भांगरभूंय | प्रतिनिधी
अफगाणिस्तानान आशिया करंड क्रिकेट सर्तीच्या सुपर चारांत सुवात मेळयली. काल हांगाच्या शारजा क्रिकेट स्टेडियमाचेर ब गटांत जाल्ले मॅचींत ताणें बांगलादेशाक 7 विकेटींनी हारयलो.
नजीबुल्ला झदरानान फक्त 17 बॉलांनी वट्ट 43 धांवड्यो करून अफगाणिस्तानाचें जैत सोंपें केलें.
बांगलादेशान जैता खातीर दिल्ले 128 धांवड्यांचे मोखीचो फाटलाव करतना अफगाणिस्तानाचे ओपनर सवाय भितर बाद जाले. हजरतुल्ला झझाई 23 आनी रहमान उल्ला गुरबाज 11 धांवड्यो करून सवाय भितर बाद जाले. पूण, ते उपरांत इब्राहीम झदरान-नजीबुल्ला झरदान हे जोडयेन पंगडाक जैता मेरेन व्हेलो. दोगांयनी व्हड शॉर्ट मारून बांगलादेशाच्या हातांतलें जैत काडून घेतलें. इब्राहीमान नाबाद 42 आनी नजीबुल्लान 43 धांवड्यो केल्यो.
ते पयलीं टॉस जिखून बांगलादेशान पयलीं बॅटींग करपाचो निर्णय घेतलो. पूण, ताचो हो निर्णय योग्य थारलो ना.
अफगाणिस्तानाच्या नजीब उर रहमानान सुरवातीच्या तीन बॅट्समनांक तंबूंत धाडले. मोहम्मद नईम 6, अनामुल हक फक्त 5 धांवड्यो करून बाद जालो. जाल्यार मुखेली शाकिब अल हसनान 11 धांवड्यो केल्यो.
ते उपरांत लेग स्पिनर राशिद खानान मुशफिकुर रहीम (1) आनी अफिफ हसैन (12) हाका एलबीडब्ल्यू बाद केले. तशेंच मैदानांत स्थिराविल्ल्या महमुदुल्लाह हाका लेगीत राशिदान वैयक्तीक 25 धांवड्यांचेर बाद केलो.
पयले आनी मदले फळयेंतले पांच बॅट्समन 55 धांवड्यां भितर बाद जाले. ताका लागून बांगलादेशाची स्थिती बिकट जाली. ते उपरांत मोसाद्देक हुसेनान एक बाजू राखून स्कोर मुखार व्हरपाचो यत्न केलो. ताच्याच यत्नाक लागून बांगलादेशाक निर्धारीत 20 ओव्हरींनी सात विकेटी वगडावन 127 धांवड्यां मेरेन मजल मारप शक्य जालें. मोसाद्देकान 31 बॉलांनी नाबाद 48 धांवड्यो केल्यो.
नजीब उर रहमान आनी राशिद खान हांणी बांगलादेशाच्या बॅट्समनांक बांदून दवरले. तांणी बॅट्समनांक व्हड शॉर्ट मारपाक दिले ना. नजीब आनी राशिद हांणी दरेकी तीन विकेटी घेतल्यो. जाल्यार बांगलादेशाचो एक बॅट्समन धांवबाद जालो.
दुसरे वटेन बांगलादेशाच्या बॉलरांक अफगाणिस्तानाच्या बॅट्समनांक आडावपाक शकले नात. शाकिब अल हसन, मोसाद्देक हुसेन, मोहम्मद सैफुद्दीन हांणी दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
