भांगरभूंय | प्रतिनिधी
पणजीः गोंयांतल्या 56 गांवांचो शार वाठारांत आस्पाव करपा संबंदी अधिसुचोवणी महसूल खात्यान फाटीं घेतली. ह्या निर्णयाची महसूल विभागान पंचायत संचालनालयाक आयज लेखी पत्रां वरवीं अधिकृतपणान म्हायती दिल्या. फाटल्या दोन दिसांत राजकी आनी समाजीक मळार वेगवेगळ्या घटकांनी उक्तायिल्ली प्रतिक्रिया आनी थळाव्या लोकांच्या भावनांचो विचार करून प्रशासनान हो निर्णय फाटीं घेतला हें स्पश्ट जालां.
2020 वर्साच्या प्रस्तावाची फाटभूंय
ह्या प्रकरणाची फाटभूंय 2020 वर्साच्या सरकारी गॅझेटा कडेन संबंदीत आसा. ह्या गॅझेटांत गोंयांतल्या 56 गांवांचें शारीकरण करपाचो प्रस्ताव मांडिल्लो. पूण ते उपरांत थळाव्या पांवड्यार ह्या निर्णया खातीर आनी विरोधांत वेगवेगळीं मतां मुखार आयलीं. संबंदीत गांवांच्या थळाव्यांनी एकठांय येवन आपापल्या वाठारांचें शारीकरण करचे न्हय अशे थाराव संमत केल्ले.
मेमोरँडमा उपरांत चर्चा आनी प्रतिक्रिया
मे 2026 वर्सा महसूल खात्यान पंचायत संचालनालयाच्या संचालकाक एक मेमोरँडम धाडिल्लें. ह्या मेमोरँडमांत संबंदीत पंचायतींनी एका म्हयन्या भितर ह्या विशयाचेर आपले मत उक्तावपाचे निर्देश दिल्ले. हें मेमोरँडम भौशीक जाले उपरांत वेगवेगळे राजकी पक्ष, समाजीक संघटना आनी थळावे नागरिकांनी ह्या प्रस्तावाक परतून विरोध करपाक सुरवात केली.
गांवांच्या संसाधनांचेर परिणामांची शक्यताय
थळावे नागरिक आनी तज्ञांच्या मतान गांवांचें शारीकरण केल्यार गावांच्या ‘कॅरिंग कॅपॅसिटी’चेर परिणाम जावंक शकता. शारांतली लोकसंख्या व्हड प्रमाणांत गांवांनी स्थलांतरीत जाल्यार गांवांची सैमीक सोबीतकाय, मूळ संस्कृतायेचेर आनी थळाव्या पर्यावरणाचेर वायट परिणाम जातलो असो अदमास नागरिकांनी उक्तायिल्लो.
रोखडीच अधिसुचोवणी रद्द
ह्यो सगळ्यो गजाली आनी थळाव्या पांवड्या वयल्यान येवपी मागणींची दखल घेवन निमाणे महसूल खात्यान ह्या 56 गांवांच्या शारीकरणाची अधिसुचोवणी रोखडीच प्रभावीपणान फाटीं घेतल्या. प्रशासनान घेतिल्ल्या ह्या निर्णयाक थळाव्या लोकांनी आनी भौशीक प्रतिनिधींनी येवकार दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
