भांगरभूंय | प्रतिनिधी
विचारसरणी जिविताच्या प्रवाहांत नकळत काय जायना. दरेकल्याक खंयची तरी एक विचारसरणी आवडटा. पूण ती खऱ्यांनीच एक आदर्श विचारसरणी आसता? कांय जाण म्हणटात, जसो ’गांधी विचार’ एक विचारसरणी, तशेंच नथुराम गोडसे हीय एक विचारसरणी. जाका जी आवडटा, ताणें ती स्विकारची. ना. हें अयोग्य.
गांधी विचार ही एक विचारसरणी, पूण गोडसे ही विचारसरणी आसपाक शकना. कारण विचारसरणी ही आदर्शूच आसपाक जाय. विकृती आदर्श जायना. मतभेद आसा वा तांचीं तत्वां आवडना म्हूण एखाद्या मनशाक जितो मारप ही आदर्श विचारसरणी जावंक शकना. जर गोडसेची विचारसरणी आमी आदर्श म्हूण आपणायली जाल्यार? ताचे परिणाम कितें जातले?
जो तो आपल्याक तुजीं मतां वा तत्वां पटना म्हूण दुसऱ्याक मारपाक लागलो जाल्यार? आनी तुमकांच मारपाक एकलो आयलो जाल्यार? कल्पना करात, तुमी सकाळीं फुडें निशस्त्र खंय तरी वचपाक भायर सरल्यात, तुमचे मुखार एकलो पिस्तोल घेवन उबो रावता आनी तुमचेर तीन गुळयो घालता.
आपल्याक आवडना वा ताची विचारसरणी पटना म्हूण एखाद्या मनशाक जिवेशी मारप ही विकृती. आपल्याक आवडना ताचेर गुळयो घालप एकवेळ कांय जाणांच्या मनाक पट्टलें. पूण दुसरो कोणूय तत्वां, मतां आवडना म्हूण आपल्याचेरूच गुळयो घालपाक आयिल्लो कोणाकूच नाका. देखून अशे तरेची विकृती विचारसरणी जावपाक शकना.
गांधी विचार काय नेहरू? ह्या दोन विचारसरणी मदीं निवड करूं येता. गांधीजी परंपरा मानपी, जाल्यार नेहरू आधुनीक विचारसरणीचे. गांधीजींचो पारंपरीक, धर्मीक दिश्टीकोन काय नेहरूचो आधुनिकताय, विज्ञानवादी दिश्टीकोन. आर्धुनीक वैजकी शास्त्र काय आयुर्वेद? मळबा कडेन उडपाचो हावेस काय पकदस्त पाळां-मुळां जावन पारंपरीकतायेच्या मळार घट्ट जावपाचो दिश्टीकोन? काय ह्या दोनूय विचारसणेचो सुमेळ? मनशान खंयच्याय आदर्श तत्वाची निवड करूं, आपल्याक पटना त्या मताचो आदर करपाचो समंजसपणा जाय. जाचे विचार पटना ताचेर वैयक्तीक टिका करप आयोग्य. बदनामी करप अयोग्य आनी खून करप हो गुन्यांव. ताचें समर्थन केन्नाच जावपाक शकना.
संपदा कुंकळकार
9850149319
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
