भांगरभूंय | प्रतिनिधी
खबरां संस्थाः दोंगरार दिशिल्ल्या एका सोरोपान पुलिसांक एके अशें सुवातेर व्हेले, जंय एका फ्लॅटांत 309 अजगर (हार सोरोप) बेकायदेशीर रितीन दवरून तांकां थंय पोसताले. चीनांतल्या झेजियांग प्रांतांतल्यान ही धक्को दिवपी घडणूक उजवाडाक आयल्या.
मार्च 2024 वर्सा एका जाण्ट्या नागरिकाक एका दोंगरार व्हडलो अजगर दिसलो. ह्या वाठारांत अजगर चड करून मेळनात आनी त्या हंगामांत सोरोप सुप्त आसतात. ताका लागून हो सोरोप कोणाच्या तरी चपक्यांतल्यान सुटला असो दुबाव आयलो. पुलिसांनी धनयाचो सोद घेवपाक सुरवात केली, पूण तांकां येस मेळ्ळें ना. पुलिसांनी चवकशी सुरु केली.
वीज बिलान धरलो
चवकशे वेळार सोरोप तज्ञान पुलिसांक म्हत्वाची म्हायती दिली. अजगराक जगपाक आनी प्रजनन करपाक वर्सभर खूब उश्ण आनी दमट वातावरण जाय आसता अशें तांणी सांगलें. ते खातीर घरांत व्हड प्रमाणांत हीटर आनी उपकरणां वापरचीं पडटात, जाका लागून वीज वापरांत व्हड प्रमाणांत वाड जाता. हाचेर आदारून पुलिसांनी वाठारांतल्या वीज वापराची नोंदी तपासपाक सुरवात केली. हातूंत ‘गुओ’ नांवाच्या मनशाच्या घरांत वीज वापर चड जाता अशें दिसून आयलें.
दुबाव वाडलो आनी धाड घाली
पुलिसांनी गुओचेर नदर दवरता आसतना ताच्या घरा ‘डी’ नांवाचो आनीक एक मनीस सेगीत योता-वतना दिसलो. ‘डी’ नेमान धवे उंदीर आशिल्ले पार्सल मागयतालो. तशेंच सोशल मिडियाचेर सोरपाचे फोटो घालून तांची विक्रीची जायरात दितालो. दोन सोरपांची बेकायदेशीर विक्री जाल्ल्याचे पुरावे मेळ्ळ्या उपरांत पुलिसांनी गुओच्या फ्लॅटाचेर धाड घाली.
घर जाली सोरपांची फॅक्टरी
फ्लॅटांन भितर सरताच पुलिसांक धक्को बसलो. गुओन हॉल आनी आपल्या घरांतल्या सगळ्या बेडरूम्साचे रुपांतर सोरपांच्या फॅक्टरींत केल्ले. शेंकड्यांनी प्लास्टीक कंटेनर एकामेकांचेर दवरिल्ले आनी दरेक कंटेनरांत अजगर आशिल्ले. गुओ स्वता सगळ्या सोरपां मदीं एका ल्हान कुडींत रावतालो. पुलिसांनी फ्लॅटांतल्यान वट्ट 309 अजगर जप्त करून थळाव्या प्राणी संग्रहालयांत धाडले.
चवकशे वेळार गुओन सांगलें, आपणाक सोरप खूब आवडटात. 2014 वर्सा ताणें 4 अजगर विकतें घेतले आनी तांची पोसवण कशी करपाचे तें स्वता शिकले. तो स्वताक सोरपांचो ‘क्रिएटर’ मानतालो. आतां मेरेन ह्या दोगांयनी 80 अजगर विकले. तशेंच सुरवेक तांकां सोरपाची पुरवण करपी ‘डेंग’ नांवाच्या तिसऱ्या मनशाक पुलिसांनी अटक करुन ताच्या घरांतल्यान 47 अजगर जप्त केल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
