भांगरभूंय | प्रतिनिधी
डाॅ. अदिती बुडकुले हांच्या अनुवादीत पुस्तकाचें प्रकाशन आयज जाता. ते निमतान….
कोंकणींत ‘वेदान्त’ आनी ‘भारतविद्या’ ह्यो संकल्पना, तशेंच तांचो आधुनीक काळा कडलो संबंद हांचे विशींची वळख घडोवपी पुस्तक ‘आधुनीक विश्वांत वेदांत आनी हेर भारतविद्यादी निबंद’ हें डॉ. अदिती बुडकुले हांणी अनुवादीत केल्लें पुस्तक मूळ लेखक डॉ. व्ही नित्यानन्त भट हांचें ‘Vedant and the Modern World and other Indological Essays’ ह्या निबंद संग्रहाचो अनुवाद आसा. वेदांताचो मनशाचे जिणेंत म्हत्वाचो वांटो आसा. आयच्या युगांत जंय अस्थीरता, तणाव वाडटा. अशे वेळार वेदान्ताचे विचारधारेन मनशांमदी समानताय, सर्वसमावेशकताय निर्माण केली. विज्ञान, पर्यावरण, शिक्षण आदी विशय वेदान्तचे नदरेंतल्यान हाताळपी डॉ भट हांचे लेख ह्या पुस्तकांत अनुवादीत केल्ले आसात. कोंकणीत ‘वेदान्त’ ह्या संकल्पनेची वळख कोंकणींतल्यान घडोवपी हें पयलें पुस्तक आसा.
ह्या पुस्तकांत एकूण 12 लेख आसात. पयल्या चार लेखांनी वेदान्त ह्या संकल्पने अंतर्गत आधुनीक विश्व, आधुनीक विज्ञान, परिस्थितिकीय जागृताय आनी शिक्षण ह्या विशयाचेर लेखकान वितार व्यक्त केल्यात. संवसारांतल्यान विंगड विंगड प्रस्नांक समर्पक जाप दिवपी ‘वेदान्त’ हो विशय संवसारातल्या वेगवेगळ्या लेखकांनी अणभविल्ल्यान वेंचीक विचारवंताचे दृश्टीकोण लेखक मांडटा. स्वामी रंगनाथानंद, स्वामी सत्यप्रकाशानंद हांणी मांडिल्ल्या विचाराचेर लेखकान मत मांडलां. पयल्या लेखांत वेदान्ताचो आधुनीक विज्ञान, पर्यावरणी आपात्काल, आधुनीक शिक्षण, आधुनीक वेवस्थापन हांच्या विशीं लेखकान सांगलां. हेर लेखांनी शिक्षण, विज्ञान आनी परिस्थितिकडेन संबंधीत लेखन केलां. पर्यावरणाची भुमिकेचे जायते संदर्भ वेदांनी मेळटा म्हणपाचें लेखक सांगता. ‘वैदीक काळांतलं शिक्षण’ हे लेखांत गुरुकूल शिक्षण पद्धत, धर्मनिरपेक्ष विद्या, तशेंच वैदीक काळांत अभ्यासा खातीर आशिल्ल्या विशय जे काळ आनी दिसपट्ट्या जिणेकडेन संबंधीत आशिल्ले अशे विशय लेखक सांगता. एकंदर कर्तव्य, जबाबदारी आनी आनी पद्धत हांचेर हो लेख भर दिता. भारतीय ज्ञान परंपरा (Indian Knowledge System) हाचे विशींचीं मुळावी वळख वाचप्याक ह्या लेखकांतल्यान जाता.
‘भारतीय हस्तलिखितांची परंपरा’ हो लेख आयच्या काळांत हस्तलिखितांची गर समजूंक आनी जतनाय घेवंक आमी कशे अपेशी थारल्यात म्हणपाचें कळटा. अस्तित्वांत आशिल्ल्या लिखीत परंपरेचो आडावो घेवन लेखक मुद्रणाच्या आदली स्थिती सांगतना पुरातन काळांत हस्तलिखीत परंपरेविशीं लोकांमदीं नाशिल्ली जागृतीक अनास्था मांडटा. आधुनीक तंत्रज्ञान ह्या लिखीतांच्या संवर्धनांक योग्य माध्यम थारतलें म्हणपाचें लेखक सांगता. ‘खरें शिक्षण’ हो लेख वैदीक काळांतल्या शिक्षण पद्धतीचेर, तशेंच विचारवंतांनी शिक्षणाची केल्ली परिभाशा मांडटा. लेखांत श्री ऑरोबिन्दो हांणी शेरो मारिल्ल्या प्रमाण “भारतीयांनी आधुनीक युगांत, शिक्षण म्हळ्यार गिन्यान संपादन करप, हो गैरसमज करून घेतला” म्हणपाचें लेखक सांगता. तशेंच शिक्षणाविशींचें खाशेंलें तत्वज्ञान विकसीत करपा विशींचो विचार हो लेख दिता. ह्या लेखांत रवीन्द्रनाथ टागोर, स्वामी विवेकानंद हांचें शिक्षणाविशींचे विचार मांडल्यात.
गुरु परंपरा आनी शिक्षकाचें कर्तव्य सांगपी लेख म्हणल्यार ‘शिक्षक’. शिक्षकाची भुमिका आनी ‘शिक्षक’ ह्या उतराची परिभाशा लेखांत आसा. विद्यार्थी घडयता आसतना शिक्षकाची मुळावीं उद्धिश्टां आनी मोख ही अर्थार्जना कडल्यान ज्ञानार्जनाकडेन आसपाक जाय म्हणपाचें लेखक, तशेंच विंगड विंगड तत्वज्ञानी सांगतात. “शिज्ञणाचो दर्जो तेन्नाच वाडपाक शकता जेन्ना शिक्षक वेवसायीक दिश्टीन समाधानी, प्रेरीत, समर्पीत आसतात आनी शिकणारे, समुदाय आनी समाज हांच्या कल्याणा खातीर वावुरपाक तयार आसतात” म्हणपाचो लेखकाचो विचार आसा. ‘मानवी उत्कृश्टताय’ आनी ‘त्यागाचो आदर्श’ हे दोनूय लेख तत्वज्ञान शिकयतना जिवीताकडेन पळोवपाचो तटस्त दृश्टीकोण फाव करतात. ‘सेवा आनी अध्यात्म’ ह्या लेखांत अध्यात्म आनी सेवेचें नातें स्पश्ट करता. आपणा लागीं आशिल्ली शक्त ही लोकांचे सेवे खातीर आसची आनी मनशान निस्वार्थी जावन जगचें अशे विशय लेखक संबंधीत निबंदांत मांडटा.
डॉ. भट हांच्या ह्या पुस्तकांतलो ‘खरें जागतीकरण: एक भारतीय परिप्रेक्ष्य’ हो लेख आयच्या जागतीकरणाचेर विचार करता. आधुनीक काळाची वाटचाल सांगतना जागतीकरणाचे प्रक्रियेंत तंत्रज्ञान विकासाक लागून जगाच्या एकीकरणाक हातभार लागला म्हणपाचें सांगता. ह्या पुस्तकांतलो निमाणो लेख म्हणल्यार ‘श्री ऑरोबिन्दो अनुसार भारतीय परिप्रेक्ष्यांत काव्य प्रकृती’. मुळांत श्री ऑरोबिन्दो काव्याचे नेम आनी प्रकृतीचेर भाश्य करतात. कवितेक धरून आशिल्ले गूण, शब्दकळा, अर्थार्जन आनी बोध कविच्या प्राविण्याक जोड दिता. कवितेची बांदावळ कशी आसची हाचेर श्री ऑरोबिन्दो वेगवेगळ्या नदरेंतल्यान भर दितात. देखून ह्या पुस्तकांतले वेदान्ताचेर आदारीत आनी हेर भारतविद्यादी लेख हे विचारांचो साठो आसात. ह्या पुस्तकान लेखकान दिल्ली संदर्भ वळेरी ह्या पुस्तका फाटली प्रक्रिया वाचकाक समजावपाक आदार करता.
ह्या पुस्तकांत अनुवादकची भुमिका म्हत्वाची आसा. डॉ अदिती बुडकुले हांची संस्कृत आनी तत्वज्ञान विशयाचेर पकड आशिल्ल्यान हो पूरक अनुवाद शक्य जाला. कोंकणी उतरावळ वापरतना अनुवादकान कोंकणी वाचकाक संवकळ जावची हाचें भान दवरलां. मुळांत संशोधनात्मक साहित्याचो अणकार करप तितलें सोपें न्हय. पूण भाशेचेर पकड आसत जाल्यार गजाली शक्य जातात म्हणपाचें पुस्तक वाचून कळटा. आयच्या आधुनीक काळार वेदान्त विश्वा कडेन जोडपी आनी तत्वज्ञानाचे साणीर मार्गदर्शन करपी हे पुस्तकाक कोंकणी मळार परबीं आंवडेतां.
मूळ लेखक – डॉ. व्ही नित्यानन्त भट
अनुवाद – डॉ. अदिती बुडकुले
प्रकाशक – संजना पब्लिकेशन्स
मोल – 250 रु.
सावय-वेरें, फोंडें
8552883808
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
