसलीच अट दवरची न्हय. ज्या पक्षांक भाजपाक हारोवचेंशें दिसता तांचे वांगडा युती करून आमचे विचारधारेच्या आदाराचेर कॉमन मिनिमम प्रॉग्राम करतले. वेंचणूक केन्नाय येवन दी आमी फुडो करपाक तयार आसात, असो विस्वास काँग्रेसीचे गोंय प्रभारी माणिकराव ठाकरे हांणी सांगलें.
शेनवारा काँग्रेसीची राजकी वेव्हार बसका जाली. हे बसकेंत जाल्ल्या निर्णया विशीं म्हायती दितना ठाकरे उलयताले. ह्या वेळार प्रभारी अंजली निंबाळकर, गोंय काँग्रेसीचे प्रदेशाध्यक्ष गिरीश चोडणकार, विरोधी पक्ष फुडारी युरी आलेमांव, केपेंचे आमदार एल्टन डिकोस्टा आनी हळदोणेचे आमदार कार्लुस फेरेरा हजर आसले.
राजकी वेव्हार बसकेंत खूबश्या मुद्द्यांचेर एकमत जालां. तातूंत काँग्रेसीची राज्य पांवड्यार ते बूथ पांवडया वयली समिती घटमूट करपा खातीर तांचे कडल्यान 20 जुलय मेरेन सुचोवण्यो मागयल्यात, अशें ठाकरे हांणी सांगलें.
खूबशे इत्सूक काँग्रेस पक्षांत भितर येवपाक तयार जाल्यात. बसकेंत हे विशीं चर्चा जावन सगल्यांक प्रवेश दिवपाचें थारलां, पूण तांकां कसलेच अटी बगर प्रवेश दितले. हे विशींची प्रक्रिया आनी तांच्या फुडारा विशींचो विचार प्रदेश काँग्रेस करतली, अशें ठाकरे हांणी म्हणलें.
तशेच युती बाबतींत विचार विनिमय करून निर्णय जाला. खंयचोय पक्ष जाका भाजपा आड लडपाक जाय तांकां येवकार दितले. पक्षाचे विचारसरणीच्या आदाराचेर कॉमन मिनिमम प्रॉग्राम थारयतले. प्रदेशाध्यक्षा कडेन चर्चा करून ज्या फुडाऱ्यांक हे विशींचे अधिकार दिवपाक जाय हे विशीं बसकेंत उलोवप जालां, अशी म्हायती ठाकरे हांणी दिली.
आमी पक्षाचे धोरणात्मक निर्णय मुखार दवरल्यात. वेंचणूक समितीचे अध्यक्ष युरी आलेमांव, घोशणापत्र समितीचे अध्यक्ष विरियातो फर्नांडीस आनी समन्वय समितीचे अध्यक्ष फ्रान्सीस सार्दिन हांकां कांय दिसां भितर समितीचे वांगडी वेंचून काम सुरू करपाक सांगलां. प्रदेशाध्यक्षा वांगडा चर्चा करून कोणाक घेवप काय ना हो निर्णय तांचो आसतलो, अशें ठाकरे हांणी सांगलें.
गोंय काँग्रेस प्रदेशाध्यक्षाचो ताबो घेतल्या उपरांत सगल्यांत पयलीं राजकी वेव्हार समितीची बसका आपयल्ल्याचें गिरीश चोडणकार हांणी म्हणलें.
15 वर्सा भाजपान गोंयाचेर चलयल्ले अत्याचार बंद करपाचे आसत जाल्यार सगल्यांनी एकठांय येवपाकच जाय, अशें गोंयचे लोक मागतात. देखून युती विशींची पयली चर्चा राजकी वेव्हार बसकेंत जाली. जे पक्ष भाजपाक हारोवपाक सोदतात तांचे वांगडा व्यापक अशी युती करपा खातीर एकमतान मान्यताय मेळ्ळ्या, अशें चोडणकार हांणी सांगलें. विरोधी पक्ष फुडारी 22 सप्टेंबराक गोंय राखण यात्रेची घोशणा करतले. हे विशींचें सादरीकरण तांणी केलां आनी हे यात्रेक लागून लोक काँग्रेसी कडेन आकर्शीत जातले. तशेंच कांय मतभेदाक लागून खूबशे लोक पक्षा पसून पयस जाल्यात, त्या सगल्यांनी पक्षांत प्रवेश करून भाजपा आड एकवटान वावरुपा खातीर पक्षाक घटसाण दिवची, असो उलो आयजे बसकेंत मारला, अशी म्हायती चोडणकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
